ކެޕްޓަން ލިއޮނަލް މެސީ އާއެކު އާޖެންޓީނާ އިން ފީފާ ވޯލްޑް ކަޕް ކޮލިފިކޭޝަންގައި ޕެރަގުއޭ މެޗަށް ތައްޔާރުވާން ފަށައިފި އެވެ.

ކޮލިފައިންގައި އިކުއެޑޯއާ ދެކޮޅަށް ކުޅުނު ފުރަތަމަ މެޗުގައި ހިލޭ ޖެހުމަކުން ލަނޑު ޖަހައި މެސީ ވަނީ އާޖެންޓީނާ މޮޅު ކޮށްދީފަ އެވެ. އެހެން ނަމަވެސް ބޮލީވިއާއާ ދެކޮޅަށް ކުޅުނު މެޗުގައި މެސީ ކުޅެފައެއް ނުވެއެވެ. އާޖެންޓީނާ އާއެކު މެސީ ފަރިތަކުރުންތަކުގައި ބައިވެރިވަމުން އަންނައިރު، ދާދި ފަހުން އޭނާ ހުރީ އަނިޔާގަ އެވެ. ޤައުމީ ޓީމުގެ ފަރިތަކުރުމަށް އައުމުގެ ކުރިން މެސީ ވަނީ އިންޓަ މިއާމީން އެމެރިކާ ލީގުގައި ކުޅުނު މެޗުގައި ކުޅެފަ އެވެ. އަނިޔާގެ ސަބަބުން ކުޅުމާ ދުރުގައި ހުރުމަށްފަހު އެނބުރި އައިސް އެ މެޗުގައި މެސީ ކުޅުނީ ބަދަލު ކުޅުންތެރިޔެއްގެ ގޮތުގަ އެވެ.

ބުރާސްފަތި ދުވަހު އާޖެންޓީނާ އިން ޕެރަގުއޭއާ ދެކޮޅަށް ބުއެނޯސް އައިރެސްގެ މޮނިއުމެންޓަލް ސްޓޭޑިއަމްގައި ކުޅޭއިރު، އޮކްޓޫބަރު މަހުގެ 17 ވަނަ ދުވަހު ނޭޝަނަލް ސްޓޭޑިއަމްގައި ޕެރޫއާ ދެކޮޅަށް ނުކުތުމަށް ލީމާއަށް ދާ ސްކޮޑުގައި މެސީ ވެސް ވަނީ ހިމަނައިފަ އެވެ. ކޮންމެބޯލް ސަރަހައްދުގެ ކޮލިފައިންގެ އެއްވަނައިގައި އޮތް ބްރެޒިލް އާއި ދެ ވަނައިގައި އޮތް އާޖެންޓީނާ ވަނީ ކުޅުނު ދެ މެޗުން ވެސް މޮޅުވެފަ އެވެ. ދެ ޓީމަށް ވެސް ހަ ޕޮއިންޓު ލިބޭއިރު، ލަނޑުވެ ގޮތުން ކުރި ހޯދަނީ ބްރެޒިލް އެވެ.