އެމްޑީޕީގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ދެވަނަ ފަހަރަށް ރައްޔިތުންގެ މަޖިލީހަށް ވަނީ ހުށަހަޅާފައެވެ. އެމައްސަލަ 29 އޮކްޓޯބަރ ވާ އާދިއްތަ ދުވަހު ބޭއްވުމަށް ވަނީ އެޖެންޑާވެސް ކޮށްފައެވެ. މީގައި ފާހަގަކޮށްލަން ޖެހޭކަމަކީ މިއީ ނަޝީދު މަޖިލީހުގެ ރިޔާސަތުން ވަކިކުރަން އެމްޑީޕީން މަސައްކަތްކުރާ ފުރަތަމަ ފަހަރު ނޫންކަމެވެ. މީގެކުރިންވެސް އެމްޑީޕީން ވަނީ މިމައްސަލަ ކުރިޔަށް ގެންދިޔުމަށް މަސައްކަތްތަކެއްކޮށްފައެވެ.

ރައްޔިތުންގެ މަޖިލީހުގެ ސުޕަރ މެޖޯރިޓީ އޮތް އެމްޑީޕީން އޭރު ނަޝީދުގެ އިތުބާރު ނެތްކަމުގެ މައްސަލަ ހުށަހެޅިއިރު ނައިބު ރައީސް އީވާ އަބްދުﷲގެ އިތުބާރުގެ ނެތްކަމުގެ މައްސަލަވެސް ހުށަހެޅިއެވެ. އެއާއެކު މި ދެމައްސަލަވެސް ކުރިޔަށް ގެންދިޔަ ނުދީ ރިޔާސަތުގައި އިންނެވި ނަޝީދު ވަނީ "އިދާރީ މައްސަލަތައް" ނަންގަވާ ހިފަހައްޓަވާފައެވެ. މަޖިލީހުގެ ގަވާއިދުގެ ބޭނުންހިތްޕަވާ ދެ މައްސަލަވެސް ކުރިޔަށް ނުގެންދެވިއެވެ. އެގޮތުގައި އޮވެ ރިޔާސީ އިންތިޚާބުގެ ފުރަތަމަ ބުރު ނިމި ސިޔާސީ މަޝްރަހު ބަދަލުވެގެންދިޔައެވެ.

ރިޔާސީ އިންތިޚާބުގެ ދެވަނަ ބުރާއެކު އެމްޑީޕީން ނަޝީދާއި އީވާގެ އިތުބާރު ނެތްކަމުގެ މައްސަލަ ނެގިއެވެ. އެމްޑީޕީން އެމައްސަލަ ނެގި ސަބަބެއްކަމަށް ގިނަ ބަޔަކު ބުނަމުންދިޔައީ ދެވަނަ ބުރުގައި ޑިމޮކްރަޓުންގެ ތާއީދު އެމްޑީޕީއަށް ހޯދުމެވެ. ނަމަވެސް ދެވަނަ ބުރު އެމްޑީޕީއަށް ކުރިމަތިވި ބޮޑު ނާކާމިޔާބީގައި ޑިމޮކްރަޓުންގެ އަތެއް ވާކަމަށް އެމްޑީޕީން ގަބޫލުކުރެއެވެ. އެކަން އިންތިޚާބުގައި ކުރިމަތިވި ނާކާމިޔާބީ އާއެކު ބޭއްވި އެމްޑީޕީގެ ގައުމީ މަޖިލީހުގެ ޖަލްސާއަށް ބަލާލުމުންވެސް އެނގެއެވެ. ކުރިޔަށް އޮތް ފަސް އަހަރު އިދިކޮޅު ޕާޓީގެ ގޮތުގައި ސަރުކާރު ޖަވާބު ދާރީކުރުވުމަށް މިވަގުތަށް އެމްޑީޕީއަށް އޮތް އެންމެ މުހިންމު މަސައްކަތަކީ ރިޔާސަތުގެ ކޮންޓްރޯލް އެމްޑީޕީއަށް ނެގުންކަމަށް އެމްޑީޕީގެ މެމްބަރުން ގައުމީ މަޖިލީހުގައި ވަނީ ވިދާޅުވެފައެވެ.

މަޖިލީހުގެ މެޖޯރިޓީ އެމްޑީޕީ އަތުގައި އޮތްނަމަވެސް ރިޔާސަތު މިވަގުތު ކޮންޓްރޯލު ކުރަމުން ގެންދަނީ ޑިމޮކްރަޓުންނެވެ. ރިޔާސަތަކީ މަޖިލީހުގެ އެޖެންޑާ ކަނޑައަޅާ ފަރާތެވެ. އެނޫންވެސް އެތައް ބާރެއް މަޖިލީހުގެ ރައީސަށް ލިބިގެންވެއެވެ. އެހެންކަމުން މަޖިލީހުގެ ރިޔާސަތުގެ ކޮންޓްރޯލް އެމްޑީޕީއަށް ލިބުމަކީ އެޕާޓީއަށް މުހިންމުކަމެކެވެ. އެއާއެކު ދެން ފެނިގެންދިޔައީ ނަޝީދުގެ އިތުބާރުނެތްކަމުގެ މައްސަލަ ހުށަހެޅިގެންދިޔަތަނެވެ. ކުރީ ފަހަރާ ހިލާފަށް އެއްވެސް "ސިޔާސީ ޑްރާމާ" އެއް އަދި ނުފެނެއެވެ. އިތުބާރު ނެތްކަމުގެ މައްސަލައިގެ ނޯޓިސް ނަޝީދަށް ފޮނުވާ 14 ދުވަސް ހަމަވުމުން އެމައްސަލަ އެޖެންޑާވެސް ކޮށްފިއެވެ. މަޖިލީހުގެ އިތުބާރު ނެތްކަމުގެ މައްސަލައިގެ ކަންކަން ކުރިޔަށްގެންދިޔުމަށް އާންމު ކޮމިޓީން ވަގުތުވެސް ކަނޑައަޅައިފިއެވެ.

