ޖުޑިޝަރީގެ މުހިންމު ދެ ބިލެއް ފާސްނުވެ، އަނބުރާ ކޮމެޓީއަށް ފޮނުވައިފި
18 އޮކްޓޯބަރު 2023 | ބުދަ 10:07ގާނޫނީ ފަންނުގެ ގާނޫނަށް އިސްލާހު ގެނައުމުގެ ބިލަކީ މީގެ 11 މަސް ކުރިން ތަޅުމަށް ފޮނުވުމަށް ޖުޑިޝަރީ ކޮމެޓީ އިން ފާސްކުރި ބިލެއް
ރައްޔިތުންގެ މަޖިލީހުގެ ޖަލްސާގެ ތެރެއިން
ގިނަ ދުވަސްތަކެއް ވަންދެން މަސައްކަތް ހުއްޓިފައި އޮތް ޖުޑިޝަރީގެ މުހިންމު ދެ ބިލެއް ފާސްނުކުރުމަށް ނިންމައި ރިވިއު އަށް އަނބުރައި ޖުޑިޝަރީ ކޮމެޓީ އަށް ފޮނުވުމަށް ރައްޔިތުންގެ މަޖިލީހުން ނިންމައިފި އެވެ.
މަޖިލީހުގެ މިއަދުގެ ޖަލްސާގައި ވޯޓަށް އެހި 4 ބިލުގެ ތެރެއިން ޖުޑިޝަރީ ކޮމެޓީއަށް އަނބުރައި ފޮނުވުމަށް ނިންމީ 2 ބިލެކެވެ. އެއީ:
މީގެ ތެރެއިން ގާނޫނީ ފަންނުގެ ގާނޫނަށް އިސްލާހު ގެނައުމުގެ ބިލު ފާސްކުރުމާ ދެކޮޅަށް ވޯޓު ދިނީ 34 މެމްބަރުންނެވެ. އެ ބިލާ އެއްކޮޅަށް ވޯޓު ދިނީ އެންމެ 9 މެމްބަރުންނެވެ.
އެ ބިލު އަނބުރާ ޖުޑިޝަރީ ކޮމެޓީ އަށް ފޮނުވުމަށް ފާސްވީ ޖުމްލަ ވޯޓުގައި ބައިވެރިވި 41 މެމްބަރުންގެ ތެރެއިން 35 މެމްބަރުންގެ ވޯޓުންނެވެ. ކޮމެޓީ އަށް އަނބުރާ ފޮނުވުމަށް 6 މެމްބަރަކު ވޯޓު ދިނެވެ.
މި ބިލަކީ މީގެ 11 މަސް ކުރިން ތަޅުމަށް ފޮނުވުމަށް ޖުޑިޝަރީ ކޮމެޓީ އިން ފާސްކުރި ބިލެކެވެ. އެގޮތުން މި ބިލުގައި ބުނީ ފަނޑިޔާރުކަމުގެ މަގާމާ އެކަށީގެންނުވާ އަމަލެއް ފަނޑިޔާރަކު ކޮށްގެން، ފަނޑިޔާރުކަމުގެ މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހެޅުމަށް ޖޭއެސްސީން ނިންމާ ހާލަތުގައި، އެ ފަނޑިޔާރެއްގެ ގާނޫނީ ވަކީލުކަން ކުރުމުގެ ހުއްދައާ މެދު އަމަލުކުރެވޭނެ އުސޫލުތައް ގާނޫނުގައި ބަޔާންކުރެވެން ވާނެ ކަމަށެވެ.
އެގޮތުން އެ އިސްލާހުގައި ވަނީ ފަނޑިޔާރުކަމުގެ މަގާމުގައި ހުރި މީހަކު ކުރި އަމަލަކީ، އޭގެ ސަބަބުން ފަނޑިޔާރުކަމުގެ މަގާމުގެ އަދި ޝަރުއީ ދާއިރާގެ އިތުބާރުގެއްލޭފަދަ ބޮޑު އަމަލަކަށް ޖޭއެސްސީން ކަނޑައަޅާފައިވާ އަމަލެއްކަމުގައި ސާބިތުވެއްޖެނަމަ، ވަކީލުކަމުގެ ހުއްދަ ބާތިލްކުރެވޭނެކަމަށެވެ. އަދި ދެވަނަ ފަހަރަށް ވަކީލުކަން ކުރުމުގެ ފުރުސަތެއް މިފަދަ ކުށެއް ސާބިތުވެއްޖެނަމަ އެވަކީލަކަށް ނުލިބޭނެކަމަށްވެސް އެ އިސްލާހުގައިވެއެވެ.
މީގެ އިތުރުން، ދިވެހި ރާއްޖޭގެ ފަނޑިޔާރުންގެ ގާނޫނަށް އިސްލާހު ގެނައުމުގެ ބިލު ކޮމެޓީން ފާސްކުރީ މި އަހަރުގެ ފެބްރުއަރީ މަހު އެވެ.
މި ބިލުގައިވާ ގޮތުން ވިހެއުމާ ގުޅިގެން ނުވަތަ ދަރިޔަކު ލިބުމާ ގުޅިގެން ފަނޑިޔާރުންނަށް ވެސް ވަކި ހާއްސަ ޗުއްޓީއެއް ލިބޭނެއެވެ. އެގޮތުން އަންހެން ފަނޑިޔާރެއް ނަމަ ހަ މަސް ދުވަހުގެ ޗުއްޓީއެއް އަދި ފިރިހެން ފަނޑިޔާރެއް ނަމަ އެއް މަސް ދުވަހުގެ ޗުއްޓީ ލިބޭ ގޮތަށް ބިލުގައި ބަޔާންކޮށްފައިވެއެވެ.
މި ބިލު ފާސްކުރުމާ ދެކޮޅަށް ވޯޓުގައި ބައިވެރިވި 39 މެމްބަރުންގެ ތެރެއިން 31 މެމްބަރަކު ވޯޓު ދީފައިވާއިރު, ފާސްކުރުމަށް ވޯޓު ދީފައިވަނީ ޖުމްލަ 8 މެމްބަރުން ނެވެ.
މި ބިލު ވެސް އަނބުރައި ކޮމެޓީއަށް ފޮނުވާފައިވާއިރު، މި ބިލު ކޮމެޓީއަށް ފޮނުވީ 35 މެމްބަރުންގެ ވޯޓުންނެވެ.
