ބޭނުންފުޅުވަނީ އެކުގައި މަސައްކަތް ކުރަން، ވާނެބާ؟

މިހާތަނަށް ރާއްޖޭގެ ވެރިކަމަށް އެއްވެސް ޕާޓީއަކަށް އެކަނި އާދެވިފައެއް ނުވެއެވެ. ކޮންމެ ފަހަރަކު ވެސް އިންތިޚާބެއް ކާމިޔާބު ކުރުމަށް ކޯލިޝަންތައް ހަދައެވެ. މިފަހަރުވެސް ތަފާތެއް ނޫނެވެ. އިންތިޚާބީ ރައީސް ޑރ. މުޙައްމަދު މުއިއްޒު މިދިޔަ ސެޕްޓެމްބަރު މަހުގެ 30 ވަނަ ދުވަހު ބޭއްވި އިންތިޚާބު ކާމިޔާބު ކުރެއްވީ 3 ޕާޓީއެއްގެ ކޯލިޝަނާއެކުގައެވެ. އެއީ މުއިއްޒު ތަމްސީލު ކުރައްވާ ޕާޓީ، ޕީއެންސީ އާއި އިދިކޮޅުގެ މައި ޕާޓީގެ ގޮތުގައި އޮތް ޕީޕީއެމް އާއި ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު މުހައްމަދު ނާޒިމްގެ ޕާޓީ އެމްއެންޕީއެވެ. މުއިއްޒު ވިދާޅުވަނީ އެމަނިކުފާނު ބޭނުންފުޅުވަނީ މި ބޭފުޅުންނާއެކު ކުރިއަށް އޮތް ދައުރުގައި އެކުވެރިކަމާއެކު މަސައްކަތް ކުރުމަށް ކަމަށެވެ.

އައު ޤާނޫނު އަސާސީގެ ދަށުން ރާއްޖޭގައި މިހާތަނަށް ހަތަރު އިންތިޚާބެއް ބާއްވައި ހަތަރު ރައީސަކު ވަނީ ހޮވާފައެވެ. ކޮންމެ ވެރިއަކު ވެސް ކޯލިޝަނަކާއެކު ވެރިކަމަށް ވަޑައިގެންނެވިއިރު މިހާތަނަށް 3 ވެރިކަމުގެ ތެރެއިން ކޯލިޝަނެއް ދެމެހެއްޓުނު ހަމައެކަނި ވެރިއަކީ މިހާރުގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުއެވެ. އެމަނިކުފާނާ ދެކޮޅަށް ރިޔާސީ އިންތިޚާބުގައި ކޯލިޝަނުގެ ބައެއް ބޭފުޅުން މަސައްކަތް ކުރެއްވިއިރު ވެސް ދައުރު ނިންމަވާލައްވަނީ ކޯލިޝަނުގެ ބޭފުޅުންނާއެކުގައެވެ. އޭގެ ކުރީގެ ދެ ވެރިކަމެއް ދިވެހިން ވަނީ ދެކެފައެވެ. އެ ދެ ވެރިކަމުގައި ވެސް ކުޑަދުވަސްކޮޅެއްގެ ތެރޭގައި ކޯލިޝަން ރޫޅި މިތުރުން ވެގެންދިޔައީ ހަތުރުންނަށެވެ. ރައީސް ޞާލިހަށް ވެސް ކޯލިޝަން ދެމެހެއްޓެވުނީ އެމަނިކުފާނު ކެތްތެރިކަމުގެ ސަބަބުންނޭ ބުނުން ދޮގަކަށް ނުވާނެއެވެ.

މުއިއްޒުއަކީ ސިޔާސީ ދާއިރާއަށް އައު ބޭފުޅެއް ނޫނެވެ. އެމަނިކުފާނު ހިމެނިވަޑައިގެންނެވި ސަރުކާރެއް ވެސް ވަނީ ތަޖުރިބާ ކުރެވިފައެވެ. އެ ސަރުކާރުގެ ފަސް އަހަރު ވެގެންދިޔައީ ރާއްޖޭގައި އެންމެ ބައިބައިވުން ބޮޑު، ސިޔާސީ ގޮތުން ހަމަނުޖެހުންތައް ފެނިގެންދިޔަ ފަސް އަހަރަށެވެ. ޚިޔާލުތަފާތުވާ ކޮންމެ ސިޔާސީ ބޭފުޅެއް އިންނަން ޖެހުނީ ޖަލުގެ ކުޑަގޮޅީގައެވެ. އޭރުވެސް ކެބިނެޓުގައި މިހާރުގެ އިންތިޚާބީ ރައީސް އިންނެވިއެވެ.

ތެދެކެވެ. ވެރިކަމަށް ދެން ވަޑައިގަންނަވާނީ މުއިއްޒުއެވެ. ޔާމީނެއް ނޫނެވެ. ވެރިކަން ކުރައްވާނެ ގޮތް ތަފާތު ވެދާނެއެވެ. ނަމަވެސް އެކުގައި މަސައްކަތް ކުރުމަށް މުއިއްޒު އުއްމީދު ކުރައްވައި އެގޮތަށް ކޯލިޝަނުގެ އެންމެންނަށް ގޮވާލެއްވިއިރު މިހާރުވެސް އެ ކޯލިޝަނުގައި ރެނދުލާން ވަނީ ފަށައިފައެވެ. އަދި ހުވާ ނުކުރައްވައެވެ. ހާމަކަންބޮޑުގޮތެއްގައި ދެ "ވެރިން" އެއްބޭފުޅަކު އަނެއް ބޭފުޅަކަށް އަދި އެއް ޕާޓީން އަނެއް ޕާޓީއަށް ނުސީދާ ރައްދުތައް ދޭން ވަނީ ފަށައިފައެވެ. މުއިއްޒުގެ ކޯލިޝަނުގެ ގިނަ މީހުން ތާއީދު އޮތް ކުރީގެ ރައީސް ޔާމީނުގެ ބާރު ކަނޑުވާލުމަށް އެމަނިކުފާނާއި ޕީއެންސީން ކުރާ މަސައްކަތް ދަނީ ފެންނަމުންނެވެ.

