ބޭނުންވަނީ ހާލަންޑް ހުރި ފެންވަރަށް ދާން: ހޮލުންޑް
ހޮލުންޑް ބުނީ، ހާލަންޑާ އެހެން އެއްވެސް ކުޅުންތެރިޔަކާ އަޅާ ކިޔުމަކީ ކުރުން އެންމެ ރަނގަޅު ކަމެއް ނޫން ކަމަށް
މެންޗެސްޓަރ ޔުނައިޓެޑަށް ކުޅެމުން އަންނަ ރަސްމުސް ހޮލުންޑް
އެންމެ ބޮޑު އަމާޒަކީ މެންޗެސްޓަރ ސިޓީ އަށް ކުޅެމުން އަންނަ ނޯވޭ ފޯވާޑް އާލިން ހާލަންޑް ހުރި ފެންވަރަށް ދާން ކަމަށް، މެންޗެސްޓަރ ޔުނައިޓެޑަށް ކުޅެމުން އަންނަ ޑެންމާކުގެ ރަސްމުސް ހޮލުންޑް ބުނެފި އެވެ.
ހޮލުންޑް ބުނީ، ހާލަންޑާ އެހެން އެއްވެސް ކުޅުންތެރިޔަކާ އަޅާ ކިޔުމަކީ ކުރުން އެންމެ ރަނގަޅު ކަމެއް ނޫން ކަމަށެވެ. ސަބަބަކީ ހާލަންޑް އެހުރި ހިސާބަކީ އޭނާގެ އަމިއްލަ ހިސާބަކަށްވުން ކަމަށް އޭނާ ބުންޏެވެ. ހޮލުންޑް މިހެން ބުނެފައިވާއިރު، ބޮރޫޝިއާ ޑޯޓްމަންޑު ދޫކޮށް ސިޓީ އަށް ބަދަލުވި ފަހުން ހާލަންޑް އަންނަނީ މޮޅު ކުޅުމެއް ދައްކަމުންނެވެ.
އިތުރަށް ވާހަކަ ދައްކަމުން ހޮލުންޑް ބުނީ، އޭނާގެ އުންމީދަކީ ހާލަންޑް ހުރި ފެންވަރަށް ކޮންމެވެސް ދުވަހަކުން ދިޔުން ކަމަށެވެ. ނަމަވެސް، އެހިސާބަށް ދާން އަދި މާ އަވަސް ކަމަށް އޭނާ ވަނީ ބުނެފަ އެވެ. ހާލަންޑަކީ ދުނިޔޭގައި ހުރި އެންމެ މޮޅު ފުޓުބޯޅަ ކުޅުންތެރިޔާ އަށް ނުވެއްޖެ ނަމަ، އެއީ ދުނިޔޭގައި ހުރި އެންމެ މޮޅު ސްޓަރައިކަރ ކަމަށް ވެސް ހޮލުންޑް ވަނީ ބުނެފަ އެވެ. އެކަން ފާހަގަކޮށް ހޮލުންޑް ބުނީ ޔުނައިޓެޑަކީ ވެސް ކުރިއަށް ދެވޭނެ ފެންވަރުގެ ޓީމެއް ކަމަށެވެ. އެކަން އެ ޓީމުގެ މާޒީ އަަށް ބަލާލުމުން ފެންނަން އޮތް ކަމަށާއި، އުންމީދަކީ އެންމެ މަތީ ފަންތީގައި އޭނާ އަށް ވެސް ކުޅެވުން ކަމަށް ހޮލުންޑް ވަނީ ބުނެފަ އެވެ.
އެޓަލަންޓާ ދޫކޮށް ހޮލުންޑް ޔުނައިޓެޑަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. ހޮލުންޑް ވަނީ މިހާތަނަށް ޔުނައިޓެޑަށް ކުޅެދިން އަށް މެޗުން ތިން ލަނޑު ޖަހައިފަ އެވެ. ޔުނައިޓެޑުގެ ކޯޗު އެރިކް ޓެން ހާގް ފާހަގަކޮށްފައިވާ ގޮތުގައި ހޮލުންޑަކީ މުސްތަޤުބަލު އުޖާލާ ކުޅުންތެރިޔެކެވެ.
