އޮމާނުން ދިވެހިންނަށް އޮން އެރައިވަލް ވިސާ ދެނީ ޝަރުތުތަކަކާއެކު
އޮމާންއަށް ދަތުރުކުރާ ދިވެހިންނަށް އެއްވެސް ޝަރުތަކާނުލާ އޮން-އެރައިވަލް ވިސާ ލިބޭނޭ އިންތިޒާމު ހަމަޖެއްސުމަށް އެ ޤައުމުގެ ކަމާބެހޭ ފަރާތްތަކާ ފޮރިން މިނިސްޓްރީން ދަނީ މަޝްވަރާކުރަމުން
ފޮރިން މިނިސްޓްރީ
ރާއްޖެއިން އޮމާނަށް ދަތުރުކުރާ ދިވެހިންނަށް އޮންއެރައިވަލް ވިސާ ދެނީ ޝަރުތުތަކަކާ އެކު ކަމަށް ފޮރިން މިނިސްޓްރީން ބުނެފިއެވެ.
ފޮރިން މިނިސްޓްރީން މިއަހަރުގެ މަރޗް މަހުގެ 30 ވަނަ ދުވަހު ބުނެފައިވަނީ ދިވެހިންނަށް ކުރިއާލައި ވިސާ ނެގުމެއް ނެތި އޮމާނަށް ދަތުރުކުރެވޭނެ ކަމަށެވެ. ނަމަވެސް އެއިއިރު އެ ކަން ވަނީ ވަކި ޝަރުތުތަކަކާ އެކު ކަމަކަށް ނުބުނެއެވެ. ދިވެއްސަކު އޮމާން އަށް ވިސާ އާ ނުލާ އެތެރެވާން އުޅުމުން އަނބުރާ ފޮނުވާލި މައްސަލައެއް ސޯޝަލް މީޑިޔާގައި ހާމަވުމާއި ގުޅިގެން ފޮރިން މިނިސްޓްރީން ނެރުނު ބަޔާނުގައި ބުނީ އޭރު އެ މައުލޫމާތު ހާމަކުރީ އޮމާން ސަރުކާރުން ދިން މައުލޫމާތުގެ މައްޗަށް ކަމަށެވެ. ނަމަވެސް ފަހުން މިނިސްޓްރީއަށް މައުލޫމާތު ލިބިފައިވާ ގޮތުގައި އެ ކަން ކުރެވެނީ ދެ ޝަރުތެއްގެ މަތިންކަމަށް އެނގިފައިވާކަމަށް ބުނެފައިވެއެވެ.
އޮމާންއަށް ދަތުރުކުރާ ދިވެހިންނަށް 14 ދުވަހުގެ އޮން-އެރައިވަލް ވިސާ ލިބެނީ ދެ ޝަރުތުތައް ފުރިހަމަވުމުންނެވެ.
1- އިނގިރޭސިވިލާތް، އެމެރިކާ، ޝެންގަން ޤައުމުތައް، ކެނެޑާ، އޮސްޓްރޭލިއާ ނުވަތަ ޖަޕާންގެ މުއްދަތު ހަމަނުވާ ވިސާއެއް އޮތުން ނުވަތަ އެއިން ޤައުމެއްގެ ރަށްވެހިކަން އޮތުން.
2- ހޮޓެލް ބުކިންގ، ދެކޮޅު ޓިކެޓް އަދި ހެލްތު އިންޝޫރަންސް އޮތުން.
އެހެންކަމުން އޮމާންއަށް ދަރުތުކުރައްވާ ފަރާތްތަކުން މަތީގައި ބަޔާންކޮށްފައިވާ ޝަރުތުތައް ފުރިހަމަ ނުވާނަމަ ދުރާލާ ވިސާ ނަގައިގެން ދަތުރުކުރުމަށް މިނިސްޓްރީން އެދެއެވެ.
އަދި، އޮމާންއަށް ދަތުރުކުރާ ދިވެހިންނަށް އެއްވެސް ޝަރުތަކާނުލާ އޮން-އެރައިވަލް ވިސާ ލިބޭނޭ އިންތިޒާމު ހަމަޖެއްސުމާގުޅޭގޮތުން އެ ޤައުމުގެ ކަމާބެހޭ ފަރާތްތަކާ ފޮރިން މިނިސްޓްރީން މަޝްވަރާކުރަމުންދާކަމަށްވެސް އެމިނިސްޓްރީން ބުނެއެވެ.
