ޤައުމީ ފެންވަރުގައި ސައިބަރ ވެށި ރައްކާތެރިކުރުމުގެ ސްޓްރެޓެޖީއެއް އޮންނަންޖެހޭ: ޓެކްނޮލޮޖީ މިނިސްޓްރީ

ޤައުމީ ފެންވަރުގައި ސައިބަރ ވެށި ރައްކާތެރިކުރުމުގެ ސްޓްރެޓެޖީއެއް އޮންނަންޖެހޭކަމަށް މިނިސްޓްރީ އޮފް އެންވަޔަރމަންޓް، ކްލައިމެޓް ޗޭންޖް އެންޑް ޓެކްނޮލިޖީގެ ސްޓޭޓު މިނިސްޓަރ އަހުމަދު ޝަރީފް ވިދާޅުވެއްޖެއެވެ.

ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ޝަރީފް ވިދާޅުވީ، ޤައުމީ ފެންވަރުގައި ސައިބަރ ވެށި ރައްކާތެރިކުރުމުގެ ސްޓްރެޓެޖީއަކީ އޮންނަންޖެހޭ އެއްޗެއް ކަމަށެވެ. އަދި އެއީ މިއަދު ކޮންމެހެންވެސް ބޭނުންވާ އެއްޗެއްކަން ޝަރީފް ފާހަގަ ކުރެއްވިއެވެ.

ޝަރީފް ވިދާޅުވީ، ސައިބަރ ވެށީގެ ހަނގުރާމައިގެ ވާހަކައަކީ މިއަދު އާ ވާހަކައެއް ނޫން ކަމަށާއި، އެ ވާހަކަވެސް އެތައް ބަޔަކު ދައްކާ ކަމަށެވެ.

ވީއިރު، އެކިއެކި ސިނާއަތްތައް ޑިޖިޓަލައިޒްވަމުންދާއިރު، ސައިބަރ ވެއްޓަށް ވިސްނަންޖެހޭކަން އޭނާ ފާހަގަކުރެއްވިއެވެ.

ޝަރީފް ވަނީ އެކަމުގެ މިސާލުތައްވެސް ހިއްސާކުރައްވާފައެވެ. އެގޮތުން 2017 ވަނަ އަހަރު އައި އެފަަދަ ސައިބަރ ޙަމަލާއެއްގައި ހަފްތާއެއްވަންދެން އިންޓަނެޓަށް ބުރޫއެރިކަން އޭނާ ފާހަގަ ކުރެއްވިއެވެ.

ޝަރީފް ވިދާޅުވީ، ސައިބަރ ޙަމަލާތަކުން ރައްކާތެރިވެވޭނެ ގޮތްތައް ޤައުމީ ފެންވަރުގައި ހޯދަންޖެހޭކަމަށެވެ. އަދި ޙަމަލާއެއް ދިމާވުމުން، ދެން ކަންކަން ކުރާނެ ގޮތްތަކަކާއި ޙައްލުތަކެއްވެސް ޤައުމީ ފެންވަރުގައި ހޯދަންޖެހޭކަމަށް އޭނާ ވިދާޅުވިއެވެ.