ހަމާސްގެ "ކޮމާންޑޯސް" އަށް އަމާޒުކޮށް އިސްރާއީލުން އިންޓެލިޖެންސް ޔުނިޓެއް އުފައްދައިފި

މި މަހުގެ ކުރީކޮޅު އިސްރާއީލަށް ކުއްލި ގޮތަކަށް ހަމަލާދިން ފަލަސްތީނުގެ ހަމާސް ކޮމާންޑޯ ޔުނިޓުގެ މެންބަރުން ހިފައި ހައްޔަރުކުރުމުގެ މަޤްޞަދުގައި އިސްރާއީލުގެ މޮސާޑް އިންޓެލިޖެންސް އެޖެންސީ އާއި ޝިން ބެޓް އިންޓާނަލް ސެކިއުރިޓީ ސާވިސް ގުޅިގެން ޚާއްޞަ އިންޓެލިޖެންސް ޔުނިޓެއް އުފައްދައިފި އެވެ.

އިސްރާއީލުން ބުނީ އިސްރާއީލުގެ 1400 މީހުން މަރާލި ކުއްލި ހަމަލާގައި ބައިވެރިވި ހަމާސްގެ "އެލީޓް ނުކްބާ ފޯސް"ގެ ހުރިހާ މެންބަރުން ހިފައި ހައްޔަރުކުރާނެކަމަށާއި، އަދި އެމީހުންނަށް މަރުގެ އަދަބު ދޭނެކަމަށެވެ. އަދި އަލަށް އުފެއްދި ޚާއްޞަ އިންޓެލިޖެންސް ޔުނިޓުން އިސްރާއީލުގެ އަސްކަރިއްޔާއަށް އެމީހުންގެ މައުލޫމާތު ފޯރުކޮށްދެމުން ދާނެކަމަށެވެ.

އިސްރާއީލުގެ ދިފާއީ ބާރުތަކާ ހަވާލާދީ އެގައުމުގެ މަސްދަރުތަކުން ރިޕޯޓްކުރި ގޮތުގައި ވައިގެ ހަމަލާތަކުގައި ނުކްބާގެ ދެ ކޮމާންޑަރުން މިހާރު ވެސް ވަނީ މަރާލެވިފައެވެ. އެއީ އެ ޖަމާއަތުގެ ޚާން ޔުނިސް ބެޓަލިއަން ކޮމާންޑަރު ބިލާލް އަލް ކެދްރާ އާއި ހަމާސްގެ ކޮމާންޑަރު އަލީ ޤާދީ ކަމަށް އިސްރާއީލުގެ އަސްކަރިއްޔާއިން ބުނެއެވެ. މީގެ އިތުރުން ހަމާސްގެ އިތުރު 10 މީހަކުވެސް މިދިޔަ ބުދަ ދުވަހު މަރާލައިފައި ވާނެކަމަށް އިސްރާއީލުގެ އަސްކަރިއްޔާއިން ބުނެ އެވެ. އިސްރާއީލުން މިހާ ތަފްޞީލީ ގޮތެއްގައި މި ވާހަކަ ދެއްކި އިރު، ހަމާސްއިން ވެސް ވަނީ އެ ޖަމާޢަތުގެ ބަޔަކު ޝަހީދުވެފައިވާ ކަމަށް ކަށަވަރު ކޮށްދީފަވެ.

އިސްރާއީލުން އެންމެ ބޭނުންވި ލިސްޓުގެ އެންމެ ކުރީގައި އުޅެނީ ހަމާސްގެ އަސްކަރީ ކޮމާންޑަރު މުހައްމަދު ދީފާއި އާއި ސިޔާސީ ލީޑަރު ޔަހްޔާ ސިންވާރު ކަމަށާއި އެ ދެ މީހުން ވެސް މިހާރު ތިބީ ޣައްޒާގެ ބިމުއަޑީގައި ހަމާސްއިން ހަދާފައިވާ ބިންގަރާސްތަކުގެ އަޑީގައި ތާށިވެފައި ނުވަތަ ނުކުންނަން ނުކުރިފައި ކަމަށްވެސް އިސްރާއީލުގެ އަސްކަރިއްޔާއިން ވަނީ ބުނެފައެވެ.  

އިސްރާއީލުގެ ޑިފެންސް ފޯސް (އައިޑީއެފް) އިން ހަމާސްގެ ހަމަލާއަށް ރައްދު ދީފައިވަނީ ޣައްޒާގެ ތާރީހުގައި މީގެ ކުރިން ދުވަހަކުވެސް ނުފެންނަ ފަދަ ބާރުމިނުގައި ބޮން އަޅައި، މުޅި ޣައްޒާ ސުންނާފަތި ކޮށްލުމާއެކުގައެވެ. މި ހިނގާ އޮކްޓޯބަރު 7ން ފެށިގެން ހުއްޓުމެއްނެތި އިސްރާއީލުން ދަނީ ޣައްޒާއަށް ވަރުގަދަ ހަމަލާތައްދެމުންނެވެ. މިއަދާހަމައަށް އިސްރާއީލުގެ ހަމަލާތަކުގައި، ފަލަސްތީނުގެ 4،300 އަށް ވުރެ ގިނަ މީހުން ވަނީ ޝަހީދުކޮށްލައިފައެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.

