އިރުއޮއްސުމާއި ހަމައަށް ފަލަސްތީނުގައި ޝަހީދުކޮށްލެވުނު މީހުންގެ އަދަދު ހާހަކަށްވުރެ އިތުރުވެއްޖެ

އިރުއޮއްސުމާއި ހަމައަށް ފަލަސްތީނުގައި ޝަހީދުކޮށްލެވުނު މީހުންގެ އަދަދު ހާހަކަށްވުރެ އިތުރުވެއްޖެއެވެ.

ފަލަސްތީނުގެ ސިއްހަތާއި ބެހޭ ވުޒާރާއާއި ހަވާލާދީ އަލްޖަޒީރާގައި ބުނެފައިވަނީ ގާޒާގައި ޝަހީދުވި މީހުންގެ އަދަދު އެކަނިވެސް 1055ށް އަރާ ކަމަށެވެ. އަދި ޒަހަމްވި މީހުންގެ އަދަދު 5184ށް އަރާފައިވާ ކަމަށެވެ.

މީގެ އިތުރުން ހާން ޔޫނިސް ސިޓީއަށް އަމާޒުވި ހަމަލާއެއްގައި އެކަނިވެސް 16 މީހަކު ޝަހީދުކޮށްލާފައިވެއެވެ. އެ ސިޓީގެ ދެގެއަކަށް ދުރާލާ އިންޒާރެއް ނެތި ބޮން އަޅާ ބިމާހަމަކޮށްލާފައިވާ އިރު، ދެ އާއިލާއަކުން، ކޮންމެ އާއިލާއެއްގެ ވެސް 8 މެންބަރުން ޝަހީދުވެފައިވާ ކަމަށެވެ.

ދުނިޔޭގެ އެންމެ ބޮޑު ޖަލު، ގައްޒާގައި 2.3 މިލިއަން މީހުން ދިރިއުޅެމުން އަންނަ އިރު، ގައްޒާ އަށް އިސްރާއިލުން ފޯރުކޮށްދެމުން އަންނަ ކަރަންޓާއި، ފެނާއި ގޭހުގެ ހިދުމަތް ވަނީ ކަނޑާލާފައެވެ. އދ އިން ވަނީ ގައްޒާ އޮތީ އިންސާނީ ކާރިސާއެއްގެ ތެރޭގައި ކަމަށް ބުނެ އެހީތެރިކަމަށް ގޮވާލާފައެވެ. ނަމަވެސް އިސްރާއިލުން ވަނީ އެހީތެރިކަން ފޯރުކޮށްދޭނަމަ ހަމަލާދޭނެކަމަށް ބުނެ އިންޒާރު ދީފައެވެ.

ޣައްޒާގެ އޮފިޝަލުން ބުނެފައިވަނީ އެތަނަށް އިންސާނީ ކާރިސާއެއް ކުރިމަތިވެފައިވާއިރު، އިސްރާއީލުން ގައްޒާ ވަށާލަން ނިންމާ ތެޔޮ ކަނޑާލާފައިވާ އިރު، ތެޔޮ ހުސްވުމުން ގަޑިތަކެއްގެ ތެރޭގައި އިންޖީނުގެ މުޅިން ބަންދުވެގެންދާނެ ކަމަށް ވަނީ ބުނެފައެވެ.