ޙާލުގައި ޖެހޭ ވަގުތު ސަލާމަތްވާނީ، ޙާލަތު ބަދަލު ކުރަން ގުޅިގެން މަސައްކަތް ކޮށްގެން: އިމްރާން

ރާއްޖޭގެ ރައްޔިތުން ނިކަމެތިވެ. ޤައުމު ޙާލުގައި ޖެހެންދާ ވަގުތުގައި، ސަލާމަތްތެރިކަން ހޯދޭނީ ރައްޔިތުން ގުޅިގެން ނިކުމެ އެ ޙާލަތު ބަދަލު ކުރަން މަސައްކަތް ކޮށްގެން ކަމަށް، އަދާލަތު ޕާޓީގެ ރައީސް ޝެއިޚް އިމްރާން ޢަބްދުﷲ ވިދާޅުވެއްޖެ އެވެ.

ނިމިދިޔަ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ހޯމް މިނިސްޓަރުކަން ވެސް ކުރައްވާފައިވާ އިމްރާން މިހެން ވިދާޅުވީ، ބުރާސްފަތި ދުވަހު އެކްސްގައި ކުރެއްވި ޕޯސްޓެއްގަ އެވެ.

އެގޮތުން އިމްރާން ވަނީ ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ވެރިކަމުގެ ދުވަސްވަރު ކަންތައް ހިނގައި ދިޔަ ގޮތުގެ ވާހަކަ ފާހަގަ ކުރައްވާފައި އެވެ.

އޭނާ ވިދާޅުވީ، ގިނަ ބައެއްގެ ބައިވެރި ވުމާއެކު ހެޔޮ ވެރިކަމެއް އުފައްދަން 2018 ވަނަ އަހަރު ފުރުސަތު ލިބުނީ، 2015 ވަަނަ އަހަރުގެ މޭ ޑޭ އިން ފެށިގެން ގިނަ ބަޔަކު ގުޅިގެން ކުރި މަސައްކަތުގެ ނަތީޖާ އިން ކަމަށެވެ.

އިމްރާން ވިދާޅުވީ އެ ދުވަހާއި، އޭގެ ފަހުން ހިންގި ޙަރަކާތްތަކުގެ ބައިވެރިންނަށް އަދި ވެސް މަރުޙަބާ ދަންނަވައި، ޝުކުރު ދަންނަވާ ކަމަށެވެ.

އެކަމަށް އިޝާރާތް ކުރައްވައި އިމްރާން ވިދާޅުވީ، ދިވެހި ޤައުމުގެ ޙައްގުގައި އަނެއްކާ ވެސް އެފަދަ އިހުތިޖާޖުތަކެއް ފެންނަން ޖެހޭ ހިސާބަށް ކަންކަން ދާ ކަމުގެ އިޙުސާސް ކުރެވޭ ކަމަށެވެ.

މީގެ ކުރިން 2015 ވަނަ އަހަރު މޭ ޑޭގެ ނަމުގައި ބޭއްވި ބޮޑު އެއްވުން އިންތިޒާމު ކުރުމުގައި އިސްކޮށް އުޅުއްވި އެއް ފަރާތަކީ އިމްރާން އެވެ. އޭރު އިމްރާން ވަނީ ހައްޔަރުކޮށް، ޖަލަށް ވެސް ލައިފަ އެވެ.