ޣައްޒާގެ ރައްޔިތުންނަށް ކޮންމެހެން ބޭނުންވާ އިންސާނީ އަސާސީ ތަކެތި ވެސް މިފަދަ ދަތި ދަނޑިވަޅެއްގައި ޣައްޒާއަށް އެތެރިވިޔަނުދީ އިސްރާއީލުން ހުރަސްއަޅަމުންދާއިރު، ކަރަންޓާއި، ފެނާއި، ނަރުދަމާ ފަދަ އަސާސީ ޚިދުމަތްތަކުން ވެސް ޣައްޒާ ރައްޔިތުން ވަނީ މަހުހޫރުމް ކޮށްފައެވެ.

އދ. ފަދަ ބައިނަލްއަގްވާމީ ޖަމިއްޔާތަކުން ވަނީ ނަތަންޔާހޫގެ ސަރުކާރުން ބަދަލުހިފުމުގެ ގޮތުން ބައިނަލްއަގުވާމީ އިންސާނީ އަދި ޖިނާއީ ގާނޫނާ ހިލާފަށް އާންމުންގެ އާބާދީއަށް ފެނާއި ކާބޯތަކެއްޗާއި ތެލާއި ބޭހާއި އެހެނިހެން މުހިންމު ސާމާނުތައް ފޯރުކޮށްދިނަނުދީ ހިފަހައްޓާފައިވާ ކަމަށް ތުހުމަތުކޮށްފަ އެވެ.

އިސްރާއީލަށް އެތައް ބިލިއަން ޑޮލަރެއްގެ އަސްކަރީ އެހީއެއް ދޭން ވައުދުވެ، ދުޝްމަނުންނަށް ނުރައްކާ ކުރުމަށް އެ ސަރަހައްދަށް ކެރިއާ ގްރޫޕްތަކާއި މިސައިލް ބެޓެރީތަކާއި އެތައް ހާސް ސިފައިން ފޮނުވި އެމެރިކާ އިން ވެސް ވަނީ ކެތްތެރިވުމަށް އިސްރާއީލަށް އިލްތިމާސްކޮށްފަ އެވެ.

އިސްރާއީލުން ޣައްޒާއަށް އެއްގަމު މަގުން އަރައިގަތުން ލަސްވެފައި މިވަނީ ޣައްޒާއަށް ބޭނުންވާ އިންސާނީ އެހީތެރިކަން ފޯރުކޮށްދިނުމުގެ ފުރުޞަތު އިތުރަށް ދިނުމުގެ ގޮތުން ކަމަށް ބައެއް ރިޕޯޓްތައް ބުނެއެވެ.

ހަމާސްގެ ބެލުމުގެ ދަށަށް ގެނައި އެމެރިކާގެ މަންމައަކާއި އަންހެން ކުއްޖަކު ވަނީ ރެޑްކްރޮސްގެ ބެލުމުގެ ދަށަށް މިދިޔަ ހުކުރު ދުވަހު ދޫކޮށްލާފައެވެ. ހަމާސް އިން ހޮނިހިރު ދުވަހު ވަނީ އިސްރާއީލުގެ އަސްކަރީ ރައްދު ހުއްޓުވުމުގެ މަގްސަދުގައި ހަމާސްގެ ބެލުމުގެ ދަށުގައި ތިބި އިތުރު ރަހީނުން ދޫކޮށްލުމުގެ އެއްބަސްވުމަކަށް އައުމަށް އިސްރާއީލަށް ހުށަހަޅައިފާ ކަމަށް ބައެއް ރިޕޯޓްތައް ބުނެއެވެ. އެކަމަކު އިސްރާއީލުން އެކަމަށް ވަނީ ދެކޮޅުހަދާފައެވެ.

ހަމާސްގެ ކޮންމެ މެންބަރަކީ ވެސް މަރުވެފައިވާ މީހެއްކަމަށް ހަމަލާ ދިންތާ ހަފްތާއަކަށްވުރެ ވެސް ގިނަދުވަސްވީ ފަހުން ޓީވީ މެދުވެރިކޮށް ދިން ތަގުރީރުގައި ނަތަންޔާހޫ އިންޒާރު ދިނެވެ.

އެގޮތުން ހަމާސް ޖަމާއަތް ނައްތާލައި، އެ ޖަމާއަތުގެ ހުރިހާ ގާބިލުކަމެއް ނައްތާލާނެ ކަމަށް ވައުދުވެ، އިސްރާއީލުގެ ޑިފެންސް މިނިސްޓަރު ޔޯވް ގަލަންޓްވެސް ބުދަ ދުވަހުވަނީ ހަމާސްއަށް އިންޒާރު ދީފައެވެ.