10 ކުޅުންތެރިންނާއެކު ކުޅެ ޓޮޓެންހަމް އެއްވަނަ އަށް!

10 ކުޅުންތެރިންނާއެކު މެޗުގެ އެއްހާފް ކުޅެ, ޓޮޓެންހަމް އިނގިރޭސި ޕްރިމިއަރ ލީގު ތާވަލްގެ އެއްވަނަ އަށް ޖެހިލައިފިއެވެ.

ޗެމްޕިއަން ސިޓީއަށްވުރެ އިތުރަށް މެޗެއް ކުޅެގެން ޓޮޓެންހަމް އެއްވަނަ އަށް ޖެހިލީ ލޫޓަން ޓައުން 1-0 ން ބަލިކޮށްގެންނެވެ. ޓޮޓެންހަމް މެޗުން މޮޅުކޮށްދިން ލަނޑު 52 ވަނަ މިނިޓްގައި ޖެހީ ވެން ޑެ ވެން އެވެ. މިއީ ނެދަލެންޑްސްގެ ޑިފެންޑަރު ޓޮޓެންހަމް އަށް ޖަހައިދިން ފުރަތަމަ ގޯލެވެ. އޭގެކުރިން ފުރަތަމަ ހާފްގެ އިތުރު ވަގުތުގައި ދެވަނަ ރީނދޫ ކާޑާއެކު ބިސޫމާއަށް ރަތްކާޑް ދެއްކުމުން ޓޮޓެންހަމް ކުޅެމުން ދިޔައީ ދިހަ ކުޅުންތެރިންނާއެކުއެވެ.

މެޗުގައި ލަނޑު ޖެހި ވެން ޑެ ވެން ބުނީ މެޗުން މޮޅުކޮށްދޭން ލަނޑު ޖެހުމަކީ ޚާއްޞަ އިހުސާސެއްކުރެވޭ ކަމެއް ކަމަށެވެ. މެޗަށް ސްޓޭޑިއަމްއަށް ދިޔަ މަގުމަތީގައި ޓީމްގެ ކެޕްޓަން ސޮން އޭނާ ކައިރީ މިއަދު ޓީމަށް ފުރަތަމަ ލަނޑު ޖަހައިދޭންވާނެކަމަށް ބުނިކަންވެސް ވެން ޑެ ވެން ފާހަގަކުރިއެވެ.

މިމޮޅާއެކު ޓޮޓެންހަމް ލީގު ތާވަލްގެ އެއްވަނާގައި އޮތީ އަށް މެޗުން 20 ޕޮއިންޓާއެކުއެވެ. ދެވަނާގައި ސިޓީ އޮތީ ހަތް މެޗުން 18 ޕޮއިންޓާއެކުއެވެ. އަލުން އެއްވަނަ ހޯދަން މާދަމާ ބަލިކުރަން ޖެހޭނީ އާސެނަލްއެވެ.