އިސްރާއީލްގެ ލާއިންސާނީ ހަމަލާތަކުގައި ޣައްޒާއިން ޝަހީދުވަމުންދާ މީހުންގެ އަދަދުތައް ޣައްޒާގެ އޮފިޝަލުން ހާމަކުރަމުންދަނީ ރަނގަޅަށް ކަމަށް އދ.ގެ އޮފިޝަލަކު ވިދާޅުވެއްޖެއެވެ.

އެ ހިސާބުތައް ރަނގަޅު ކަމަށް އދ.އިން ބުނެފައި މިވަނީ އިސްރާއީލުގެ ހަމަލާތަކުގެ ސަބަބުން ޣައްޒާގައި މަރުވި މީހުންގެ އަދަދުތަކާ މެދު ސުވާލު އުފައްދަވައި އެމެރިކާގެ ރައީސް ޖޯ ބައިޑެން ދާދި ފަހުން ދެއްކެވި ވާހަކަފުޅުތަކާ ގުޅިގެންނެވެ.

ޔުނައިޓެޑް ނޭޝަންސް ރިލީފް އެންޑް ވޯރކްސް އޭޖެންސީ (ޔޫ.އެން.އާރު.ޑަބްލިއު.އޭ) އިން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އެ ޖަމްޢިއްޔާގެ ކޮމިޝަނާ ޖެނެރަލް ފިލިޕް ލަޒާރިނީ ވިދާޅުވީ ޣައްޒާގެ ހެލްތު މިނިސްޓްރީގެ ތަފާސްހިސާބުތަކަކީ ތާރީޚީ ގޮތުން އިތުބާރު ކުރެވޭ ތަފާސްހިސާބުތަކެއް ކަމަށް ބެލެވޭ ކަމަށެވެ.

ލަޒާރީނީ ވިދާޅުވީ އދ.ގެ އެނަލިސިސްއަކުން މުޅި ޣައްޒާގެ އާބާދީގެ ތެރޭގައި މަރުވި މުވައްޒަފުންގެ ރޭޝިއޯއާ އަޅާކިޔާއިރު، އެފަދަ އިންސައްތައެއް ފެނިފައިވާ ކަމަށެވެ. މިކަމުން އެނގެނީ މަރުވި މީހުންގެ އަދަދުތައް ސައްހަ ކަމަށް ބެލެވޭ ކަމަށެވެ.

ފަލަސްތީނުގެ 7،000 އަށް ވުރެ ގިނަ މީހުން ޝަހީދުވެފައިވާ ޣައްޒާގައި ހަމާސްގެ އޮފިޝަލުން ރިޕޯޓްކޮށްފައިވާ އަދަދުތަކާ މެދު އިތުބާރު ނެތް ކަމަށް ބުދަ ދުވަހު އެމެރިކާގެ ރައީސް ބައިޑެން ވަނީ ވިދާޅުވެފަ އެވެ. 

ޔޫ.އެން.އާރް.ޑަބްލިއު.އޭ އިން ވަނީ މަރުވާ މީހުންގެ ޢަދަދަކީ ފަތުރަމުންދާ ޕްރޮޕަގެންޑާއެއް ކަމަށްބުނެ ޝައްކު އުފްދާފައެވެ.  ހިއުމެނިޓޭރިއަން އެޖެންސީން ދަނީ ޣައްޒާގައި އެތައް ލައްކަ ބަޔަކަށް ޚިދުމަތްދޭ ސްކޫލްތަކާއި ކްލިނިކްތަކާއި އެހީގެ ޕްރޮގްރާމްތައް ހިންގަމުންނެވެ.

ހަނގުރާމައިގެ ދުވަސްވަރު ޓްރެކިންގައި ގޯސްތަކެއް ދިމާވެދާނެކަމަށް ޤަބޫލުކުރައްވާ ލަޒާރީނީ ވިދާޅުވީ، އިސްރާއީލުގެ ވައިގެ ޙަމަލާތަކުގެ ތެރޭގައި ޢާންމުން މަރުވި މީހުންގެ ޢަދަދު، ޞިއްޙީ އޮފިޝަލުން އިތުބާރުހުރި ގޮތެއްގައި ލިޔުއްވަމުން ގެންދަވާކަމާމެދު ޝައްކުކުރަންޖެހޭ އެއްވެސް ސަބަބެއް ޔޫ.އެން.އާރް.ޑަބްލިއު.އޭއަށް ފާހަގަ ކުރެވިފައި ނެތްކަމަށެވެ.

އިސްރާއީލާއި ހަމާސްއާ ދެމެދު ބަދަލުކުރެވެމުންދާ ހަމަލާތައް ހުއްޓާލުމަށް ބައިނަލްއަގްވާމީ ފެންވަރުގައި މަސައްކަތް ކުރި ނަމަވެސް އެދެވޭ ނަތީޖާއެއް ނުލިބި ބަޑީގެ ހަމަލާތައް ބަދަލުކުރުން ދަނީ އިތުރުވަމުންނެވެ.

އޮކްޓޯބަރު މަހު 7 ގައި ހަމަލާތައް ބަދަލުކުރަން ފެށިފަހުން 7،000 އަށް ވުރެ ގިނަ މީހުން މަރުވެފައިވާއިރު، ޣައްޒާގެ އިންސާނީ ހާލަތު ފެންނަނީ ވަރަށް ގޯސްކޮށެވެ.