މިއީ ފުރަތަމަ މި މައްސަލަ ހުށަހެޅިއިރު ވީ ކަންކަމެއް ނޫނެވެ. މަޖިލީހުގައި ހިމެނޭ މެމްބަރުން ސިޔާސީ ޕާޓީތަކަށް ނިސްބަތްވާ އައި ގޮތަށް ބަދަލާއެކު ކޮމިޓީތައް އެކުލަވާނުލެވި އޮތުމާއެކު އެމައްސަލަ ކުރިޔަށްގެންދިޔުމަށް ވަގުތު ކަނޑައެޅޭނެ ގޮތެއް އޭރު ނެތެވެ. ނަމަވެސް މިފަހަރު އެހުރިހާ ކަމެއްވެސް ވެއްޖެއެވެ.

އިތުބާރު ނެތްކަމުގެ މައްސަލަ ހުށަހެޅުމާއެކު ޑިމޮކްރަޓުން ނަޝީދުވެސް ހިމެނިވަޑައިގަންނަވާ ގޮތަށް އެންމެ ބޮޑަށް ދެއްކެވި ވާހަކަފުޅަކީ އިތުބާރު ނެތްކަމުގެ މައްސަލަ ދެވަނަ ފަހަރަށް އެއް ދައުރެއްގެ ތެރޭގައި ހުށަހެޅުމުގެ ޖާގަ ނެތްކަމަށެވެ. ފުރަތަމަ މައްސަލަ ހުށަހެޅުމާއެކު އަނބުރާ ނެގީއެވެ. އެހެންކަމުން މިދައުރުގެ ތެރޭގައި ދެވަނަ ފަހަރަށް އެމައްސަލަ ހުށަނޭޅޭނެކަމަށް އަންނަނީ ބުނަމުންނެވެ. ނަމަވެސް މައްސަލަ ހުށަހަޅާ މައްސަލަ އެޖެންޑާވެސް ކޮށްފިއެވެ.

ނަޝީދުގެ އިތުބާރު ނެތްކަމުގެ މައްސަލަ އެމްޑީޕީން މިފަހަރު ހުށަހަޅާފައިވަނީ 49 މެމްބަރުންގެ ސޮޔާއެކުއެވެ. އެމްޑީޕީގެ ޕާލަމަންޓްރީ ގްރޫޕްގައި 55 މެމްބަރުން ތިއްބަވައެވެ. ރައްޔިތުންގެ މަޖިލީހުގެ ގަވާއިދުގައި ބުނާގޮތުން މަޖިލީހުގެ ރައީސްކަމުގެ މަގާމުގައި ހުރި މީހަކު މަގާމުން ވަކިކުރުމުގެ ގަރާރު ފާސްވާނީ އެކަމުގެ ވޯޓުގައި ބައިވެރިވެވަޑައިގަންނަވާ މެމްބަރުންގެ އަޣްލަބިއްޔަތުންނެވެ. މަޖިލީހުގައި 87 މެމްބަރުން ތިއްބަވާއިރު ހުރިހާ މެމްބަރުން ހާޒިރުވާ ޖަލްސާއެއްގެ އަޣްލަބިއްޔަތަކަށްވާނީ 44 ވޯޓެވެ.

ޑިމޮކްރަޓުން ގަބޫލުކުރާގޮތުގައި ނަޝީދުގެ އިތުބާރުނެތްކަމުގެ މައްސަލަ ފާސްކުރަން އެމްޑީޕީގެ ހުރިހާ މެމްބަރުން ވޯޓެއް ނުދެއްވާނެއެވެ. ނަމަވެސް އެމްޑީޕީ އޮތީ މިމައްސަލައިގައި ދޫދޭގޮތަށް ނޫންކަމަށް އެޕާޓީގެ ޕީޖީ ލީޑަރ މުހައްމަދު އަސްލަމް ވަނީ ވިދާޅުވެފައެވެ. ކޮންމެ ގޮތެއްވިއަސް އިދިކޮޅު ޕާޓީގެ ގޮތުގައި އެމްޑީޕީއަށް މަސައްކަތްކުރަން މަޖިލީހުގެ މެޖޯރިޓީ ލިބިފައިއޮވެމެ ރިޔާސަތުގެ ކޮންޓްރޯލު ނެގުމަކީ އެޕާޓީއަށް ވަރަށް މުހިންމު ކަމެކެވެ. އަނެއްކޮޅުން ކުރިޔަށް އޮތީ 20 ވަނަ ރައްޔިތުންގެ މަޖިލީހުގެ އިންތިޚާބެވެ. މިހުރިހާ ކަމަކަށް ބަލާއިރު އެމްޑީޕީ ވަރުގަދަ އިދިކޮޅު ސިޔާސީ ޕާޓީއެއްގެ ގޮތުގައި މަސައްކަތްކުރަން އެބަޖެހެއެވެ.