އާއިލާ މެންބަރުންގެ ހަށިތައް ދެނެގަންނަން ޖެހުނީ، އުދުވާންތަކުގައި މަރުވިކަމަށް ނިންމި ދީމާއަށް!

އެޔެއް މިޔެއް ބެލުމެއް ނެތި، ޔަހޫދީ އިޒްރޭލުން ޣައްޒާއަށް ދެމުންގެންދާ އުދުވާނީ ޙަމަލާތަކުން ސަލާމަތްވުމަށް، ޣައްޒާގެ ކުދި ބޮޑު އެންމެން މަސައްކަތްކުރެއެވެ. ދާނެ ވަކި މަންޒިލެއް ނެތް ހާލުގައިވެސް، ފުރާނަ ސަލާމަތްކުރެވޭތޯ ކޮންމެ މީހަކުވެސް ބަލައެވެ. ދީމާ އައްލާމްދާނީއާއި އޭނާގެ އާއިލާގެ މެންބަރުންނަކީވެސް ހަމަ އެގޮތަށް، އުދުވާންތަކުން ސަލާމަތްވުމަށް އެކި ތަންތަނަށް ބަދަލުވަމުންދާ އެތައް ލައްކަ މީހުންގެ ތެރޭގައި ގުނާލެވޭ ބަޔެކެވެ.

އަމިއްލަ ގެދޮރުން ނުކުމެ، ދާނެ ވަކި އިތުރު ތަނެއް ނެތުމުގެ ސަބަބުން، އެ އާއިލާ ބަދަލުވީ ޚާން ޔޫނިސްގައި ހިންގާ ވަގުތީ ހިޔާވައްސަކަށެވެ. ވަގުތީ ހަމަޖެހުމެއް ލިބުނުކަމުގެ ފޮނި އުއްމީދުތަކާ އެކުގައެވެ.

ރޭގަނޑުގެ އަނދިރި ޖެހުމާއެކު، ދީމާގެ ދިރިއުޅުމުގައިވެސް ކަޅު އަނދިރި ސާލެއް އޮޅާލި ފަދައެވެ. އެއީ އޮކްޓޯބަރު 17 ވަނަ ދުވަހުގެ ރޭގަނޑުގެ ވަގުތެވެ. އިޒްރޭލުގެ އަސްކަރީ މަތިންދާބޯޓުތަކުން ދިޔައީ ބޮން އަޅަމުންނެވެ. ދިމާގެ އާއިލާ އެތަނެއްގައި ހިމާޔަތް ހޯދަމުން ދިޔަ ވަގުތީ ހިޔަލަށްވެސް ހަމަލާ އަމާޒުވިއެވެ. ދީމާއާއި އޭނާގެ ބޭބެގެ އިތުރުން، އޭނާއާ ދެބެންގެ ދެދަރި 2 ކޮއްކޮއެއްގެ ފުރާނަ ސަލާމަތްވިއެވެ. ނަމަވެސް، އެ އާއިލާގައި ބާކީ ތިބި 13 މީހުން މި ދުނިޔެއާ އަބަދުގެ އަބަދަށް ވަކިވެ ދިޔައީއެވެ. އޭގެ ތެރޭގައި ދީމާގެ މައިންބަފައިންނާއި އެއްބަނޑުއެއްބަފާ 7 ބެއިންގެ އިތުރުން، ބޮޑުބޭބެގެ އާއިލާގެ 4 މެންބަރުން ހިމެނެއެވެ.

އުމުރުން އެންމެ 18 އަހަރުގެ ދީމާއަށް ކުރިމަތިލާން ޖެހުނީ، ހަރުފުރައިގެ ފިރިހެނަކަށްވެސް ކަރުނަ ހިފަހައްޓާލަން ދަތި ޒިންމާއަކާއެވެ. އިޒްރޭލުގެ އުދުވާންތަކުގައި ފުރާނަ ގެއްލިދިޔަ މީހުންގެ ގަބުރުތައް ޖަމާކޮށްފައިވާ ތަނަށް ގޮސް، އޭނާގެ އާއިލާގެ މެންބަރުންގެ ހަށިތައް ދެނެގަތުމުގެ ހިތްދަތި މައްސޫލިއްޔަތު އެޅިފައި އޮތީ ދީމާގެ ކޮނޑުގައެވެ.

އިޒްރޭލުގެ އުދުވާންތަކުގައި ދީމާވެސް މަރުވި ކަމަށް ނިންމި ފަހަރެއް ދިޔައެވެ. އެއީ އޮޅުމެއްގެ ތެރެއިން ހިނގި ކަމެއް ކަމަށް ދީމާ ގަބޫލުކުރެއެވެ.

ދީމާގެ އިތުރުން، އޭނާގެ ބޭބެއާއި ދެބެންގެ ދެދަރި ކޮއްކޮމެންގެ ހަށިގަނޑުގެ އެތަންމިތަން ވަނީ ޒަޚަމްވެފައެވެ. އާއިލާގެ މެންބަރުން ވަކިވެ ދިއުމުގެ ހިތާމަ ފިލައިގެން ނުދާއިރު، ކެނޑިނޭޅި ދެމުންދާ ހަމަލާތަކުގެ ސަބަބުން އެ މައުސޫމް ހިތުން ބިރުވެރިކަން ފިލައިދާ ހަމަ އެންމެ ހިނދުކޮޅެއްވެސް ނާދެއެވެ. ދީމާ ސިފަކުރާ ފަދައިން، އޭނާގެ ހަގީގީ ދިރިއުޅުމަކީ މިއަދު 'ބިރުވެރި ހުވަފަނެއް ފަދަ' ކަމަކަށް ވެއްޖެއެވެ.

މި ފަހުގެ ތާރީޚު ދުށް އެންމެ ހިތްދަތި އިންސާނީ ކާރިސާއެއްގެ ބަލިމަޑުކަން ފެތުރެމުންދާ ޣައްޒާގެ ސިއްޙަތާބެހޭ ވުޒާރާއިން ބުނާގޮތުގައި، އިޒްރޭލުގެ އުދުވާންތަކުގައި މި ދުނިޔެއާ ވަކިވެދިޔަ ފަލަސްތީނު ރައްޔިތުންގެ އަދަދު، 4700އަށްވުރެ މައްޗަށް އަރައެވެ. 2.3 މިލިއަން މީހުންގެ އާބާދީއެއް އޮތް ޣައްޒާގައި ގެދޮރު ގެއްލިފައިވާ މީހުންގެ އަދަދު މިހާރު މިލިއަނަކަށްވުރެ އިތުރުވެފައި ވާކަމަށް އދ.ން ބުނެއެވެ.