ފޮރިން މިނިސްޓަރު ޢަބްދުﷲ ޝާހިދު ސައުތު އޭޝިއަން އެސޯސިއޭޝަން ފޮރ ރީޖަނަލް ކޯޕަރޭޝަން، ސާރކްގެ އައު ސެކްރެޓަރީ ޖެނެރަލް އެމްޑީ ގޯލަމް ސަރްވާރަށް މަރުޙަބާ ވިދާޅުވެއްޖެއެވެ.
ފޮރިން މިނިސްޓަރު ޢަބްދުﷲ ޝާހިދު ކުރެއްވި ޓުވީޓެއްގައި ވިދާޅުވީ އެ ޖަމިއްޔާގެ މަޤްޞަދުތައް ޙާޞިލުކުރުމަށްޓަކައި އެމްޑީ ގޯލަމް އާއި ގުޅިގެން މަސައްކަތް ކުރައްވާނެކަމުގެ ޔަޤީންކަން ދެއްވާ ކަމަށެވެ.
އެމްޑީ ގޯލަމް އަކީ ސާރކްގެ ސެކްރެޓަރީ ޖެނެރަލްގެ މަޤާމަށް ޢައްޔަނުކުރެވުނު 15 ވަނަ ބޭފުޅާއެވެ. އެމްޑީ ގޯލަމް މިހާތަނަށް ހުންނެވީ ބަންގްލަދޭޝްއިން މެލޭޝިއާއަށް ކަނޑައަޅުއްވާފައި ހުންނަވާ ސަފީރުކަމުގެ މަޤާމުގައެވެ. އޭނާ އަކީ ޑިޕްލޮމަޓިކް ދާއިރާގައި ގިނަ ޚިދުމަތްތަކެއް ކުރައްވާފައިވާ ބޭފުޅެކެވެ. އަދި ބަންގްލަދޭޝްއިން އޮމާން އަދި ސްވިޑަންއަށް ކަނޑައަޅުއްވާފައި ހުންނަވާ ސަފީރުކަމުގެ މަޤާމްފަދަ މުހިންމު މަޤާމްތައް ވެސް އޭނާ ވަނީ މީގެ ކުރިން އަދާކުރައްވާފައެވެ.
ސާރކް ވުޖޫދަށް އައީ 1985 ވަނަ އަހަރުގެ ތެރޭގައެވެ.
