ގާޒާގައި ޝަހީދު ކޮށްލެވުނު މީހުންގެ އަދަދު 1200ށް
12 އޮކްޓޯބަރު 2023 | ބުރާސްފަތި 04:50ގައްޒާގައި ފަލަސްތީނުގެ 338،934 މީހުން ގެދޮރު ގެއްލިފައިވޭ
އިސްރާއިލްގެ ހަމަލާތަކުގައި ގާޒާގެ އެތައް އިމާރާތެއް ބިމާ ހަމަވެފައި
އިސްރާއިލް-ފަލަސްތީން ހަނގުރާމައަށް 6 ދުވަސް ވެގެންދިޔައިރު، ގައްޒާގައި ޝަހީދުކޮށްލި މީހުންގެ އަދަދު 1200ށް އަރައިފިއެވެ.
ފަލަސްތީނުގެ ހެލްތު މިނިސްޓްރީއާއި ހަވާލާދީ އަލްޖަޒީރާގައި ބުނެފައިވަނީ ފަލަސްތީނުގެ ގަޑިން ހެނދުނު 7:00 އާއި ހަމައަށް ޝަހީދުވި މީހުންގެ އަދަދު 1،200ށް އަރާފައިވާއިރު، ޒަޚަމްވި މީހުންގެ އަދަދު ވަނީ ގާތްގަނޑަކަށް 5،600ށް އަރާފައެވެ.
ހުއްޓުމެއް ނެތި ޔަހޫދީ ދައުލަތް އިސްރާއީލުން ރޭ ހަތަރުދަމު ވެސް ބޮން އަޅަމުން ގޮސްފައިވާ އިރު، ގައްޒާގައި ފަލަސްތީނުގެ 338،934 މީހުން ގެދޮރު ގެއްލިފައިވާ ކަމަށް އދ އިން ވަނީ ބުނެފައެވެ. ޝަހީދުވި މީހުންގެ އަދަދު 1200ށް އަރާފައިވީ ނަމަވެސް، މި އަދަދު އިތުރުވާނެކަމަށް ކަމާބެހޭ ފަރާތްތަކުން ބުނެއެވެ.
ހިއުމަން ރައިޓްސް ވޮޗްގެ ކުރީގެ ވެރިޔާ ކެނެތު ރޯތު ވިދާޅުވީ ފަލަސްތީނުގެ އާންމުންނަށް ޔަހޫދީ ދައުލަތުން އަމާޒެއް ބެލުމެއް ނެތި ދެމުން އަންނަ ހަމަލާތަކަކީ "ހަނގުރާމައިގެ ޖަރީމާއެއް" ކަމަށެވެ.
އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވިދާޅުވެފައިވަނީ ކާބޯތަކެއްޗާއި ތެލާއި ފެން ފަދަ "ދިރިއުޅުމުގެ ޒަރޫރީ ސާމާނުޣައްޒާއަށް ވަނުމަށް ހުއްދަ ދޭން ޖެހޭނެ ކަމަށެވެ. އިސްރާއިލުން އަންނަނީ ގައްޒާއަށް މި ތަކެތި އެތެރެކުރާނަމަ އެހީދޭ ފަރާތްތަކަށް އަމާޒުކޮށް ހަމަލާދޭނެކަމަށް ބުނެފައެވެ.
