އިސްރާއީލުން މުޅި ޣައްޒާ ބަންދުކުރިކުރުން އދ.ން ކުށްވެރިކޮށްފިއެވެ.

އިސްރާއީލުން ވަނީ ޣައްޒާއަށް ދެމުންދާ ހަމަލާތައް ވަރުގަދަކޮށް، މުޅި ޣައްޒާ ހިފުމަށް ކުރަމުންދާ މަސައްކަތުގައި، ޣައްޒާ އެއްކޮށް ބަންދުކޮށް ޒަރޫރީ ޚިދުމަތްތައް ފޯރުކޮށްދިނުންވެސް ހުއްޓާލަން އިއުލާނުކޮށްފައެވެ.

އިސްރާއީލުން ވަނީ ޣައްޒާ ބަންދުކޮށް، ޣައްޒާއަށް ފެނާއި، ކާބޯތަކެއްޗާއި އަދި ކަރަންޓުފަދަ ޒަރޫރީ ޚިދުމަތްތައް ފޯރުކޮށްދިނުން ހުއްޓުވާފައެވެ.

އިސްރާއީލުގެ ޑިފެންސް މިނިސްޓަރު ޔޯވް ގަލަންޓް ވަނީ، އެގައުމުން ޣައްޒާއަށް ފޯރުކޮށްދެމުންދާ ކަރަންޓުގެ ޚިދުމަތް ކަނޑާލައި، ޣައްޒާއަށް ކާބޯތަކެއްޗާއި ތެޔޮ އެތެރެކުރުން މަނާކޮށް، މުޅި ޣައްޒާ ބަންދުކުރަން ނިންމާފައިވާކަމަށް ކަމަށް ހޯމަ ދުވަހު އިއުލާންކުރައްވާފައެވެ.

2.3 މިލިއަން މީހުންގެ އާބާދީއެއް އޮންނަ ޣައްޒާއަކީ މިވަގުތު ދުނިޔޭގައި އޮތް އެންމެ ބޮޑު ޖަލޭވެސް ބުނެވިދާނެއެވެ. އިސްރާއީލުން ދަނީ މުޅި ޣައްޒާ ބަންދުކޮށް ކޮންޓްރޯލް ކުރަމުންނެވެ. ޣައްޒާގެ ވައިގެ ސަރަހައްދާއި ކަނޑު ކޮންޓްރޯލް ކުރަނީ އިސްރާއީލުންނެވެ. އެއްގަމުން ޣައްޒާގެ ދެ ބޯޑަރެއް ބަންދުކޮށް ކޮންޓްރޯލްކުރަނީ އިސްރާއީލެވެ. ތިންވަނަ ބޯޑަރަކީ މިސްރުގެ އަތްދަށުގައި އޮތް ސަރަހައްދެކެވެ.

މިކަމާ ގުޅިގެން އދ.ގެ ސެކްރެޓަރީ ޖެނެރަލް ވަނީ އިސްރާއީލުގެ މި އަމަލު ކުށްވެރިކޮށް، މިގޮތަށް ޣައްޒާ ބަންދުކުރުމަކީ މިހާރުވެސް ހައްލު ނުކުރެވި، ބޮޑު މައްސަލައެއްގެ ގޮތުގައި އޮތްކަމެއް އިތުރަށް ގޯސްވެގެންދާނެ އަމަލެއްކަމަށް ވިދާޅުވެފައެވެ. އަދި މިއީ ކުއްލިއަކަށް އޮވެފައި ފެށުނު ކަމެއް ނޫންކަމަށާއި، މިއީ އެތައް އަހަރެއް ވަންދެން ހިސާރުކުރަމުން އައި އައުމުގެ ސަބަބުން ވީކަމެއް ކަމަށްވެސް އދ.ގެ ސެކްރެޓަރީ ޖެނެރަލް ވިދާޅުވިއެވެ.

އޮކްޓޫބަރު ހަތްވަނަ ދުވަހު، އިސްރާއީލުގެ ގަޑިން ހެނދުނު 06:30 ހާއިރު، ހަމާސްއިން އިސްރާއީލަށް އަމާޒުކޮށް ދިން ވައިގެ ހަމަލާތަކަކާއެކު، އިސްރާއީލުން ރައްދު ހަމަލާދޭން ފަށައި، ހަމާސްއާ ދެކޮޅަށް ވަނީ ހަނގުރާމަ އިއުލާނުކޮށްފައެވެ. ހޯމަ ދުވަހު، އިސްރާއީލުން ހަމާސް ޖަމާއަތާ ދެކޮޅަށް ރަސްމީކޮށް ހަނގުރާމަ އިއުލާނުކޮށްފައިވާއިރު، އެގައުމުން ވަނީ އަމާޒަކީ ހަމާސް ޖަމާއަތް އެއްކޮށް ފުހެލައި އިސްރާއީލުގެ ކޮންޓްރޯލުގެ ދަށަށް ޣައްޒާ ގެންދާނެކަމަށް ބުނެފައެވެ.

ހޮނިހިރު ދުވަހުން ފެށިގެން އިސްރާއީލުގެ އަސްކަރިއްޔާއިން ދަނީ ޣައްޒާގެ އެކި ސަރަހައްދުތަކަށް، ހުއްޓުމެއްނެތި ވަރުގަދަ ވައިގެ ހަމަލާތައް ދެމުންނެވެ. އިސްރާއީލުގެ އަސްކަރިއްޔާގެ އޮފިސަރުން ދަނީ ޣައްޒާއާއި އިސްރާއީލް ގުޅޭ ބޯޑަރު ސަރަހައްދުގައި ހުރި، ހަމާސްއިން ކޮންޓްރޯލް ނަގާފައިވާ އަވަށްތަކަށް އަރައި އެތަން ތަނަށް ހަމަލާދީ، އެ އަވަށްތަކުގެ ކޮންޓްރޯލް ނެގުމުގެ މަސައްކަތްވެސް ކުރަމުންނެވެ.

މި ހަނގުރާމައަށް ހަމާސް ޖަމާއަތުން ނަން ދީފައިވަނީ "އޮޕަރޭޝަން އަލް-އަގްސާ ފްލަޑް"ގެ ނަމުންނެވެ. އަދި އިސްރާއީލުން ވަނީ ރައްދު ހަމަލާތައް ދޭން ފަށައި، "އޮޕަރޭޝަން އަޔަން ސްވޯޑްސް" އިއުލާންކޮށްފައެވެ.