އިންޑިޔާއިން ފަލަސްތީނަށް 38.5 ޓަނުގެ އެހީ ފޮނުވައިފި
22 އޮކްޓޯބަރު 2023 | އާދީއްތަ 06:17އިންޑިޔާއިން ފަލަސްތީނަށް ފޮނުވީ 6.5 ޓަނުގެ ބޭހާއި އަދި ކާރިސާތަކަށް ބޭނުންވާ 32 ޓަނުގެ އެހީ
އިންޑިޔާ އިން ޣައްޒާ އަށް އެހީ ފޮނުވުން
އިންޑިޔާ އިން ފަލަސްތީނުގެ ރައްޔިތުންނަށް 38.5 ޓަނުގެ އިންސާނީ އެހީ ފޮނުވައިފި އެވެ.
މިކަން ރިޕޯޓު ކުރައްވަމުން އިންޑިޔާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާނު އަރިންދަމް ބަގްޗީ ކުރެއްވި ޓްވީޓެއްގައި ވިދާޅުވީ އިންޑިޔާއިން ފަލަސްތީނަށް ފޮނުވީ 6.5 ޓަނުގެ ބޭހާއި އަދި ކާރިސާތަކަށް ބޭނުންވާ 32 ޓަނުގެ އެހީ ކަމަށެވެ.
މި އެހީގެ ތެރޭގައި ފުރާނަ ސަލާމަތް ކުރުމަށް ބޭނުންވާ ބޭހާއި، ސާޖިކަލް ސާމާނާއި، ޓެންޓާއި، ޓާޕަލިން، ސެނިޓަރީ ޔުޓިލިޓީސް އަދި ފެން ސާފުކުރާ ޓެބްލެޓް ފަދަ ތަކެތި ހިމެނެ އެވެ.
އަރިންދަމް ވިދާޅުވި ގޮތުގައި އިންޑިޔާގެ އެހީ ހިފައިގެން ދާ އިންޑިއާގެ އަސްކަރީ ވައިގެ އުޅަނދު ޣައްޒާގެ އެހީއާ އެކީ މިހާރު ދަތުރު ކުރަނީ މިސްރުގެ އަލް އަރިޝް އެއާޕޯޓަށް ކަމަށެވެ. އަދި ޣައްޒާއަށް އެ އެހީތައް ފޯރުކޮށްދިނުމަށް ބޭނުންކުރާނީ ޣައްޒާ އަދި މިސްރުގެ ރަފާހް ބޯޑަރު ކަމަށް ވެސް އަރިންދަމްގެ ޓްވީޓުގައި ވިދާޅުވި އެވެ.
ޔަހޫދީ އިސްރާއީލުގެ ޒަޔަނިސްޓުން ފަލަސްތީނުގެ ރައްޔިތުންނަށް ދެމުންދާ ހަމަލާތަކުގައި، ރޭގައި ދިން ހަމަލާތަކުގައި އެކަނިވެސް 9 މީހަކު ވަނީ ޝަހީދުކޮށްލައިފައެވެ. އެގޮތުން އަލްޖަޒީރާގައި ބުނެފައިވަނީ އިސްރާއީލުން ރޭގެ އެކި ވަގުތުތަކުގައި ޣައްޒާއަށް ބޮން އެޅި ތަންތަނުގެ ތެރޭގައި ޝޮޕިން ޕްލާޒާއެއް ހިމެނޭ ކަމަށެވެ. މި ހަމަލާގައި ޝަހީދުވި މީހުންގެ އަދަދު އިތުރުވެދާނެކަމަށް ބެލެވެއެވެ.
އިސްރާއީލުން ދެމުންގެންދާ ހަމަލާތަކުގެ ސަބަބުން 1 މިލިއަނަށް ވުރެ ގިނަ ފަލަސްތީނު ރައްޔިތުންގެ ގެދޮރު ގެއްލި، 4،400 އަށް ވުރެ ގިނަ ފަލަސްތީނު މީހުން ވަނީ ޝަހީދުކޮށްލައިފައި އެވެ.
