އިސްރާއިލުން ޣައްޒާއަށް ދިން ބޮމުގެ ހަމަލާއެއްގައި ހޮސްޕިޓަލެއް ފުނޑުފުނޑުވެ 500 މީހުން ޝަހީދުވެއްޖެ

އިސްރާއީލުން ފަލަސްތީނުގެ ޣައްޒާއަށް ދިން ބޮމުގެ ހަމަލާއެއްގައި އަލް އަހްލީ ބަޕްޓިސްޓް ހޮސްޕިޓަލް އެއްކޮށް ފުނޑުފުނޑުވެ 500 މީހުން ޝަހީދު ވެއްޖެއެވެ.

މި މަހުގެ ހަތްވަނަ ދުވަހުން ފެށިގެން މެދުކެނޑުމެއްނެތި ވައިގެމަގުން އިސްރާއީލުން ދަނީ ފަލަސްތީންގެ ނިކަމެތި ރައްޔިތުންނަށް އަމާޒުކޮށް ވަރުގަދަ ހަމަލާތަކެއް ދެމުންނެވެ. އޭގެ ތެރޭގައި ކެމިކަލް ބޮން ވެސް ހިމެނެއެވެ.

ޣައްޒާގެ ސިއްހީ އިދާރާތަކުން ކަށަވަރު ކޮށްދިން ގޮތުގައި މިރޭ ދިން ބޮމުގެ ހަމަލާ އަމާޒުކޮށްފައިވަނީ ސީދާ އަލް އަހްލީ އަރަބް ހޮސްޕިޓަލަށެވެ. އެހަމަލާގައި ހޮސްޕިޓަލް ގައި އެޑްމިޓްކޮށްފައިވާ މީހުންނާއި، އެތަނަށް ޒިޔާރަތްކުރި މީހުންވެސް ހިމެނޭގޮތުން 500 އަށްވުރެ ގިނަ މީހުން ޝަހީދުވެ އެތައްބަޔަކު ޒަޚަމްވެފައިވާކަމަށް ސިއްހީ އިދާރާތަކުން ވަނީ ރިޕޯޓްކޮށްފައެވެ.

މިހަމަލާގައި މަރުވި މީހުންނާއި، ޒަޚަމްވި މީހުންގެ ތެރޭގައި އެތައް ކުޑަކުދިންނަކާއި މާބަނޑު އަންހެންހެނުން ހިމެނޭއިރު، މިރޭ ވިހޭ ތުއްތު ކުދިންވެސް ހިމެނޭކަމަށް އެ ހޮސްޕިޓަލާއި ހަވާލާދީ ސިއްހީ އިދާރާތަކުން ވަނީބުނެފައެވެ.

ޣައްޒާގެ އެންމެ ކާރުބާރު ބޮޑު ސަރަޙައްދުގައި ހުންނަ މިހޮސްޕިޓަލަށް ގިނަބަޔަކު ޒިޔާރާތްކުރަމުންދާއިރު، ހަމައެކަނި މިއަދު އެކަނި ވެސް މަރުވެފައިވާ 200 މީހުން ހޮސްޕިޓަލަށް ގެނައި ކަމަށް އެހޮސްޕިޓަލާ ހަވާލާދީ ސިއްހީ އިދާރާތަކުން ބުނެފައިވެއެވެ.

އިސްރާއީލްގެ ހައްދުފަހަނައެޅި ޔަހޫދީ ދައުލަތުގެ ސިފައިން ޣައްޒާއަށް މިރޭދިން ހަމަލާވެސް ދީފައިވަނީ އެއްވެސް ވަރަކަށް އިންޒާރު ދިނުމެއް ނެތި ކަމަށް އޮފިޝަލުން ބުނެއެވެ. ޣައްޒާއަށް ދެމުންދާ ހަމަލާތައް ހުއްޓުވުމަށް މިހާތަނަށް އެއްވެސް އަލިމަގެއް ހޯދިފައިނުވާއިރު، ދުވަހެއް ދުވަހަކަށް ހަމަލާތައް ގެންދަނީ ވަރުގަދަ ކުރަމުންނެވެ.

ޣައްޒާއިން ފެނާއި ކަރަންޓު ފަދަ ޒަރޫރީ ޚިދުމަތްތައް ކަނޑާލައިފައިވާއިރު، އެހީދޭ ޖަމާޢަތްތަކަށް އެހީގެ ތަކެތިފޯރުކޮށްދިނުމަށްވެސް އިސްރާއީލް ވަނީ ހުރަސްއަޅާފައެވެ.

ޣައްޒާގެ ވަށައިގެންވާ ބޯޑަރު އެއްކޮށް ބަންދުކޮށް ދެ މިލިއަނަށް ވުރެ ގިނަ ފަލަސްތީނުގެ މުސްލިމުން ނައްތައިލުމަށް އިސްރާއީލުން ވަނީ އަމާޒު ހިފާފައެވެ. މިހާތަނަށް މި ހަނގުރާމައިގައި 2،800 އަށްވުރެ ގިނަ ފަލަސްތީނުގެ މުސްލިމުން ވަނީ ޝަހީދުކޮށްލައިފައެވެ. އަދި، 10،000 އަށްވުރެ ގިނަ މީހުންނަށް ވަނީ އެކިއެކި އަނިޔާތައް ވެފައެވެ.