ފުލުހުން އެފްއޭއެމަށް، ފީފާއިން ސަސްޕެންޑްކޮށްފާނެތަ؟

މަނީލޯންޑަރިން މައްސަލާގައި ފުލުހުން ވަނީ އިއްޔެ ފުޓްބޯޅަ އެސޯސިއޭޝަން އޮފް މޯލްޑިވްސް އަށް ވަދެފަ އެވެ. މިއާއެކު މީގެ ކުރިންނާއި މިހާރު ވެސް ދެކެވޭ ވާހަކަ އަކީ ފީފާއިން ރާއްޖެ ސަސްޕެންޑްކޮށްފާނެ ވާހަކަ އެވެ. ސުވާލަކީ މިއީ ދުނިޔޭގެ ފުޓްބޯޅަ ޖަމިއްޔާ ފީފާއިން ރާއްޖެ ސަސްޕެންޑްކޮށްފާނެ ކަމެއް ހެއްޔެވެ؟

ފީފާއިން މިހާތަނަށް ދުވަހަކު ވެސް ރާއްޖެ ސަސްޕެންޑެއް ނުކުރެ އެވެ. އެކަމަކު ދެ ފަހަރެއްގެ މަތީން އިންތިގާލީ މަރުހަލާއަށް އެފްއޭއެމް ދިޔަ އެވެ. ފުރަތަމަ 2008ގަ އެވެ. އޭގެ ފަހުން 2015ގަ އެވެ. 2008ގައި އިންތިގާލީ މަރުހަލާއަކަށް ދިޔައީ އެފްއޭއެމްގެ އިންތިހާބު މުޅިން އަލަށް ބޭއްވުމަށެވެ. 2013ގައި އެއިރުގެ ރައީސް އިލްހާމް އަހުމަދުގެ ދައުރު ނިމުމަކަށް ގެނައުމަށްފަހު އައު އިންތިހާބެއް ބޭއްވުމަށެވެ.

ފީފާއިން ގައުމެށް ސަސްޕެންޑްކުރާނެ ހާލަތުތަކެއް އަންނާނެ އެވެ. އެންމެ ބޮޑު މައްސަލައަކަށްވާނީ ތިން ވަނަ ފަރާތަކުން އެފްއޭއެމް ހިންގަން ފެށުމެވެ. ނުވަތަ ތިން ވަނަ ފަރާތެއްގެ ނުފޫޒުން ފުޓްބޯޅައިގެ ގޮތް ނިންމުމެވެ. މި ގޮތުން ބަލާއިރު ފުލުހުން އެފްއޭއެމަށްވަނުމަކީ ތަނުގެ ހިންގުން ހުއްޓޭކަމެއްނޫނެވެ. އެއްވެސް މީހެއްގެ ވާޖިބު އަދާކުރުމަށް ހުރަހެއްނެތެވެ. މުބާރާތެއްގެ ގަވާއިދެއް ބަދަލެއްނުވެ އެވެ. މުބާރާތެއް ނުހުއްޓެއެވެ. ވަކި މީހަކު ވަޒީފާއިން ވަކިނުވެ އެވެ. އަދި އަލަށް ބަޔަކު ހަވާލެއްވެސްނުވެ އެވެ. ވަކިކަމެއް ކޮށްފައި ނުކުރުމަށް މަޖުބޫރު ކަމެއްވެސް ނެތެވެ.

