ފޮރިން މިނިސްޓަރ ޚަލީލު އޮމާން ގެ ފޮރިން، ފައިނޭންސް މިނިސްޓަރުންނާ ބައްދަލު ކުރައްވައިފި
މި ދަތުރުފުޅު ކުރައްވަނީ އޮމާނުގެ ޚާރިޖީ ވަޒީރު ސައްޔިދު ބަދުރު ބިން ހަމަދު ބިން ހަމޫދު އަލްބުސައިދީގެ ދަޢުވަތަކަށް ކަމަށް ފޮރިން މިނިސްޓްރީން ބުނޭ
ރާއްޖޭގެ ފޮރިން މިނިސްޓަރ އަބްދުﷲ ޚަލީލު އޮމާންގެ ޚާރިޖީ ވަޒީރު ބަދްރު އަލްބުސައިދީ އާ ވަނީ ބައްދަލު ކުރައްވާފައި
ދިވެހިރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް، އޮމާނަށް ރަސްމީ ދަތުރުފުޅެއް ފައްޓަވައިފިއެވެ. މި ދަތުރުފުޅަކީ މިހިނގާ ޑިސެމްބަރު 10 ން 13 ށް ކުރައްވާ ދަތުރުފުޅެއް ކަމަށާއި، މި ދަތުރުފުޅު ކުރައްވަނީ އޮމާނުގެ ޚާރިޖީ ވަޒީރު ސައްޔިދު ބަދުރު ބިން ހަމަދު ބިން ހަމޫދު އަލްބުސައިދީގެ ދަޢުވަތަކަށް ކަމަށް ފޮރިން މިނިސްޓްރީން ބުނެފައިވެއެވެ.
މިނިސްޓަރ ޚަލީލު ވަނީ ބުދަ ދުވަހު އޮމާނުގެ ޚާރިޖީ ވަޒީރު ސައްޔިދު ބަދުރު އަލްބުސައިދީ އާއި އޮމާނުގެ މާލީ ވަޒީރު ސުލްޠާން ބިން ސާލިމް ބިން ސަޢީދު އަލްހަބްސީއާ ވަކި ވަކިން ބައްދަލުކުރައްވާފައެވެ.
ރާއްޖޭގެ ފޮރިން މިނިސްޓްރީން ހާމަކޮށްފައިވާ ގޮތުގައި މި ބައްދަވުން ތަކުގައި ވިޔަފާރި، ފަތުރުވެރިކަން، އަދި ތަޢުލީމީ ރޮނގުން އެއްބާރުލުން ދިނުމާއި އަދި އިންވެސްޓްމަންޓް ކުރިއެރުވުމާއި ދެގައުމުގެ ރައްޔިތުންގެ މެދުގައި ގުޅުން ބަދަހިކުރުމުގެ ތެރެއިން ދިވެހިރާއްޖެ އާއި އޮމާނުގެ ގުޅުން ވަރުގަދަކުރުމާ ބެހޭގޮތުން މަޝްވަރާކުރެވުނު ކަމުގައެވެ.
މިނިސްޓަރ ޑރ. ޚަލީލްގެ މި ދަތުރުފުޅުގައި މިނިސްޓްރީ އޮފް ފޮރިން އެފެއާޒްގެ ވަފުދެއް ބައިވެރިވެވަޑައިގަންނަވައެވެ.
