އިރު އިރުކޮޅާ އިނގިރޭސިވިލާތަށް، ޤައުމަށް އޮތީ ކޮން ކަމެއް؟

ސޯޝަލް މީޑިއާގައި ބަޔަކު ލިޔެފައި އޮތެވެ. އަނެއްކާ ވެސް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އިނގިރޭސިވިލާތަށް ވަޑައިގަންނަވާ ވާހަކަ އެވެ. އެ ވާހަކަ ލިޔެފައި އޮތް ދުވަހުގެ ރޭ، ރައީސް މުޢިއްޒު އިނގިރޭސިވިލާތަށް ފުރައި ވަޑައިގެންފި އެވެ. އަޅުގަނޑު ހިތަށް އެރި އެވެ.

ބަޔަކު ރުހުނަސް ނުރުހުނަސް، ރުޅިއަޔަސް ލޯބި ވިޔަސް، ރައީސް މުޢިއްޒު އަކީ ނިކަން ދަތުރު ކުރައްވަން ފޯރި ހުންނަވާ ރައީސް އެކެވެ. އެހެން ނުބުނާންވީ ސަބަބެއް ވެސް ނެތެވެ. ވެރިކަމަށް ދެ އަހަރުވީއިރު، ފަސް ފަހަރު އެ ވަޑައިގެންނެވީ އިނގިރޭސިވިލާތަށެވެ. ދެން ހުރި ދަތުރު ތަކުގެ ވާހަކަ އަދި ނުދައްކަމާ ހެއްޔެވެ؟

ރައީސް އޮފީހުން ބުނެފައިވާ ގޮތުގައި މިފަހަރު ރައީސް މުޢިއްޒު އިނގިރޭސިވިލާތަށް ވަޑައިގެންނެވީ ބައްދަލުވުމެއްގައި ބައިވެރިވެ ވަޑައިގަތުމަށެވެ. އެ ދަތުރުފުޅުގައި އޮތް ކޮންފަރެންސެއްގައި ރައީސް މުޢިއްޒު ބައިވެރިވެ ވަޑައިގެންފި އެވެ. އެކަމަކު، ހަގީގީ ސުވާލަކީ މި ދަތުރުފުޅު ތަކުން ޤައުމަށް ވަނީ ކޮން ފައިދާ އެއް ހެއްޔެވެ؟

އެހެން ޤައުމު ތަކުގެ ރައީސުން ވެސް އަވަށްޓެރި ޤައުމު ތަކަށް ވަޑައިގެން އުޅުއްވަ އެވެ. މާދުރަށް ދާނެ ކަމެއް ނެތެވެ. އަވަށްޓެރި ސްރީ ލަންކާ އަކީ އޭގެ މިސާލަކަށް ފުދޭނެ އެވެ. ސްރީ ލަންކާގެ ރައީސް ވެރިކަމަށް ވަޑައިގެންނެވި ފަހުން، ޤައުމުން ބޭރަށް ވަޑައިގެންނެވީ މަދު ފަހަރަކު އެވެ. ކޮންމެ ޤައުމަކަށް ވަޑައިގެންނެވި ނަމަވެސް، އެ ޤައުމަކުން ލަންކާ އަށް އެތައް އިންވެސްޓްމަންޓެއް ގެންނަވަ އެވެ. ބިލިއަން ޑޮލަރުގެ އިންވެސްޓްމަންޓް ހޯއްދަވަ އެވެ.

އެކަމަކު، ރާއްޖޭގެ ރައީސް ޤައުމު ތަކަށް ވަޑައިގެންފައި ވަނީ، އެނބުރި ރާއްޖެ ވަޑައިގަންނަވަނީ ހުސް އަތާ އެވެ. އެންމެ ޑޮލަރެއް ވެސް ޤައުމަށް ހޯދިފައި ނެތެވެ. ބޭރުގެ އެހީ އާއި، ހިލޭ އެހީގެ ގޮތުގައި އަދަދު ތަކެއް ހޯދުމަށް ސަރުކާރުން އަމާޒު ކަނޑައެޅި ނަމަވެސް، ރައީސް މުޢިއްޒު ކުރައްވާ ދަތުރުފުޅު ތަކުން ޤައުމަށް ވީ ފައިދާއެއް ފެންނާކަށް ނެތެވެ.

