އަދާލަތު ޕާޓީއާއި އަލުން ގުޅިވަޑައިގަތުމަށް މިނިސްޓަރ ޝަހީމް ނިންމަވައިފި
އަދާލަތު ޕާޓީގެ ލީޑަރޝިޕަށް ވާދަކުރުމަށް ކެބިނެޓް ދޫކުރާކަށް ނުޖެހޭނެ
އިސްލާމީކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް އަލީ ސަޢީދު
އަދާލަތު ޕާޓީގެ ސީނިއަރ އެއް މުއައްސިސްގެ ހައިސިއްޔަތުން އަހަރުތަކެއް ވަންދެން އެޕާޓީއަށް ޚިދުމަތްކޮށްފައިވާތީ އަލުން ޕާޓީއާއި ގުޅިވަޑައިގަތުމަށް އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ނިންމަވައިފި އެވެ.
މިނިސްޓަރ ޝަހީމް ބުދަ ދުވަހު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މިއަހަރު ފަހުކޮޅުގައި އަދާލަތު ޕާޓީގެ އައު ރައީސަކު ހޮވުމަށް ބާއްވާ އެތެރޭގެ އިންތިޚާބުގައި ވާދަކުރަން ނިންމާފައިވާ ކަމަށެވެ. މިކަމާއި ގުޅިގެން އަދާލަތު ޕާޓީގެ ރައީސް އަދި ކުރީގެ ހޯމް މިނިސްޓަރ އިމްރާން އަބްދުﷲ އެކްސްގައި ވިދާޅުވެފައިވަނީ ރައީސް މުއިއްޒުގެ ދޯހަޅިކަމާއި ހުރެ ޤައުމު ވެއްޓިފައި މިއޮތް ޙާލަތުން ސަލާމަތްކުރުމަށް، ރައީސް މުއިއްޒުގެ ކެބިނެޓް ދޫކުރައްވާ ޚާލިސްކަމާއެކު މިނިސްޓަރ ޝަހީމް ޢަދާލަތު ޕާޓީގެ ލީޑަރޝިޕަށް ވާދަކުރައްވާނަމަ އެކަމަށް އުފަލާއެކު މަރުޙަބާ ދަންނަވާ ކަމަށެވެ.
މިކަމަށް ރައްދު ދެއްވައި މިނިސްޓަރ ޝަހީމް ވިދާޅުވެފައިވަނީ އަދާލަތު ޕާޓީގެ ލީޑަރޝިޕަށް ވާދަކުރުމަށް ކެބިނެޓް ދޫކުރާކަށް ނުޖެހޭނެ ކަމަށާއި ޕާޓީގެ މެމްބަރެއް މަޤާމެއްގައި ހުންނަން ދުސްތޫރު މަނާ ނުކުރާ ކަމަށެވެ.
އަދި އަދާލަތު ޕާޓީގެ މެމްބަރުން އޭނާ އިންތިޚާބު ކުރައްވައިފިނަމަ ކޮންގްރެސް އިން ނިންމާ ގޮތަކަށް ޕާޓީއާއިގެން ކުރިއަށްދާނެ ކަމަށްވެސް މިނިސްޓަރ ޝަހީމް ވިދާޅުވި އެވެ.
މިނިސްޓަރ ޝަހީމްގެ މިނިންމެވުމަށް ގިނަ އިލްމުވެރިން ދަނީ ޝަހީމްއަށް މަރުހަބާ ދަންނަވަމުންނެ އެވެ.
އަދާލަތު ޕާޓީގެ އިސް މަގާމުތަކެއް ފުރުއްވާފައިވާ ޝަހީމް އެ ޕާޓީއިން ވަކިވެވަޑައިގަތީ 14 ފެބްރުއަރީ 2017 ގައެވެ. އަދި 2018 ވަނަ އަހަރުގެ ރިޔާސީ އިންތިޚާބުގައި އޭރުގެ ރައީސް ޔާމީންގެ ރަނިންމޭޓެއްގެ ގޮތުގައި ޝަހީމްވަނީ ވާދަކުރައްވާފަ އެވެ.
9049 މެމްބަރުން ތިބި އަދާލަތު ޕާޓީ އުފެއްދީ 18 އޮގަސްޓް 2005 ވަނަ އަހަރެވެ.