އެންމެ ފަހުން ފީފާއިން ސަސްޕެންޑްކުރި އެސޯސިއޭޝަންތަކާ މެދު ފިޔަވަޅު އެޅީ ކީއްވެ ހެއްޔެވެ؟ ޕާކިސްތާން އެފްއޭ ސަސްޕެންޑްކުރީ ގްރޫޕަކުން ވަދެ ތަން ހިސާރުކޮށް، ބައެއް މީހުންގެ މަގާމު ގެއްލުވާލައި އަމިއްލައަށް ކަންކަންކުރަން ފެށުމުންނެވެ. ސްރީލަންކާ ސަސްޕެންޑްކުރީ ގަވާއިދާ ހިލާފަށް ބޭއްވި އިންތިހާބެއްގެ މައްސަލާގައި އުފެދުނު ހިޔާލުތަފާތުވުންތަކާހެދި އެވެ. އިންޑިޔާ ސަސްޕެންޑްކުރީ އެގައުމުގެ ސްޕްރީމް ކޯޓުގެ އަމުރަކާ ގުޅިގެންނެވެ. ރާއްޖޭގައި އަދި މިފަދަ ހާލަތެއްނެތެވެ. މިހެންވެ ފުލުހުން ތަހުގީގަކަށް ވަނުމަކުން ރާއްޖެ ސަސްޕެންޑެއްނުވާނެ އެވެ. ސަބަބަކީ ފުލުހުން ވަނީ އެފްއޭއެމުގެ އިސްވެރިންނަށް ކުރެވޭ ޖިނާއީ ތަހުގީގުގެ ބޭނުމަށް ކަމަށްވާތީ އެވެ.

މިކަމަށް ހެކިދެނީ ފީފާގެ އިސްވެރިންނާ ދެކޮޅަށް ސްވިޒަލޭންޑްގެ ފުލުހުންނާއި އެމެރިކާގެ އެފްބީއައިއިން ހިންގި ތަހުގީގުތަކުންނެވެ. ވޯލްޑްކަޕް ފުޓްބޯޅަ މުބާރާތް 2018 އަދި 2022ގެ ބިޑް ކާމިޔާބުކުރަން މަކަރާއި ހީލަތް ހެދިކަން ދެ ފަރާތަކުން ތަހުގީގުކުރި އެވެ. އެއީ ސްވިޑަލޭންޑްގެ ޕްރޮސެކިއުޓަ ޖެނެރަލާ އެމެރިކާގެ އެފްބީއައިއިންނެވެ. ޝައްކުކުރީ ފީފާގެ އެއިރުގެ ރައީސް ސެޕް ބްލެޓާ އަށާއި އެޖަމާއަތުގެ އިސްވެރިންނަށެވެ.  

ފީފާގެ ލިޔެކިއުންތައް ޕްރޮސެކިއުޓަރުންގެ ބާރުގެ ދަށަށް ގެނެސް، ކަމުގެ އެންމެ އަޑިއަށް ފީނައިގަތުމަށްފަހު ބްލެޓާ އާއި އޭނާގެ ބައިވެރިންނާ ދެކޮޅަށް ދައުވާކުރަން ފެށުމުގެ ކުރިން އެމެރިކާ އާއި ސްވިޒަލޭންޑްގެ އަދި ފްރާންސްގެ ފުލުހުން ކުއްލި އޮޕަރޭޝަނެއް ހިންގި އެވެ. ފީފާގެ އިސްވެރިންގެ އޮފީސްތަކަށްވަދެ އެމީހުން ހައްޔަރުކުރީ ގާނޫނާ ގަވާއިދުތަކާ ހިލާފު އަމަލުތަކެއް ކުރާކަމުގެ ތަހުގީގަށް ބްލެޓާ ހައްޔަރުކުރީ ސްވިޒަލޭންޑްގެ ފުލުހުންނެވެ. ޕްލެޓިނީ ހައްޔަރުކުރީ ފްރާންސްގެ ފުލުހުންނެވެ.

މި މައްސަލަ ބްލެޓާ އާއި ޔޫއޭފާގެ ކުރީގެ ރައީސް މިޝޭލް ޕްލެޓިނީ ފީފާގެ އެތިކްސް ކޮމިޓީގައި އިސްތިއުނާފުކުރި އެވެ. އެކަމަކު ކާމިޔާބުނުވި އެވެ. ރާއްޖޭގައި މިފަދަ ހާލަތެއް މެދުވެރިވެއްޖެނަމަ ދެރަކަމަކީ އެތިކްސް ކޮމިޓީއަކީ އެތިކްސް ކޮމިޓީ އަކީ ކޮބާކަމާއި އެކޮމިޓީގެ މެމްބަރުން ވެސް ނޭނގޭތީ އެވެ.