އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުން ޣައްޒާއަށް މެދުކެނޑުމެއްނެތި ދެމުންދާ ހަމަލާތަކުގައި ޣައްޒާގެ 200،000 (ދެ ލައްކަ) ހައުސިންގ ޔުނިޓް މުޅިން އެއްކޮށް ނުވަތަ ބައެއް ހަލާކުކޮށްލާފައިވާކަމަށް ފަލަސްތީނުން ހާމަކޮށްފިއެވެ.

ފަލަސްތީނުގެ ޕަބްލިކް ވޯރކް އެންޑް ހައުސިންގ މިނިސްޓަރު މުހައްމަދު ޒިޔާރާ ވިދާޅުވީ ޣައްޒާއަށް އިސްރާއީލުން ދެމުންދާ ހަމަލާތަކުގެ ސަބަބުން އެތައް އާއިލާއެއް އެއްކޮށް ވުޖޫދުން ފޮހެލެވެމުންދާއިރު މީހުން ދިރިއުޅެމުންދިޔަ އެތައް ހާސް އިމާރާތެއްވެސް ބިމާހަމަވެ ވުޖޫދުން ފޮހެލެވެމުންދާކަމަށެވެ. ޒިޔާރާ ވިދާޅުވީ އޭގެތެރޭގައި ހޮސްޕިޓަލްތަކާއި، އަޅުކަންކުރާ ތަންތަނާއި، ފެން ދޫކުރާ ތަންތަނާއި، މާރުކޭޓްތަކާއި ސްކޫލްތަކާއި ތައުލީމުދޭ ތަންތަން ހިމެނެއެވެ.

2.3 މިލިއަން މީހުން ދިރިއުޅެމުން އަންނަ ޣައްޒާގެ ބޮޑުމިނަކީ 365 ސްކޮޔަރ ކިލޯމީޓަރެވެ.

އދ ގެ ހިޔުމެނިޓޭރިއަން އޮފީހުން ބުނާގޮތުގައި އިސްރާއީލުން ދެމުންދާ ހަމަލާތަކުގައި ޣައްޒާގައި މީހުން ދިރިއުޅެމުންދާ ގެތަކުގެ 45 އިންސައްތަ ވަނީ އެއްކޮށް ބިމާހަމަވެފައެވެ. އޭތެރޭގައި އެންމެ ބޮޑަށް އަސަރުކޮށްފައިވަނީ ބެއިތު ހަނޫން، ބެއިތު ލަހިޔާ، ޝާތި ރެފިޔުޖީ ކޭމްޕް ވަށައިގެންވާ ސަރަހައްދު އަދި ޚާން ޔޫނުސްއެވެ.

އަންދާޒާކުރެވޭ ގޮތުގައި ޣައްޒާގެ 1.4 މިލިއަން މީހުން ވަނީ މެދުކެނޑުމެއްނެތި ޣައްޒާއަށް އިސްރާއީލުން ދެމުންދާ ހަމަލާތަކުގައި ޣައްޒާގެ އެތެރޭގައި އެކިތަންތަނަށް ވިއްސިވިހާލިވެފައެވެ. އޭގެތެރެއިން 629،000 މީހުން ބޯހިޔާވަހިކަން ހޯދަމުން އަންނަނީ އދ ން ގާއިމުކޮށްފައިވާ 150 އެމަރޖެންސީ ބޯހިޔާވަހިތަކުގައެވެ.

އަނެއްކޮޅުން މުޅި ޣައްޒާ އެއްކޮށް ބަންދުކޮށް، ތެޔޮ އެތެރެކުރުން އެއްކޮށް ހުއްޓުވާފައިވުމުގެ ސަބަބުން ޣައްޒާގެ ހޮސްޕިޓަލްތަކުގެ ޚިދުމަތްތައް ރަނގަޅަށް ދިނުމަށް އަންނަނީ ބޮޑެތި ގޮންޖެހުންތައް ކުރިމަތިވަމުންނެވެ. އޭގެތެރޭގައި ހާލުދެރަ ބަލި މީހުންނަށް ބޭސްފަރުވާ ކުރެވޭނެ ގޮތެއް ވަނީނެތިފައެވެ. ވަކިން ޚާއްސަކޮށް އިންކިޔުބޭޓަރުތަކުގައި ތިބި ދުވަސްނުފުރާ ވިހާފައިތިބި ތުއްތުކުދިންނާއި ޑަޔަލިސިސް ހަދަމުންދާ ހާހެއްހާ ބަލިމީހުންނަށް ފަރުވާދޭން ވަނީ ވަރަށް ބޮޑަށް ދަތިވެފައެވެ. އަދި ތެޔޮ ނެތުމުގެ ސަބަބުން އެމްބިޔުލަންސްތައް ދުއްވުމަށް ވަނީ ދަތިވެފައެވެ.

ހަމާސް އިން ޣައްޒާގެ ކޮންޓްރޯލް 2007 ވަނަ އަހަރު ހޯދިފަހުން އިސްރާއީލުން އަންނަނީ ޣައްޒާއަށް ގިނަ ދަތިކުރުމުގެ ފިޔަވަޅުތައް އަޅަމުންނެވެ. އެގޮތުން އެސަރަހައްދުގެ މީހުންނާއި، ފެނާއި، ކާބޯތަކެއްޗާއި އެހެނިހެން ތަކެތި އެއްތަނުން އަނެއް ތަނަށް ގެންދިޔުމާއި މިނޫންވެސް މުޅި ސަރަހައްދުގެ ހުރިހާ ކަމެއް ކޮންޓްރޯލްކުރަމުން އަންނަނީ އިސްރާއީލުންނެވެ.