"އަހަރެމެންނަށް މިހެން އުޅެވޭކަށް ނެތް، އަހަރެމެން ދާންވީ ކޮންތާކަށް؟"

އިސްރާއީލުގެ ހަނގުރާމަމަތީ މަތިންދާބޯޓުތަކުން ބުދަ ދުވަހުގެ ރޭ ހުއްޓުމެއް ނެތި ޣައްޒާއަށް ބޮން އެޅީ، ހަމާސް ޖަމާއަތް ނައްތައިލުމަށް އެއްގަމު މަގުން ހަމަލާދިނުމުގެ ކުރިންނެވެ. އިސްރާއީލުން ބުނީ ޣައްޒާ ސިޓީގެ އަވަށެއްގެ 200އަށްވުރެ ގިނަ އަމާޒަށް އެ ގައުމުގެ އެތައް ހަނގުރާމަމަތީ ޖެޓްތަކެއް ހަމަލާދީފައި ވާކަމަށާއި، އެއީ ހަމާސް ޖަމާއަތުން ހީވެސްނުކުރާ ފަދަ ހަމަލާތަކެއް ދޭން ކުރި ކަމެއް ކަމަށެވެ.

އިސްރާއީލުގެ އަސްކަރިއްޔާއިން ބުނީ، މިދިޔަ ހަފުތާބަންދުގައި ފެށި ހަމަލާތަކުގައި ޣައްޒާގައި ތިބި ފަލަސްތީނުގެ ހަތިޔާރު އެޅި 1،000 މީހުން އިސްރާއީލު ސިފައިން ޝަހީދުކޮށްލާފައި ވާކަމަށާއި، ހަމަނުޖެހުންތައް ބޮޑުވާން ފެށުމުން އިސްރާއީލުގެ ހުރިހާ ހިސާބުތަކެއްގައި ވެސް ސަލަމާތީ ކަންކަން ވަރުގަދަކޮށްފައި ވާކަމަށެވެ.

ނަމަވެސް އެއްވެސް އާރެއް ބާރެއް ނެތް ފަލަސްތީނު ރައްޔިތުން ވަޒަނުން ނެރުމަށް، އެމީހުންގެ ގެޔާއި ގެދޮރަށް ބޮންއަޅައި، ދަނީ ސުންނާފަތި ކުރަމުންނެވެ. އެފަދަ އެކަކީ ޣައްޒާގެ ރައްޔިތެއް ކަމަށްވާ މުހައްމަދު ނަޖާރުއެވެ. އޭނާ ބުނީ މިއަދު ބޯހިޔާކުރާނެ ތަނެއް ނެތްއިރު، ކާނެ ގޮތެއް އަދި ދަރިންތައް ނިންދަވާނެ ގޮތެއްވެސް ނެތްކަމަށެވެ.

ޣައްޒާގެ ސިއްހަތާބެހޭ ވުޒާރާއިން ބުނީ، އިސްރާއީލުގެ ތާރީޚުގައި ފަލަސްތީނަށް ދިން އެންމެ ނުރައްކާތެރި ހަމަލާގައި ހޮނިހިރު ދުވަހުން ފެށިގެން 950ށްވުރެ ގިނަ މީހުން މަރުވެ، 5000އަށްވުރެ ގިނަމީހުން ޒަޚަމްވެފައި ވާކަމަށެވެ.

ވެއްޓިފައިވާ ގެތައް ކައިރީގައި ހުރެގެން އިމާރާތުގެ ދަށުގައި ހުރި ގޮދަޑިއާއި ބާލީސްތަކަށް އިޝާރާތްކުރަމުން ނަޖާރު ބުނީ ނިދޭނެ ގޮތެއް ނެތްކަމަށެވެ. އުޅެންވީ ކޮންތާކުކަމެއް ނޭނގޭ ކަމަށާއި، އެއީ ދިރިއުޅުމެއް ނޫން ކަމަށެވެ. ވެއްޓިފައިވާ އިމާރާތްތަކުގެ މެދުގައި ހުއްޓިހުރެ ނަޒާރު ބުނީ ޣައްޒާ ހަލާކުވެއްޖެ ކަމަށެވެ. ހުރިހާ އެއްޗެއް ހަލާކުވެއްޖެ ކަމަށެވެ.

ޔަހޫދީ ހަރުކަށި ދައުލަތުން ވަނީ ޣައްޒާއަށް އަސާސީ ޚިދުމަތްތައްވެސް ބަންދުކޮށްފައެވެ. އެގޮތުން ކަރަންޓާއި، ފެނާއި، ގޭސް ކަނޑާލާފައިވާއިރު، ހޮސްޕިޓަލްތަކުގައި އެޑްމިޓްކޮށްގެން ފަރުވާ ދެމުންދާ މީހުންގެ އަދަދު އަންނަނީ އިތުރުވަމުންނެވެ.