އިސްރާއީލުން ޣައްޒާއާ ދެކޮޅަށް ހިންގަނީ 'ނަސްލު ނައްތާލުމުގެ' ކެމްޕޭނެއް - އދ ގައި ހުންނަ ފަލަސްތީނުގެ މަންދޫބު

އިސްރާއީލުން ޣައްޒާއާ ދެކޮޅަށް 'ނަސްލު ނައްތާލުމުގެ' ކެމްޕޭނެއް ހިންގާކަމަށް އދ ގައި ހުންނަ ފަލަސްތީނުގެ މަންދޫބު ރިޔާޒް މަންސޫރު ތުހުމަތު ކުރައްވައިފިއެވެ.

އދ.ގައި ހުންނަވާ ފަލަސްތީނުގެ މަންދޫބު އަންގާރަ ދުވަހު ސިފަކުރެއްވި ގޮތުގައި އިސްރާއީލުން ޣައްޒާއަަށް ބޮން އަޅަމުންދިއުމާއި ހަމާސްގެ ކޮންޓްރޯލް އޮންނަ ފަލަސްތީނުގެ ސަރަހައްދު މުޅިން ވަށާލުމަށް ވައުދު ވުމަކީ "ނަސްލު ނައްތާލުމަށް ވުރެ ކުޑަ ކަމެއް ނޫން" ކަމަށެވެ.

އިސްރާއީލުގެ ތާރީހުގައި ވެސް ހަމާސްގެ ހަނގުރާމަވެރިން ދިން އެންމެ ނުރައްކާތެރި ހަމަލާގައި ހޮނިހިރު ދުވަހު އިސްރާއީލުގެ ސަރަހައްދު ތަކަށް ހަމާސްގެ ހަނގުރާމަވެރިން ވަަދެ ބަޑިޖަހާ 1،000 އަށް ވުރެ ގިނަ މީހުން މަރާލައި ސަތޭކައެއްހާ ރަހީނުކޮށްފައިވެއެވެ. ރައްދު ދިނުމަށް ކަމަށް ބުނެ އިސްރާއީލުން ވަނީ ޣައްޒާއަށް ވައިގެ މަގުން ހަމަލާތަކެއް ދީ މުޅި ހިސާބު ސުންނާފަތިކޮށްލާފައެވެ.

ޔަހޫދީ ދައުލަތް، އިސްރާއީލުގެ ހަރުކަށި ޑިފެންސް މިނިސްޓަރު ޔޯއަވް ގަލަންޓް ވަނީ 2.3 މިލިއަން މީހުން ދިރިއުޅޭ ޤައްޒާއަށް ކާބޯތަކެއްޗާއި ތެޔޮ ފޯރުކޮށްދިނުން ހުއްޓުވުމަށް "ޓޯޓަލް ބްލޮކޭޑް" އެއް ހޯމަ ދުވަހު އިއުލާންކޮށްފައެވެ. މިކަން ބައިނަލްއަގުވާމީ ދުނިޔެއިން ވަނީ ކުށްވެރިކޮށްފައެވެ. ނަމަވެސް ހަރުކަށި ދައުލަތް ތަކުން މިކަމަށް ދަނީ ތަރުހީބުދެމުންނެވެ.

އދ ގައި ހުންނަ ފަލަސްތީނުގެ މަންދޫބު ރިޔާޒް މަންސޫރު ވިދާޅުވީ ފާޅުކަން ބޮޑު ގޮތެއްގައި އިންސާނިއްޔަތުކަން ނަގާލާ، ރައްޔިތުންގެ ބޮލަށް ބޮން އަޅާ، ހަނގުރާމައިގެ އުސޫލެއްގެ ގޮތުގައި ބަނޑުހައިހޫނުކަން ބޭނުންކޮށް، އެމީހުންގެ ގައުމިއްޔަތު ވުޖޫދުން ނައްތާލުމަކީ ނަސްލު ނައްތާލުމަށް ވުރެ ކުޑަ ކަމެއް ނޫން ކަމަށެވެ.

ރިޔާޒް މަންސޫރު ވިދާޅުވީ މި އަމަލުތަކަކީ ހަނގުރާމައިގެ ޖަރީމާތަކެއް ކަމަށެވެ.

އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ހޯމަ ދުވަހު ވިދާޅުވީ އިސްރާއީލުން ޣައްޒާ މުޅިން ވަށާލާނެކަން އިއުލާން ކުރުމުން "ފުން ހާސްކަމެއް" ލިބިފައިވާ ކަމަށެވެ. މިހާރު އޮތް ހަމަނުޖެހެމުގެ ކުރިން ވެސް ޣައްޒާގެ އިންސާނީ ހާލަތު އޮތީ އިންތިހާއަށް ގޯސްކޮށް ކަމަށާއި، އިސްރާއިލުގެ އެ އަމަލާއެކު އެކަން ވަރަށް ބޮޑަށް ގޯސްވެގެންދާނެ ކަމަށް ގުޓަރޭސް ވިދާޅުވިއެވެ.