ޣައްޒާގެ ހޮސްޕިޓަލެއްގައި ހިންގި ގަތުލުއާންމު ކުށްވެރިކޮށް އިސްރާއީލުގެ ޖަރީމާތައް ހުއްޓުވުމަށް ބައިނަލްއަގުވާމީ މުޖުތަމައަށް އަދާލަތުން ގޮވާލައިފި
18 އޮކްޓޯބަރު 2023 | ބުދަ 08:11ގިނަ އަދަދެއްގެ ކުޑަކުދިންނާއި އަންހެނުން ހިމެނޭހެން އެތައް ބަޔަކު ޝަހީދުކޮށްފައިވޭ
އަދާލަތު ޕާޓީގެ ބައްދަލުވުމެއްގެ ތެރެއިން
އިސްރާއީލުން ޣައްޒާގެ އަލް-އަހްލީ އަރަބް ހޮސްޕިޓަލުގައި ހިންގި ގަތުލުއާންމު ކުށްވެރިކޮށް އިސްރާއީލުގެ ޖަރީމާތައް ހުއްޓުވުމަށް ބައިނަލްއަގުވާމީ މުޖުތަމައަށް އަދާލަތު ޕާޓީން ގޮވާލައިފިއެވެ.
އަދާލަތު ޕާޓީން ބުނީ މުސްލިމުންގެ ފުރަތަމަ ގިބުލަކަމުގައިވާ އަލްމަސްޖިދުލް އަޤްޞާ ހިމެނޭ ފަލަސްޠީނާ ދެކޮޅަށް، އެ ބިމަށް ގަދަކަމުން ވެރިވެގެން އުޅޭ ޣައިރުގާނޫނީ ސިހްޔޫނީ ދައުލަތުން ހިންގާ ރަހުމެއްނެތް ލާއިންސާނީ އިސްތިއުމާރީ އުދުވާން އެޕާޓީން އެންމެ ހަރުކަށި އިބާރާތުން ކުށްވެރިކުރާކުރުން އަނެއްކާވެސް ތަކުރާރުކުރާ ކަަމަށެވެ.
އަދާލަތުން ބުނީ ވަކިން ޚާއްސަކޮށް މެދުނުކެނޑި 11 ދުވަސް ވަންދެން ވައިގެ މަގުން ހަމަލާދީ ފަލަސްތީނުގެ ޣައްޒާ ސުންނާފަތިކޮށް، ގިނަ އަދަދެއްގެ ކުޑަކުދިންނާއި އަންހެނުން ހިމެނޭހެން އެތައް ބަޔަކު ޝަހީދުކޮށް، އެތައްހާސް ބަޔަކު ޒަޚަމްކޮށް، އެތަނަކީ އިންސާނީ ދިރުމަށް އެކަށީގެންނުވާ ތަނަކަށް ހަދާ، ހާލުގައި ޖެހިފައިވާ މީހުންނަށް ފެނާއި ކާނާއާއި ބޭސްފަރުވާއާއި ދިރިއުޅުމަށް ބޭނުންވާ އަސާސީ ވަސީލަތްތައް ފޯރުކޮދިނުމަށް ހުރަސްއެޅުމަށްފަހު އިސްރާއީލުގެ އަސްކަރިއްޔާއިން ޣައްޒާގެ އަލް-އަހްލީ އަރަބް ހޮސްޕިޓަލަށް ބޮންއަޅާ 500 އަށްވުރެ ގިނަ މީހުން ޝިހީދުކޮށްލުމަކީ އެއްވެސް މިންވަރަކަށް ދެބަސްވެ ދެކޮޅުހެދެންނެތް ކަމެއް ކަމަށެވެ. އަދި ބައިނަލްއަގުވާމީ ގާނޫނުތަކާއި ޚިލާފު ހަނގުރާމައިގެ ޖަރީމާއެއް ކަމަށް އަދާލަތުން ބުނެފައިވެއެވެ.
މީގެ އިތުރުން އިސްރާއީލުގެ މި ރަހުމެއްނެތް ޖަރީމާތައް ހުއްޓުވާ، ހަނގުރާމައިގެ ޖަރީމާތައް ހިންގާ ފަރާތްތަކާ ދެކޮޅަށް ފިޔަވަޅުއަޅާ ބައިނަލްއަގުވާމީ މުއައްސާކުން އެ މައްސަލަތައް ބަލާ ފިޔަވަޅު އެޅުމަށްވެސް އެޕާޓީން ވަނީ ގޮވާލާފައެވެ. އަދި އިސްރާއީލުގެ އުދުވާނަށް ވާގިވެރިވެ ކުށެއްނެތް ކުޑަކުދިންމެރުމަށް އެހީތެރިވެ ހަތިޔާރާއި މާލީ އެހީތެރިކަން ފޯރުކޮށްދޭ ހުޅަނގުގެ ގައުމުތަކުން ވަގުތުން އެކަން ހުއްޓާލުމަށް ވެސް އަދާލަތުން ގޮވާލާފައެވެ.
