ދުނިޔޭގެ ފުރަތަމަ ލަގްޒަރީ އެއާލައިން ލޯންޗްކޮށް ރާއްޖެއިން ތާރީހުގެ ތެރެއިން ޖާގަހޯދައިފިއެވެ.

ހޯމަ ދުވަހު ތައާރަފް ކުރި އެ އެއަރލައިނަކީ ރާއްޖޭގެ ކުންފުންޏެއް ކަމަށްވާ ސިމްޑީ ގްރޫޕާއި ޔޫއޭއީގެ އަރަބެސްކް ކުންފުންޏާ ގުޅިގެން ތައާރަފްކޮށްފައިވާ އެއަރލައިނެކެވެ.

މި އެއާލައިންގެ ފުރަތަމަ ފްލައިޓް ރާއްޖޭގެ ވެލާނާ އިންޓަނޭޝަނަލް އެއާޕޯޓުގައި ޖައްސާފައި ވަނީ ރާއްޖެ ގަޑިން މެންދުރު 12:30 އެހާއިރެވެ. އެއާއި އެކު އެ ފްލައިޓަށް ވަނީ ފެނުގެ ކުރުނީހެއް އަރުވާފައެވެ. 44 ސީޓުގެ މި ފްލައިޓް އެކުލެވިގެން ވަނީ މުޅިން ބިޒްނަސް ކްލާސް ސީޓުތަކުގެ މައްޗަށެވެ. ފްލައިޓްގެ އޮޕަރޭޝަން މަރުހަލާ ކުރިއަށް އޮތް ނޮވެމްބަރު މަހުގެ ތެރޭގައި ފެށުމަށް މަސައްކަތްކުރަމުންދާއިރު އެންމެ ފުރަތަމަ އޮޕަރޭޝަން ފަށަން ހަމަޖެހިފައި ވަނީ ޖުމްލަ ތިން މަންޒިލާއި އެކުގައެވެ. އޭގެ ތެރޭގައި ހިމެނެނީ ސުވިޓްޒަލޭންޑުގެ ޒޫރިކް އާއި ޖަރުމަނުގެ މިޔުނިކް އާއި ސައުދިއަރަބިޔާގެ ރިޔާދެވެ. އެއަށް ފަހު ބިއޯންޑްގެ ދެ ވަނަ ފްލައިޓު ފަށާނީ އިޓަލީގެ މިލާން އާއި ތައިލެންޑުގެ ބެންކޮކް އަދި ދުބާއީއަށް އެއަށް ފަހު ބެއިޖިން އަދި ޝެންހާއިގެ ދަތުރުތައް ފެށުމަށް ވެސް ވަނީ ހަމަޖެހިފައެވެ.

ދަތުރުތަކުގައި ބޭނުންކުރާނީ އޭ-320 ފެމިލީގެ ބޯޓުތައް ކަމަށް ވާއިރު މި ފްލައިޓް ބައްޓަންކޮށްފައި ވަނީ ފަސޭހަ، އަރާމު ދަތުރަކަށްމަގުފަހިވާނެ ގޮތަކަށެވެ. ޕްރިމިއަމް ކޮމްފަޓް ސީޓުތައް އެކުލެވޭ މި އެއަރލައިނުގެ ޚިދުމަތް ކުރިއަށް އޮތްތަނުގައި އިތުރަށް ފުޅާކުރުމަށް ވަނީ ޕްލޭންކޮށްފައެވެ. އެގޮތުން ކުރިއަށް އޮތް ފަސް އަހަރު ފްލީޓު ބޮޑުކުރުމުގެ އިތުރުން ދަތުރުކުރާ މަންޒިލްތައް ގިނަކުރުމަށް ވަނީ ހަމަޖެހިފައެވެ. އަގުތަކަށް ބަލާއިރު މެދުއިރުމަތީގެ ގައުމުތަކުގެ އަގުތަށް ފެށެނީ 2000 ޑޮލަރުންނެވެ. އަދި ޔޫރަޕުގެ ގައުމުތަކަށް ކަނޑައަޅާފައިވާ އަގުތައް ފެށެނީ 3800 ޔޫރޯއިންނެވެ. ބިއޯންޑުގެ މައި ހަބަކީ ރާއްޖެއެވެ.