ފަސްވަނަ ރުކުން ޕްރޮގްރާމަކީ ވަރަށް ކާމިޔާބު ޕްރޮގްރާމެއް ކަމަށާއި، އާއްމު ރައްޔިތުންގެ ފަރާތުން ވަރަށް ބޮޑު ސަޕޯޓެއް ލިބޭ ކަމަށް ހައްޖު ކޯޕްރޭޝަނުން ބުނެފިއެވެ.
ފަސްވަނަ ރުކުން ޕްރޮގްރާމަކީ ހައްޖާއި އުމްރާގެ އަޅުކަމަށް ރައްޔިތުންގެ ހޭލުންތެރިކަން އިތުރު ކުރުމަށް ހިންގާ ޕްރޮގްރާމެކެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެނޭޖަރު ލީގަލް ކާމް ކޮންޕެނީ ސެކެޓްރީ އަބްދުﷲ ނާހިދު ވިދާޅުވީ ފަސްވަނަ ރުކުން ޕްރޮގްރާމް ފެށިގެންދިޔައީ ކޮވިޑް-19ގެ ދުވަސްވަރު ކަމަށާއި، އޭރު ވެސް ޕްރޮގްރާމަށް ވަރަށް ބޮޑު ތަރުހީބެއް ލިބިގެން ދިޔަ ކަމަށެވެ.
މާލޭގެ އިތުރުން އަތޮޅުތެރޭގައި މި ޕްރޮގްރާމް ކުރިއަށްދާކަން ފާހަގަކުރައްވައި ނާހިދު ވިދާޅުވީ އޮންލައިންކޮށް ވެސް ގިނަ ޕްރޮގްރާމްތަކެއް ކުރިއަށް ގެންދެވިފައިވާ ކަމަށެވެ.
ނާހިދު ވިދާޅުވީ ބައެއް ރަށްރަށުން މި ޕްރޮގްރާމް ކުރިއަށް ގެންގެސްދިނުމުގެ ދަައުވަތު އަންނަ ކަމަށާއި، އެގޮތަށް އެދޭ ރަށްރަށުގައި ޕްރޮގްރާމްތައް ކުރިއަށް ގެންދާ ކަމަށެވެ. އަދި މިގޮތަށް ޕްރޮގްރާމް ކުރިއަށް ގެންދާއިރު، ގިނަ ބަޔަކަށް ބައިވެރިވެވޭނެ ގޮތަށް ދުވަސް ކަނޑައެޅުމާއި، އިންތިޒާމްތައް ހަމަޖައްސާ ކަމަށް އޭނާ ވިދާޅުވިއެވެ.
ފަސްވަނަ ރުކުން ޕްރޮގްރާމް ފެށި ދުވަސްވަރަކީ ކޮވިޑް-19ގެ ދަތި ހާލަތުގައި ދިމާވި ދުވަސްވަރު އަޅުގަނޑުމެން ހައްޖު އުމްރާގެ ހޭލުންތެރިކަން އިތުރު ކުރުމަށްޓަކައި ސަރުކާރުން ކުރިއަށް ގެންދެވި ކަންކަމުގެ ތެރޭގައި އޭގެ ތެރެއިން އެއް ޕްރޮގްރާމް 5 ވަނަ ރުކުން ޕްރޮގްރާމަކީ. އެހެންވީމަ އަޅުގަނޑުމެން އޭރުން ފެށިގެން އޮންލައިންކޮށް އަޅުގަނޑުމެން ކުރިއަށް ގެންދަން ޕްރޮގްރާމްތައް އަޅުގަނޑުމެން އެކި ރަށްރަށް ދަތުރުތަކުގެ ތެރޭގައި އަޅުގަނޑުމެން ޕްރޮގްރާމްތައް ކުރިއަށް ގެންދަން. އަދި އެއްވެސް ރަށަކުން ރިކުއެސްޓް ކޮށްފިނަމަ އެގޮތަށް ވެސް އަޅުގަނޑުމެން އެބަ ގެންދަން. އެހެންވީމަ އަޅުގަނޑުމެންނަށް ފާހަގަކުރެވެނީ ރަށްރަށުގައި ހަމަ އެ މައުލޫމާތު އެނގެން ބޭނުންވާ ވަރަށް ގިނަ ފަރާތްތައް ތިބިކަން. މި ޕްރޮގްރާމް ބޭއްވުނު ތަންތަނުގެ ތެރެއިން އަޅުގަނޑުމެންނަށް ފާހަގަކުރެވެނީ ވަރަށް ބޮޑު ސަޕޯޓެއް ޕްރޮގްރާމަށް ލިބެމުންދާ ކަމަށް. އެއީ ވަރަށް ގިނަ ބޭފުޅުން ހައްޖު އަދި އުމްރާގެ މައުލޫމާތު ބޭނުންވޭ އެކަމަށް ބޭނުންޖެހިފައިވާކަން.މެނޭޖަރު ލީގަލް ކާމް ކޮންޕެނީ ސެކެޓްރީ އަބްދުﷲ ނާހިދު
ފަސްވަނަ ރުކުން ޕްރޮގްރާމްގައި ހައްޖާއި އުމްރާގެ މާތްކަމާއި ހައްޖު ފަރުޟުކުރެއްވުމާއި ގުޅޭ ގޮތުންނާއި ހައްޖާއި އުމްރާގެ އަޅުކަން އަދާކުރާނެ ގޮތާއި ހައްޖާއި އުމްރާގެ އަޅުކަމާއިމެދު ރައްޔިތުންގެ ހިތްތަކުގައި އުފެދިފައިވާ ސުވާލުތަކަށް ޖަވާބު ދީ، މައުލޫމާތު ފޯރުކޮށްދިނުން ހިމެނެއެވެ.
