އެއީ މީގެ ހަފުތާއެއްހާ ދުވަސް ކުރިއެވެ. ލުބްނާނުގެ ދެކުނުގައި ދިރިއުޅެމުން ދިޔަ ދަނޑުވެރި ޢާއިލާތަކުން ތައްޔާރު ވަމުން ދިޔައީ ތާޒާވެ، ފައްކާވެފައިވާ ޒައިތޫނިތައް ބިނުމުގެ މަސައްކަތް ފެށުމަށެވެ. ނަމަވެސް، ތަޤުރީރުގައި ނިޔާ ކުރީ މުޅިން ތަފާތު ކަމެކެވެ. ޒައިތޫނި ދަނޑުބިންތައް ދޫކޮށް، އަމިއްލަ ފުރާނަ ސަލާމަތް ކުރުމަށް ހިޔާވައްސެއް ހޯދަން ދުއްވައިގަތުމަށް މަޖުބޫރުވީއެވެ. ދުވަހަކީ 2006 ވަނަ އަހަރުގެ ހަނގުރާމައަށް ފަހު، ބޯޑަރު ހުރަސްކޮށް އިޒްރޭލާއި ހަމާސް ޖަމާޢަތާ ދެމެދު އެންމެ ވަރުގަދައަށް ޙަމަލާތައް ބަދަލު ކުރަން ފެށި ދުވަހެވެ.

ލުބްނާނުގެ ދެކުނުގެ އަވަށްތަކުގެ އަހުލުވެރިންނަށް، އޮކްޓޯބަރު 9 ވަނަ ދުވަހަކީ ނަމާން، އަދި އެހާމެ ބިރުވެރި ހަނދާންތަކެއް އައު ކޮށްދިން ދުވަހެކެވެ. އެ ދުވަހަކީ އީރާނުގެ އެއްބާރުލުމާއެކު ހަރަކާތްތެރިވާ ލުބްނާނުގެ ހަތިޔާރު އެޅި ހަނގުރާމަ ހިޒްބުއްލާ ޖަމާޢަތާއި އިޒްރޭލާއި ދެމެދު 2006 ވަނަ އަހަރު ކުރި ވަރުގަދަ ހަނގުރާމައިގެ ހަނދާންތައް އައު ކޮށްދިން ދުވަހަކަށް ވިއެވެ. އިޒްރާލުގެ ފައުޖުތަކާއި، ޣައްޒާ ކޮންޓްރޯލް ކުރަމުން ދާ ހަމާސް ޖަމާޢަތާ ދެމެދު ގަދަ ވެފައި ވާ ހަނގުރާމަގަނޑު ހިންގަމުން ދަނީ ލުބްނާނުގެ ދެކުނު ބޯޑަރުން ބަލާއިރު އެންމެ 200 އެއްހާ ކިލޯމީޓަރު ދުރުގައެވެ.

މީގެ 17 އަހަރު ކުރިން ކުރި ހަނގުރާމައަށް ބަލާއިރު، ލުބްނާނުން އެކަނިވެސް 1200 އެއްހާ މީހުން މަރުވިއެވެ. ގިނައީ އާންމު ރައްޔިތުންނެވެ. އިޒްރޭލުން މަރުވީ އެންމެ 157 މީހުންނެވެ.

އޮކްޓޯބަރު 9 ވަނަ ދުވަހު، އިޒްރޭލާއި ލުބްނާން ހިއްސާ ކުރާ ބޯޑަރު ސަރަޙައްދުގެ މަސްރަޙު ނުތަނަވަސް ވެގެން ދިޔައީ ހަމާސް ޖަމާޢަތުން އިޒްރޭލަށް އެތެރެވުމަށް ލުބްނާނު ހުރަސް ކުރި ހިސާބުންނެވެ. އެހެން ދެ ބައެއްގެ މެދުގައި ބަދަލު ކުރަމުން ދާ ޙަމަލާތަކެއްގެ މެދަށް، ލުބްނާނަށް ވަންނަން ޖެހުމަކީ ލުބްނާނުގެ އެތައް ބަޔަކު މިއަދުވެސް ކުރަމުން ދާ ޝަކުވާއެކެވެ. ލުބްނާނަކީ ޚުދު އެ ޤައުމުގައި ބޮޑެތި ހަމަނުޖެހުންތަކެއް އުފެދިފައި އޮތް ޤައުމަކަށް ވާ އިރު، އަނެއްކާވެސް ނުތަނަވަސްކަން އިތުރު ވީތީއެވެ.