އަމާޒަކީ ދުނިޔޭގެ ފުރަތަމަ ލަގްޒަރީ އެއަރލައިން ބިއޯންޑްގެ 50 އިންސަތައަކީ ދިވެހި މުވައްޒަފުންނަށް ހެދުންކަމަށް ސިމްޑީގެ ސީއީއޯ ޑރ. މަރިޔަމް ޝަކީލާ ވިދާޅުވެއްޖެއެވެ.
އޭނާ މިފަދައިން ވިދާޅުވީ ހޯމަ ދުވަހު ދުނިޔޭގެ ފުރަތަމަ "އޯލް ޕްރިމިއަމް" ނުވަތަ ލެޝަރ އެއަރލައިން ބިއޯންޑްގެ ދަތުރުތައް އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ހޯމަ ދުވަހު ތައާރަފް ކުރި އެ އެއަރލައިނަކީ ރާއްޖޭގެ ކުންފުންޏެއް ކަމަށްވާ ސިމްޑީ ގްރޫޕާއި ޔޫއޭއީގެ އަރަބެސްކް ކުންފުންޏާ ގުޅިގެން ތައާރަފްކޮށްފައިވާ އެއަރލައިނެކެވެ.
ޑރ.ޝަކީލާ ވިދާޅުވީ ބިއޯންޑްގެ ވަޒީފާތަކުގެ ތެރެއިން ދިވެހިން ކުރިމަތިލާ ވަޒީފާތަކަށް އެބޭފުޅުންގެ ޤާބިލްކަން ހުރި ވަރަކުން ދިވެހިން ނަގާނެ ކަމަށެވެ. އަދި ކަނބަލުންގެ ދައުރު އެ ދާއިރާގައި ފުޅާކުރުމަށް ވެސް އިސްކަން ދެއްވާނެ ކަމަށް އެކަމަނާ ވިދާޅުވިއެވެ. ރާއްޖޭގެ ހިއްސާ އާއި އެކު ދުނިޔޭގެ ފުރަތަމަ ލަގްޒަރީ އެއަރލައިން ތައާރަފްވުމަކީ މުޅި ރާއްޖެ އަށް ވެސް ލިބުނު އުފަލެއް ކަމަށް އެކަމަނާ ވަނީ ފާހަގަކުރައްވާފައެވެ. މީގެ އިތުރުން މިއީ މުޅި ދުނިޔޭގެ ސަމާލުކަން ރާއްޖެ އަށް ލިބޭނެ ކަމެއް ކަމަށް އެކަމަނާ ވަނީ ފާހަގަކުރައްވާފައެވެ.
ޑރ.ޝަކީލާ އިތުރަށް ވިދާޅުވީ ސިމްޑީ އަކީ މިހާރުވެސް ހޮސްޕިޓަލިޓީ ދާއިރާ ކުރިއަރުވާ އެ ސިނާއަތް ފުޅާކުރުމަށް މަސައްކަތްކުރަމުންދާ ކުންފުންޏެއް ކަަމަށެވެ. އެގޮތުން އެ ދާއިރާ އާއި ގުޅުން ހުރި ވިޔަފާރިތަކުގައި ސިމްޑީން ހަރަކާތްތެރިވާކަން ވަނީ ފާހަގަކޮށްފައެވެ. އަލަށް ތައާރަފްކުރާ ލަގްޒަރީ އެއަރލައިނާއި އެކު ރާއްޖޭގެ އޭވިއޭޝަން ދާއިރާ އާ ހަރުފަތަކަށް ގެންދެވޭނެ ކަމަށް ވެސް އޭނާ ވަނީ ފާހަގަކުރައްވާފައެވެ. މީގެ އިތުރުން މިއީ ރާއްޖޭގައި 1000 އަކަށް ވުރެ ގިނަ ވަޒީފާ އުފެދިގެންދާނެ ކަމެއް ކަމަށް ޑރ.ޝަކީލާ ވިދާޅުވިއެވެ.
ބިއޯންޑްގެ މެދުއިރުމަތީގެ ގައުމުތަކުގެ އަގުތަށް ފެށެނީ 2000 ޑޮލަރުންނެވެ. އަދި ޔޫރަޕުގެ ގައުމުތަކަށް ކަނޑައަޅާފައިވާ އަގުތައް ފެށެނީ 3800 ޔޫރޯއިންނެވެ. ބިއޯންޑުގެ މައި ހަބަކީ ރާއްޖެއެވެ.
