ޣައްޒާގެ އަލްޤުދުސް ހޮސްޕިޓަލް ވަގުތުން ހުސްކުރުމަށް އިޒްރޭލު ސިފައިން އަންގައިފި

ޣައްޒާގެ އަލްޤުދުސް ހޮސްޕިޓަލް "ވަގުތުން ހުސްކުރުމަށް" އަންގާ އިސްރާއީލު ސިފައިންގެ ފަރާތުން އިންޒާރު ލިބިފައިވާކަން ފަލަސްތީނުގެ ރެޑްކްރެސެންޓް ޖަމާޢަތުން ބުނެފިއެވެ. އެ ހޮސްޕިޓަލްގެ މެޑިކަލް ފެސިލިޓީގައި މިހާރު ވެސް 400 އަށް ވުރެ ގިނަ މީހުންނަށް ފަރުވާ ދިނުމާއި ގެދޮރު ގެއްލިފައިވާ 12،000 އާންމުންނަށް ބޯހިޔާވަހިކަން ފޯރުކޮށްދެ އެވެ.

މި ނުރައްކާތެރި ކަންކަމާ ގުޅިގެން ފަލަސްތީނުގެ ރެޑް ކްރެސެންޓުން ވަނީ ބައިނަލްއަގްވާމީ މުޖުތަމައުއަށް ވަގުތުން ވަގުތަށް ފިޔަވަޅުއެޅުމަށް ގޮވާލާފައެވެ. "އަލްއަހްލީ ހޮސްޕިޓަލްގައި ހިނގި ފަދަ އާ ޖަރީމާއެއް ހިންގިޔަ ނުދިނުމަށް އަވަސް އަދި ވިސްނުންތެރި ފިޔަވަޅުތަކެއް އެޅުމަށް ދުނިޔެއަށް ގޮވާލަން،" އެ ޖަމާޢަތުން ނެރުނު ބަޔާނެއްގައި ބުނެފައިވެ އެވެ.

ޣައްޒާގެ ޙާލަތު އަދިވެސް ނުތަނަވަސްވެ ހަލަބޮލިވެފައިވާއިރު، ހަމަނުޖެހުންތަކުގެ ތެރޭގައި ބަލިމީހުންނާއި ގެދޮރު ގެއްލިފައިވާ ފަރާތްތައް ހިމެނޭގޮތަށް އާންމުން ވަނީ ބޮޑު އިންސާނީ ކާރިސާއެއްގެ ތެރޭގައެވެ. އަލްޤުދުސް ހޮސްޕިޓަލަށް އިވެކުއޭޝަން އިންޒާރު ދިނުމުން އެ ތަނުގެ ތެރޭގައި ބޭސްފަރުވާއާއި ހިޔާވަހިކަން ހޯދާ މީހުންގެ ސަލާމަތާއި ރައްކާތެރިކަމާ މެދު ވަނީ ކަންބޮޑުވުން އުފެދިފައެވެ.

ފަލަސްތީނުގެ ރެޑް ކްރެސެންޓުން ހުށަހެޅި މި އިލްތިމާސަކީ އެ ސަރަހައްދުގައި މިހާރު ހިނގަމުންދާ ހަމަނުޖެހުންތަކުގެ ސަބަބުން ހާލުގައި ޖެހިފައިވާ މީހުންގެ ފުރާނަ ސަލާމަތްކުރުމަށް ބައިނަލްއަގްވާމީ ގޮތުން އަވަސް ފިޔަވަޅުތަކެއް ނާޅައިފިނަމަ ގިނަބައެއް ފުރާނަ ގެއްލިގެން ދާނެކަމުގެ ވަރުގަދަ އިންޒާރެކެވެ.