ފަސްވަނަ ރުކުން ޕްރޮގްރާމް ވަރަށް ކާމިޔާބު، ރައްޔިތުންގެ ވަރަށް ބޮޑު ސަޕޯޓެއް ލިބޭ: ހައްޖު ކޯޕްރޭޝަން
14 އޮކްޓޯބަރު 2023 | ހޮނިހިރު 06:37މި ޕްރޮގްރާމް ފެށިގެންދިޔައީ ކޮވިޑް-19ގެ ދުވަސްވަރު
ރާއްޖެޓީވީގެ ފަލަސުރުހީ ޕްރޮގްރާމްގައި މެނޭޖަރު ލީގަލް ކާމް ކޮންޕެނީ ސެކެޓްރީ އަބްދުﷲ ނާހިދު ވާހަކަދައްކަވަނީ
ފަސްވަނަ ރުކުން ޕްރޮގްރާމަކީ ވަރަށް ކާމިޔާބު ޕްރޮގްރާމެއް ކަމަށާއި، އާއްމު ރައްޔިތުންގެ ފަރާތުން ވަރަށް ބޮޑު ސަޕޯޓެއް ލިބޭ ކަމަށް ހައްޖު ކޯޕްރޭޝަނުން ބުނެފިއެވެ.
ފަސްވަނަ ރުކުން ޕްރޮގްރާމަކީ ހައްޖާއި އުމްރާގެ އަޅުކަމަށް ރައްޔިތުންގެ ހޭލުންތެރިކަން އިތުރު ކުރުމަށް ހިންގާ ޕްރޮގްރާމެކެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެނޭޖަރު ލީގަލް ކާމް ކޮންޕެނީ ސެކެޓްރީ އަބްދުﷲ ނާހިދު ވިދާޅުވީ ފަސްވަނަ ރުކުން ޕްރޮގްރާމް ފެށިގެންދިޔައީ ކޮވިޑް-19ގެ ދުވަސްވަރު ކަމަށާއި، އޭރު ވެސް ޕްރޮގްރާމަށް ވަރަށް ބޮޑު ތަރުހީބެއް ލިބިގެން ދިޔަ ކަމަށެވެ.
މާލޭގެ އިތުރުން އަތޮޅުތެރޭގައި މި ޕްރޮގްރާމް ކުރިއަށްދާކަން ފާހަގަކުރައްވައި ނާހިދު ވިދާޅުވީ އޮންލައިންކޮށް ވެސް ގިނަ ޕްރޮގްރާމްތަކެއް ކުރިއަށް ގެންދެވިފައިވާ ކަމަށެވެ.
ނާހިދު ވިދާޅުވީ ބައެއް ރަށްރަށުން މި ޕްރޮގްރާމް ކުރިއަށް ގެންގެސްދިނުމުގެ ދަައުވަތު އަންނަ ކަމަށާއި، އެގޮތަށް އެދޭ ރަށްރަށުގައި ޕްރޮގްރާމްތައް ކުރިއަށް ގެންދާ ކަމަށެވެ. އަދި މިގޮތަށް ޕްރޮގްރާމް ކުރިއަށް ގެންދާއިރު، ގިނަ ބަޔަކަށް ބައިވެރިވެވޭނެ ގޮތަށް ދުވަސް ކަނޑައެޅުމާއި، އިންތިޒާމްތައް ހަމަޖައްސާ ކަމަށް އޭނާ ވިދާޅުވިއެވެ.
ފަސްވަނަ ރުކުން ޕްރޮގްރާމްގައި ހައްޖާއި އުމްރާގެ މާތްކަމާއި ހައްޖު ފަރުޟުކުރެއްވުމާއި ގުޅޭ ގޮތުންނާއި ހައްޖާއި އުމްރާގެ އަޅުކަން އަދާކުރާނެ ގޮތާއި ހައްޖާއި އުމްރާގެ އަޅުކަމާއިމެދު ރައްޔިތުންގެ ހިތްތަކުގައި އުފެދިފައިވާ ސުވާލުތަކަށް ޖަވާބު ދީ، މައުލޫމާތު ފޯރުކޮށްދިނުން ހިމެނެއެވެ.
