ރައީސް ޔާމީނާ މުއިއްޒު ބައްދަލުނުކުރެއްވުމަކީ ރާއްޖޭގެ ސިޔާސީ މަޝްރަހު "ގުޑާލާނެ" ކަމެއް: ފަލާހު
ޑރ. މުއިއްޒު ވެރިކަމަށް ވަޑައިގަންނަވަން ޓިކެޓު ވެސް ހޯއްދެވީ މަކަރުވެރި ގޮތަކަށް
މެމްބަރު މުހައްމަދު ފަލާހް ފަލަ ސުރުހީ ޕްރޮގްރާމުގައި ވާހަކަ ދައްކަވަނީ
އިންތިހާބީ ރައީސް ޑރ. މުހައްމަދު މުއިއްޒު އަކީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމުގެ ފޮޓޯފުޅުގެ ނިވަލުގައި ހުންނަވައިގެން ވެރިކަމަށް ވަޑައިގަތް ބޭފުޅެއް ކަމަށާއި އެހެން ނަމަވެސް ރައީސް ޔާމީނާ އެމަނިކުފާނު ބައްދަލުނުކުރެއްވުމަކީ ރާއްޖޭގެ ސިޔާސީ މަޝްރަހު "ގުޑާލާނެ" ކަމެއް ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު މުހައްމަދު ފަލާހު ވިދާޅުވެއްޖެ އެވެ.
"ރާއްޖެ ޓީވީ"ގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ފަލާހް ވިދާޅުވީ ޑރ. މުއިއްޒު ވެރިކަމަށް ވަޑައިގަންނަވަން ޓިކެޓު ވެސް ހޯއްދެވީ މަކަރުވެރި ގޮތަކަށް ކަމަށާއި، އެހެން ނޫން ނަމަ ޔާމީނާ މުއިއްޒުއާ ދެމެދު މިފަދަ މައްސަލަތަކެއް ނުޖެހޭނެ ކަމަށެވެ.
ފަލާހް ވިދާޅުވީ ފޮޓޯ ޖައްސަވައިގެން ވެރިކަމަށް ވަޑައިގެންނަވައިފައި، ރައީސް ޔާމީނާ ބައްދަލުނުކުރެވުމަކީ މައްސަލައެއް ކަމަށެވެ.
ފަލާހް ވިދާޅުވީ މިއަދު ފެންނަ ފެނުމަށް ޕީޕީއެމް އަދި ޕީއެންސީ އެކުގައި އޮތް ކަމަށް ފެނި، ޕީއެންސީގެ ކެންޑިޑޭޓަކު ވެރިކަމަށް ހޮވެވަޑައިގެންނެވި ނަމަވެސް ޕީއެންސީ އަކީ މެމްބަރުންގެ ގޮތުން ބޮޑު ޕާޓީއެއް ނޫން ކަމަށެވެ. އެގޮތުން ފަލާހު ވިދާޅުވީ ޑރ. މުއިއްޒު ވެރިކަމަށް ވަޑައިގެންނެވީ ޕީޕީއެމްގެ މެމްބަރުންގެ ގިނަ ވޯޓުން ކަމަށާއި، އެވަރުން ވެސް ޔާމީނާ މުއިއްޒު ބައްދަލު ނުކުރައްވާ ކަމަށެވެ.
މީގެ އިތުރުން ފަލާހު ވިދާޅުވީ ޑރ. މުއިއްޒު މިހާރު ދައްކަވާ ވާހަކަތަކުން ވެސް ރައީސް ޔާމީން މިނިވަން ނުކުރައްވާނެ ކަން އެނގޭ ކަމަށެވެ.
