ހޮސްޕިޓަލަށް ދިން ޓެރަރިސްޓް ހަމަލާއާއެކު އުރުދުން އިން ބައިޑަންގެ ސަމިޓް ކެންސަލްކޮށްފި
18 އޮކްޓޯބަރު 2023 | ބުދަ 04:58އުރުދުންގެ ރަސްގެފާނު ވަނީ ހަމަލާގެ ޒިންމާ އިސްރާއިލުން ނަގަންޖެހޭނަކަމަށް ވިދާޅުވެފައި
ޣައްޒާގެ އަލް އަހްލީ ހޮސްޕިޓަލް ސުންނާފަތިކޮށްލާފައި
އެމެރިކާގެ ރައީސް ޖޯ ބައިޑަން އާއި މިސްރާއި ފަލަސްތީނުގެ ލީޑަރުންނާ އެކު ޣައްޒާއާ ބެހޭ ގޮތުން މަޝްވަރާ ކުރުމަށް ބުދަ ދުވަހު އައްމާނުގައި ބާއްވަން ހަމަޖެހިފައިއޮތް ސަމިޓް އުރުދުން އިން ކެންސަލްކޮށްފި ކަމަށް އެގައުމުގެ ފޮރިން މިނިސްޓަރު އައިމަން ސަފާދީ ވިދާޅުވެއްޖެއެވެ.
ސަފާދީ ވިދާޅުވީ މި ބައްދަލުވުން ބާއްވާނީ "ފަލަސްތީނުންނާ ދެކޮޅަށް ހިންގާ ހަނގުރާމައާއި ގަތުލުއާންމުތައް" ނިމުމަކަށް ގެނައުމަށް ޕާޓީތަކުން އެއްބަސްވެވޭނެ ދަނޑިވަޅެއްގައި ކަމަށެވެ. އޭނާ ވަނީ ސަރަހައްދީ ހަމަނުޖެހުން އުފައްދާ އަނދަވަޅަކަށް ވައްޓާލުމަށް އިސްރާއިލާއި، އެގައުމުގެ އަސްކަރިއްޔާއިން މަސައްކަތް ކުރަމުންދާކަމަށް ވިދާޅުވެފައެވެ.
ބައިޑަން އިސްރާއީލަށް ދަތުރުފުޅެއް ކުރައްވައި، ފަހުން އުރުދުންއަށް ވަޑައިގަންނަވާނެ ކަމަށް ބެލެވުނު އިރު، އުރުދުންގެ އޮފިޝަލުން ބުނާ ގޮތުގައި މިސްރުގެ ރައީސް އަބްދުލް ފައްތާހު އަލް ސީސީ އާއި ފަލަސްތީނުގެ ރައީސް މަހްމޫދު އައްބާސް ބައްދަލު ކުރައްވާނެއެވެ.
އެމެރިކާގެ ރައީސް މިހާރު ވަޑައިގަންނަވާނީ ހަމައެކަނި އިސްރާއީލަށް ކަމަށާއި އުރުދުނަށް ކުރައްވާ ދަތުރުފުޅު ފަސްކުރައްވާނެ ކަމަށް ވައިޓް ހައުސްގެ އޮފިޝަލަކު އަންގާރަ ދުވަހު ބައިޑަން ފުރާވަޑައިގަތުމާއެކު ވިދާޅުވެފައިވެއެވެ.
އުރުދުންގެ ރަސްގެފާނު އަބްދުﷲ ބާއްވަވަން ނިންމެވީ ހަތަރު ފަރާތް ހިމެނޭ ސަމިޓެއް ކަމަށާއި އެ ސަމިޓުގެ އެޖެންޑާގައި އޮތީ އިންސާނީ ކާރިސާއެއް ހުއްޓުވުމަށާއި އިސްރާއީލާ އެކު އުފެދޭ ހަމަނުޖެހުންތަކަށް ހައްލެއް ހޯދައިދީ ޣައްޒާއަށް އިންސާނީ އެހީތެރިކަން ފޯރުކޮށްދިނުމުގެ މަގު ހޯދުމެވެ.
ރަސްގެފާނު އަބްދުﷲ ވަނީ އަންގާރަ ދުވަހު ޣައްޒާގެ ހޮސްޕިޓަލު ގޮއްވާލި ގޮވުމުގެ ޒިންމާ އިސްރާއީލުން އުފުލަން ޖެހޭނެކަމަށް ވިދާޅުވެ، އެއީ "އިންސާނިއްޔަތަށް ލަދުވެތި ކަމެއް" ކަމަށް ވިދާޅުވެ، އިސްރާއީލުން ޣައްޒާއަށް ދޭ އަސްކަރީ ހަމަލާ ވަގުތުން ހުއްޓާލުމަށް ގޮވާލައްވާފައެވެ.
ފަލަސްތީނުގެ އޮފިޝަލުން ބުނާ ގޮތުގައި ހޮސްޕިޓަލު ގޮއްވާލާފައިވަނީ އިސްރާއީލުން ވައިގެ މަގުން ހަމަލާދީގެންނެވެ. އިސްރާއީލުގެ އޮފިޝަލުން ބުނެފައިވަނީ މި ހާދިސާ ހިނގާފައިވަނީ ފަލަސްތީނުގެ ހަތިޔާރު އެޅި ޖަމާއަތަކުން ފޮނުވާލި ރޮކެޓެއް ގޯސްކޮށް ފޮނުވައިގެން ކަމަށެވެ.
ރަސްގެފާނު އަބްދުﷲ އިންޒާރު ދެއްވި ގޮތުގައި އޮކްޓޯބަރު ހަތް ވަނަ ދުވަހު ހަމާސް އިން އިސްރާއިލަށް ދިން ހަމަލާގައި 1،000 އަށް ވުރެ ގިނަ މީހުން މަރުވެ އަދި ޒަހަމްވި ފަހުން އިސްރާއީލުން އަމިއްލަ ދިފާއުގައި ކަމަށް ބުނެ ފަލަސްތީނުގެ އާންމުންނަށް އަމާޒުކުރާ ހަމަލާތަކަކީ އަމިއްލަ ދިފާއު ކުރުމަށްވުރެ ބޮޑަށް ހައްދުން ނައްޓާފައިވާ އަމަލުތަކެއް ކަމަށެވެ.
