ސްޕެނިޝް ލީގުގައި ގްރަނަޑާއާ ދެކޮޅަށް ކުޅުނު މެޗުން ޗެމްޕިއަން ބާސެލޯނާ އެއްވަރުވެއްޖެ އެވެ.

އާދީއްތަ ދުވަހުގެ ރޭ ކުޅުނު މެޗު ނިމުނީ 2-2 އިން އެއްވަރުވެގެންނެވެ. މެޗުގައި ފުރަތަމަ ދެ ލަނޑު ޖަހައި ކުރި ހޯދާފައި ވަނީ ވެސް ގްރަނަޑާ އިންނެވެ. މެޗު ފަށައިގެން ފުރަތަމަ މިނެޓުގެ ތެރޭގައި ގްރަނަޑާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ  ބްރަޔަން ޒަރަގޯޒާ އެވެ. އޭނާ އެ ލަނޑު ޖެހީ ލޫކަސް ބޯޔީ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން ފުރަތަމަ ހާފުގެ 29 ވަނަ މިނެޓުގައި ޖެރާޑް ގުމްބާއު ތަނަވަސްކޮށްދިން ފުރުސަތެއްގައި ގްރަނަޑާގެ ދެ ވަނަ ލަނޑު ޖެހީ ވެސް  ބްރަޔަން ޒަރަގޯޒާ އެވެ. ފުރަތަމަ ހާފުގެ އިތުރު ވަގުތުގައި ބާސެލޯނާގެ ފުރަތަމަ ލަނޑު ޖަހައިދިނީ ޒުވާން ކުޅުންތެރިޔާ ލަމީން ޔަމާލް އެވެ. އެ ލަނޑާއެކު އޭނާ ވެފައި ވަނީ ސްޕެނިޝް ލީގުގައި ލަނޑު ޖެހި އެންމެ ޒުވާން ކުޅުންތެރިޔާ އަށެވެ. ބާސެލޯނާ އިން ދެ ވަނަ ލަނޑެއް ޖަހައި ނަތީޖާ ހަމަހަމަ ކުރީ މެޗުގެ ފުރިހަމަ ވަގުތު ހަމަވާން ފަސް މިނެޓަށްވެފައި ވަނިކޮށެވެ. ޑިފެންޑަރު އަލެހާންޑްރޯ ބާލްޑޭ ތަނަވަސްކޮށްދިން ފުރުސަތެއްގައި އެ ލަނޑު ޖެހީ ކެޕްޓަން ސާޖީ ރޮބާޓޯ އެވެ. މެޗުގައި އޭނާ ކުޅެން ނިކުމެފައި ވަނީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މި ނަތީޖާ އާއެކު ބާސެލޯނާ އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ކުޅުނު ނުވަ މެޗުން 21 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އޮތް ރެއާލް މެޑްރިޑަށް ލިބެނީ 24 ޕޮއިންޓެވެ. ދެ ވަނައިގައި އޮތް ޖިރޯނާ އަށް ލިބެނީ 22 ޕޮއިންޓެވެ.