ރާއްޖެއަށް ލިބިފައިވާ 1000 ހައްޖު ކޯޓާގެ ތެރެއިން 700 ހައްޖު ކޯޓާ ހައްޖު ކޯޕަރޭޝަނަށްދީފައިވޭ
ސޮދަގާތް ފައުންޑޭޝަނުން ހައްޖަށް ގެންދާ ފަރާތްތަކާއި މެޑަމް ފާތުމަތު އިބްރާހިމް ބައްދަލުކުރައްވާ
ރައީސުލްޖުމްހޫރިއްޔާގެ އަނބިކަނބަލުން، ފާތިމަތު އިބްރާހިމްގެ ސޮދަގާތް ފައުންޑޭޝަނަށް މި އަހަރުވެސް 50 ހައްޖު ކޯޓާ ދިނުމަށް އިސްލާމިކް މިނިސްޓްރީން ނިންމައިފި އެވެ.
ރާއްޖެ އެމްވީއަށް އިތުބާރުހުރި މަސްދަރުތަކުން އެނގިފައިވާގޮތުގައި ރައީސް އަބްދުﷲ ޔާމީންގެ އަނބިކަނބަލުން ހިންގަވާ ސޮދަގާތް ފައުންޑޭޝަނަށް ހައްޖު ކޯޓާގެ ތެރެއިން 50 ކޯޓާ ދިނުމަށް ނިންމާފައިވަނީ ހައްޖު ކޯޕަރޭޝަންގެ ތެރެއިންނެވެ. އެގޮތުން ރާއްޖެއަށް ލިބިފައިވާ 1000 ހައްޖު ކޯޓާގެ ތެރެއިން 700 ހައްޖު ކޯޓާ ހައްޖު ކޯޕަރޭޝަނަށްދީފައިވާއިރު، އޭގެތެރެއިން 200 ކޯޓާ ވަނީ އިސްލާމިކް މިނިސްޓްރީއަށް ނަގައިފަ އެވެ. އަދި ސަދަޤާތް ފައުންޑޭޝަނަށް ދީފައިވަނީ އެ 200 ކޯޓާގެ ތެރެއިން 50 ކޯޓާ އެވެ.
މިކަމާއި ގުޅޭގޮތުން އިސްލާމިކް މިނިސްޓްރީގެ ބަހެއް ހޯދުމަށް އިސްލާމިކް މިނިސްޓަރ ޑރ. އަހުމަދު ޒިޔާދު ބާގިރަށް ތަކުރާރުކޮށް ގުޅުމުންވެސް އޭނާ ފޯނަށް ޖަވާބުދެއްވާފައެއް ނުވެ އެވެ. އަދި އިސްލާމިކް މިނިސްޓްރީގެ އެކި ބޭފުޅުންނަށް ގުޅުމުންވެސް އެއްވެސް ބޭފުޅަކު ފޯނަށް ޖަވާބުދެއްވާފައެއް ނުވެއެވެ.
ރައީސުލްޖުމްހޫރިއްޔާގެ އަނބިކަނބަލުން، ފާތިމަތު އިބްރާހިމްގެ ސޮދަގާތް ފައުންޑޭޝަނުން ހައްޖަށް ގެންދާ ފަރާތްތަކާއި، އެކަމަނާ މިއަދު ބައްދަލުކުރައްވާފައިވާއިރު، އެ ރަސްމިއްޔާތުގައި އިސްލާމިކް މިނިސްޓަރުވެސް ބައިވެރިވެވަޑައިގެންފައިވެއެވެ. އެ ރަސްމިއްޔާތު ކުރިއަށްގެންގޮސްފައިވަނީ ސަރުކާރުގެ ކެމްޕޭން ހަރަކާތްތައް ކުރިއަށްގެންދާ މުލިޔާގޭގައެވެ.
މިދިޔަ އަހަރުވެސް ސޮދަގާތް ފައުންޑޭޝަނަށް 50 ކޯޓާ ދީފައިވާއިރު، ހައްޖު ކޯޓާ އެ ފައުންޑޭޝަނަށް ދީފައިވަނީ އެއްވެސް ގޮތަކަށް އިއުލާންކުރުމެއް، ބީލަމެއްވެސް ބޭއްވުމެއް ނެތި އެވެ.