އިންތިޚާބުވެވަޑައިގެންނެވިތާ މަސް ދުވަސް ވަނީއެވެ. އިދިކޮޅުގެ ލީޑަރުގެ ގޮތުގައި ސިފަ ކުރައްވާ ޔާމީން، އިންތިޚާބުގެ އެއް ދުވަސް ފަހުން ހުންނެވީ ގެކޮޅުގައެވެ. އަދިވެސް ދެ ބޭފުޅުން ރަސްމީކޮށް ބައްދަލު ކުރެއްވި މަންޒަރެއް ނުފެނެއެވެ. ގެކޮޅަށް ބަދަލު ކުރި ދުވަހު ދެ ބޭފުޅުން އެކުގައި ފެނުނު ގޮތަށް އަދި އެކުގައި ނުފެނެއެވެ. ނަމަވެސް ކޮންމެ ޕޯޑިއަމެއްގައި މުއިއްޒު ވިދާޅުވަމުން ގެންދަވަނީ އެމަނިކުފާނު އެންމެ އިސްކަމެއް ދެއްވާނެ އެއް ކަމަކީ ޔާމީން މިނިވަން ކުރުން ކަމަށެވެ.

ޔާމީން ބޭނުންފުޅުވަނީ އެމަނިކުފާނު މިނިވަން ކުރުމަށް ގޮވާލައި އަދިވެސް ޕީޕީއެމް/ޕީއެންސީގެ މެމްބަރުން މަގުމައްޗަށް ނުކުތުމަށެވެ. ނަމަވެސް އިންތިޚާބަށްފަހު އެ ހަރަކާތްތައް ވެސް ހުއްޓިއްޖެއެވެ. މުއިއްޒުގެ ހުރިހާ އެއްވުމެއްވެސް އޮންނަނީ ޔާމީނަށް ފެނިވަޑައިނުގަންނަވާނެހާ ދުރުގައި ސޯޝަލް ސެންޓަރުގައެވެ.

ދެން އޮތީ ކޯލިޝަނުގެ ތިންވަނަ ޕާޓީއެވެ. އެމްއެންޕީއެވެ. އެ ޕާޓީއަކީ އިންތިޚާބުގެ ފުރަތަމަ ބުރުގައި މުއިއްޒާ ވާދަކުރި ޕާޓީއެކެވެ. އެ ޕާޓީ މުއިއްޒުއާ ކޯލިޝަން ހެދީ ޤައުމުގެ ހައްގުގައި ކަމަށާއި ވެރިކަމުގައި އެއްވެސް ހިއްސާއެއް ބޭނުން ނުވާ ކަމަށް ވެސް ޕީޕީއެމް/ޕީއެންސީން މީގެ ކުރިން ވަނީ ބުނެފައެވެ. ނަމަވެސް މިހާރު އަޑުތައް ފެތުރޭ ގޮތުގައި އެމްއެންޕީން ވެސް ކޭކުން ބައެއް ބޭނުންވެއެވެ. ނުދީފިނަމަ އެ އެކުވެރިކަން ވެސް އޮންނާނެހެން ހިޔެއް ނުވެއެވެ.

އެމްޑީޕީން ވަކިވެ ކުރީގެ ރައީސް މުޙައްމަދު ނަޝީދު އުފެއްދެވި، ދަ ޑިމޮކްރެޓްސް ވެސް މި ކޯލިޝަނުގައި ހިމެނޭކަމަށްވެއެވެ. އައު ސަރުކާރުގައި އެ ޕާޓީގެ ހިއްސާ އޮންނާނެ ކަމަށް އެ ޕާޓީގެ މެމްބަރުން ވެސް ދަނީ ބުނަމުންނެވެ. މުއިއްޒު ވެސް ވަނީ އެފަދަ އިޝާރާތެއް ދެއްވާފައެވެ. އެހެންކަމުން ޕީޕީއެމުން، އެންމެ ޚިޔާލު ތަފާތު ކަމަށް މި ހުރިހާ ދުވަހު ބުނަމުން ދިޔަ ބޭފުޅުންނާއެކުވެސް މަސައްކަތް ކުރަން ޖެހޭނެއެވެ.

މި ހުރިހާ ބޭފުޅުންނަކީ ވެސް މީގެ ކުރިން އެކި ގޮތްގޮތުން ސިޔާސީ މަޝްރަހުގައި އެކުގައި މަސައްކަތް ކުރައްވައި، އެކުގައި ކުރިއަށްދިއުމުގައި ފެއިލް ވެފައި ތިއްބެވި ބޭފުޅުންނެވެ. ދެން އޮތް ސުވާލަކީ މިހާރު މަތިމަތިން ދައްކާ އެކުވެރިކަން ދެމެހެއްޓޭނެތޯއެވެ. ފަސް އަހަރުގެ ކޯލިޝަން ދެމެހެއްޓޭނެތޯއެވެ.