ނިއުރޭޑިއަންޓްގެ ކޯޗިން ޓީމް ލީޑް ކުރަނީ މޯހަން!

ނިއުރޭޑިއަންޓްގެ މެނޭޖްމަންޓްގައި މިއަދު އެހެން ބަޔަކު ތިއްބަސް, އެއީ ޕްރޯ ލައިސަންސް ކޯޗު މުޙައްމަދު ޝިޔާޒު (މޯހަން) ގެ ގެއިން ނުކުތް ކްލަބެކެވެ. ނިއުރޭޑިއަންޓްގެ އެންމެ ކާމިޔާބު އަހަރުތަކުގެ ހަނދާންތައްވެސް ހުރީ އެގޭގައެވެ. ނަތީޖާއަކީ ނިއުރޭޑިއަންޓަށް މޯހަންގެ ހިތުގައިވެސް ޚާއްޞަ ލޯތްބެއް އޮތުމެވެ. ބޮޑު ސަމާލުކަމެއް އެ ކްލަބަށް ދެވުމެވެ.

ނިއުރޭޑިއަންޓަށް ސަސްޕެންޝަން ކުރިމަތިވެ, ފުރަތަމަ ޑިވިޝަންގެ ޖާގަ އަލުން ހޯދުމަށް ދެވަނަ ޑިވިޝަންގައި ވާދަކުރާއިރު އެޓީމަށް މޯހަން އެހީވަނީ އެސަބަބުތަކާ ހުރެއެވެ. މިއަހަރު ދެވަނަ ޑިވިޝަނަށް ނިއުރޭޑިއަންޓް ޓީމް އެކުލަވާލަން ފެށީންސުރެ އެކަމުގައި އެންމެ ކުރީގައި އަމަލީ ގޮތުން މަސައްކަތް ކުރަނީ މޯހަންއެވެ. އޭނާގެ ނަން ކަރުދާހުގައި ނެތަސް, ކަރުދާހުގައި ހުރި ނަންތައް ހޯދާ, އެމީހުންގެ ރުހުން ލިބުނީ މޯހަންގެ މަސައްކަތުންނެވެ.

ނިއުރޭޑިއަންޓްގެ ކޯޗު އަހުމަދު ނިމާދު (ނިމާ) މޯހަންގެ އެސިސްޓެންޓެއްގެ ގޮތުގައި އީގަލްސްގައި މަސައްލަތްކުރިއެވެ. މިއަދު ނިއުރޭޑިއަންޓްގެ ކޯޗު ކަމުގައު ހުރުމުގެ އެންމެ ބޮޑު ސަބަބަކީ މޯހަންއެވެ.

ނިމާ ބުނީ ނިއުރޭޑިއަންޓާއި ވިކްޓްރީ ފުރަތަމަ ޑިވިޝަނުންގައި އޮތުން އޭނާވެސް އެދޭ ކަމަށާއި, ރާއްޖޭގެ ބޯޅައިގެ ފޯރިއަށް އެކަމުންވެސް ހެޔޮ އަސަރުތަކެއް ކުރާނެ ކަމަށެވެ. ނިމާގެ އެސިސްޓެންޓަކަށް ހުރީ ނިއުރޭޑިއަންޓަށްވެސް ކުޅެ ކާމިޔާބީތައް ހޯދި ޑިފެންޑަރު ފަރުހާދު އިސްމާއީލް (ފަރޭ) އެވެ. ރާއްޖޭގެ ފުރަތަމަ ޑިވިޝަންގެ ގިނަ ކްލަބްތަކަށް ކުޅުނުއިރު މޯހަންގެ އިރުޝާދުވެސް ލިބުނެވެ. ކޯޗިންގެ މަސައްކަތް ފަށާ އޭނާ ހުރީ ކުޅުން ހުއްޓާލުމަށްފަހު އެންމެ ސަޕޯރޓް ކުރާ ކްލަބް ނިއުރޭޑިއަންޓަށް ޚިދުމަތް ކުރަން ބޭނުންވެފައެވެ. އަގެއް ނެތި އެކަން ކޮށްދޭން މިދިޔަ އަހަރުވެސް އޭނާ ހުށަހެޅިއެވެ. މިއަހަރު ނިއުރޭޑިއަންޓްގެ ކޯޗިންގ ޓީމުން ފަރޭ ފެނުމުގެ އަސްލަކީވެސް މޯހަންއެވެ. ފަރޭއަކީ ނިއުރޭޑިއަންޓަށް މަރުދޭ ސަޕޯޓަރެކެވެ.

ކޯޗިންގ ޓީމާ ހިސާބުންވެސް ނުނިމެއެވެ. ނިއުރޭޑިއަންޓަށް ކުޅުންތެރިން ހޯދުމަށްވެސް އެންމެ ބޮޑަށް މަސައްކަތްކުރީ މޯހަންއެވެ. ޓީމްގެ މުހިއްމު ކުޅުންތެރިންގެ ސޮއި ހޯދަން ވާހަކަ ދެއްކީ ސީދާ މޯހަންކަމަށް އެނގިފައިވެއެވެ. މިޑްފީލްޑަރ މިދުހަތު ފަހުމީ (ބިޗަޑް) ގެ ސޮއިހޯދަން އޭނާ ދިރިއުޅޭ ގެއަށް ދިޔައެވެ. ގެއިން ނިކުންނަ ވަގުތު ބަލައިގެން އަތުޖެއްސިއެވެ. ނިއުއިން ފުރަތަމަ ކުޅުންތެރިން ހޯދިއިރުވެސް ނިއުރޭޑިއަންޓްފެ ތައްޔާރުވުމުގެ އަޑީގައި ހުރީ މޯހަން ކަމަށް ވާހަކަ ދެކެވނެވެ. އެކަމަކު މީގެ ދެތިން މަސް ކުރިން އޭނާއަށް އެސުވާލުކުރުމުން ބުނީ "އަޑިޔަކު ނޫން, ހަމަ މަތީގަ މިހުރީ" ކަމަށެވެ.

ފުރަތަމަ ޑިވިޝަންގެ ޖާގަ އަލުން ހޯދަން ނިއުރޭޑިއަންޓް ކުރާ މަސައްކަތުގައި ނިއުރޭޑިއަންޓަށް މަރުދޭ ސަޕޯޓަރުން ހިމެނޭ މެނޭޖްމަންޓަކާއި, ކޯޗިންގ ޓީމެއް އޮތުމަކީ ވަރަށްބޮޑު ހިތްވަރެކެވެ. އަދި ފުރަތަމަ ޑިވިޝަންގެ ތަޖުރިބާ ލިބިފައިވާ ކުޅުންތެރިން ހިމެނޭ ޓީމެއް އޮތުމަކީ އެކަމަށް އޮތް ފުރުޞަތު ބޮޑުވާނެ ކަމެކެވެ. ރާއްޖޭގެ އެންމެ ސަޕޯޓަރުން ގިނަ ކްލަބް އަލުން ފުރަތަމަ ޑިވިޝަނުން ފެނުމަށް އުއްމީދުކުރާ ބޯޅައިގެ ސަޕޯޓަރުން ގިނައެވެ.