އަނެއްކާ ވެސް ފުރަ ފުރައިގެން ދާންވީ އެވެ. ވެރި ކަމުގެ ދެ އަހަރުގެ ތެރޭގައި އެންމެ ޤައުމަކަށް ފަސް ފަހަރު ވަޑައިގެންނެވީމާ، ދެން ދަންނަވާނީ ކީކޭ ހެއްޔެވެ؟ ރައްޔިތުންގެ ޓެކްސް ފައިސާ ތަޅާ ބުރުވާއިރު، ހިތަށް ހަމަ އެއްޗެއް ނާރަނީ ހެއްޔެވެ؟ ރަސްމީ ވިޔަސް، ނުރަސްމީ ވިޔަސް ރައީސްގެ ޚަރަދުތައް ބަލަހައްޓަނީ ރައްޔިތުންގެ ޓެކްސް ފައިސާ އިންނެވެ.

ޤައުމު ތަކަށް ވެސް ވަޑައިގަންނަވަންވީ އެވެ. އެއް ދަތުރުފުޅު ނިންމަވާފައި އެނބުރި ރާއްޖެ ވަޑައިގެން، ހަމަ ވެސް ނުޖެހެނީސް އަނެއްކާ ވެސް ފުރައި ވަޑައިގަންނަވަންވީ އެވެ. އެކަމަކު، މައްސަލަ އަކީ އެ ދަތުރު ތަކުން ޤައުމަށް ފައިދާ ނުވެ، ރައީސް އެނބުރި ހުސް އަތާ ވަޑައިގަންނަވާތީ އެވެ. ފޮރިން މިނިސްޓަރު ޑޮކްޓަރު ޚަލީލްމެން ކަހަލަ ބޭފުޅުން އަރިހުގައި ލައްވައިގެން، ރައީސް އަށް ހީފުޅު ވަނީ ދުނިޔެ ވަށައި ބުރު ޖަހަން ޓިކެޓެއް ލިބިވަޑައިގެން އުޅުއްވާ ހެންނެވެ.

އިނގިރޭސިވިލާތަށް ރައީސް ވަޑައިގަންނަވާ ކޮންމެ ފަހަރަކު ރަށު ތެރޭގައި މީހުން ކިޔަ އެވެ. އެ ވަޑައިގެންނެވީ އެ ޤައުމުގައި ކިޔަވާ ވިދާޅުވާން ހުންނެވި ދަރިފުޅު ގާތަށެވެ. ނުދާށެކޭ ވެސް ނުބުނަމެވެ. ދާންވީ އެވެ. ދަރިފުޅު ގާތަށް ވެސް ދާންވީ އެވެ. އެކަމަކު، ރައްޔިތުންގެ ޓެކްސް ފައިސާ އިން ޚަރަދު ކުރައްވާއިރު، ކޮންމެ ވެސް މިންވަރަކަށް ބަލާލަން ވާނެއޭ ހަމަ ހިތަށް އަރަ އެވެ.

ދިވެހި މިސާލު ބަހެއްގައި އޮވެ އެވެ. ދޭ މީހާ ދިނަސް، ކާ މީހާ ކާން ވާނީ ބަލައިގެންނެވެ. ތެދެކެވެ. ރައީސް މުޢިއްޒުގެ ޚަރަދުތައް ކުރުމާާއި، ރައީސްގެ ކަންކަމަށް ރައްޔިތުން ކިތަންމެ ޓެކްސް ފައިސާއެއް ދެއްކި ނަމަވެސް، ރައީސް ވެސް ތަން ކޮޅެއް ބަލާލައިގެން ކާ ނަމަތާ އެވެ.