ޕާކިސްތާނުގައި ހުންނަވާ ސަފީރު ތާލިބާނުގެ މަންދޫބަކާއި ބައްދަލުކުރުމުން އެޅި ފިޔަވަޅު ސާފެއް ނޫން

ދިވެހިރާއްޖެއިން ޕާކިސްތާނަށް ކަނޑައަޅާފައިވާ ސަފީރު މުހައްމަދު ތޯހާ އަފްޣާނިސްތާނުގައި ވެރިކަން ކުރާ ތަލިބާނު ސަރުކާރުގެ ފަރާތުން ޕާކިސްތާނުގައި ހުންނަވާ މަންދޫބަކާ ބައްދަލުކުރުމާއި ގުޅިގެން ފިޔަވަޅު އަޅާފައިވާ ކަމަށް ފޮރިން މިނިސްޓްރީން ބުނެފިއެވެ.

އެހެންނަމަވެސް ފޮރިން މިނިސްޓަރާއި އެ މިނިސްޓްރީގެ މީޑިއާ އޮފިޝަލުންނަށް ގުޅައިގެން އެ މިނިސްޓްރީން އެޅި ފިޔަވަޅެއް ސާފުކުރުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.

ފޮރިން މިނިސްޓްރީން ނެރުނު ބަޔާނެއްގައި ބުނެފައި ވަނީ އެ ބައްދަލުވުމަކީ ދިވެހި ސަރުކާރުގެ ހުއްދައާއެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށެވެ. އެހެންކަމުން އެކަމާ ގުޅިގެން ދިވެހި ސަރުކާރުގެ ފަރާތުން އަޅަންޖެހޭ ފިޔަވަޅު އަޅާފައިވާނެ ކަމަށް ބުނެފައިވެއެވެ. ނަމަވެސް އެޅި ފިޔަވަޅެއްގެ ތަފްސީލް އެއް ބަޔާންކޮށްފައެއް ނުވެއެވެ. އަދި އެޅި ފިޔަވަޅު ދެމިގެންދާނީ ކިހާ މުއްދަތަކަށް ކަން ސާފުކޮށްދީފައެއް ނުވެއެވެ. މިނިސްޓްރީން ބުނެފައި ވަނީ ދިވެހިރާއްޖޭން ޤައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއް އޮތް ނަމަ އަބަދުވެސް ބަލަނީ އދ.އިން ކަނޑައަޅާފައިވާ މިންގަޑުތަކާއި އުޞޫލުތަކުގެ މައްޗަށް ކަމަށެވެ. އދ.ގައި އަފްޣާނިސްތާނު ތަމްސީލުކުރާ ފަރާތަކީ އަފްޣާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ބަލައިގަންނަ ފަރާތް ކަމަށް ވެސް އެ މިނިސްޓްރީން ވަނީ ބުނެފައެވެ.

އދ.ގައި އަފްޣާނިސްތާނު ތަމްސީލު ކުރަމުން ދަނީ ތަލިބާނުން ހަނގުރާމަކޮށްގެން އެ ގައުމުގެ ވެރިކަން ހޯދުމުގެ ކުރިން އޮތް ސަރުކާރުން ކަނޑައަޅާފައިވާ މަންދޫބުކަން ފާހަގަކޮށްލެވެއެވެ. އަދި ތާލިބާނުން އެކުލަވާލި ސަރުކާރުން އދ.އަށް ކަނޑައެޅި މަންދޫބު އދ.އިން ބަލައިގަނެފައެއް ނުވެއެވެ.