ދިވެހި މުޖުތަމައުގައި ސައިބަރ ކްރައިމްގެ ކުށްތައް ފުޅާވަމުންދާ ދިއުން ހުއްޓުމަކަށް ގެންނަންޖެހޭ: ކޮމިޝަނަރ ޝުޖާއު
މުޖުތަމައުގައި ދިރިއުޅޭ ފަރުދުން ސައިބަރ ކްރައިމްގެ ޝިކާރައަކަށްވެ، ފޫނުބެއްދޭ ވަރުގެ އަގު ބޮޑެތި ގެއްލުންތައް ލިބޭ
''ސައިބަރ އެކްސްޕޯ 2024'' ވެބްސައިޓް ލޯންޗުކުރުމަށް ބޭއްވި ރަސްމިއްޔާތުގައި ކޮމިޝަނަރ އޮފް ޕޮލިސް އަލީ ޝުޖާއު ވާހަކަދައްކަވަނީ
ދިވެހި މުޖުތަމައުގައި ސައިބަރ ކްރައިމްގެ ކުށްތައް ފުޅާވަމުންދާ ދިއުން ހުއްޓުމަކަށް ގެންނަންޖެހޭ ކަމަށް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
''ސައިބަރ އެކްސްޕޯ 2024'' ވެބްސައިޓް ލޯންޗުކުރުމަށް ބޭއްވި ރަސްމިއްޔާތުގައި ކޮމިޝަނަރ ޝުޖާއު ވިދާޅުވީ ސައިބަރ އެކްސްޕޯ 2024 އަކީ ޓެކްނޮލޮޖީގެ ގޮތުން ކުރިއަރަމުން އަންނަ ދުނިޔޭގައި މި އިންޑަސްޓްރީގައި މަސައްކަތްކުރާ ފަރާތްތަކާއި، ކަމުވޮށިގެންވާ ފަރާތްތައް އެއްތަނަކުން ބައްދަލުވެ، ގުޅުން ބަދަހިކުރުމަށް ލިބުނު އައު ހިތްވަރަކަށްވާނެ ކަމަށެވެ. އަދި މި ދިވެހި މުޖުތަމައުގެ ހާލަތަށް ބަލާއިރު ސައިބަރ ކްރައިމްގެ ކުށްތައް ފުޅާވަމުންދާ ދިއުން ހުއްޓުމަކަށް ގެންނަންޖެހޭ ކަމަށް ވިދާޅުވިއެވެ.
މިއަދު ހުރިހާ މަސައްކަތްތަކެއް ވެސް ޑިޖިޓަލްކުރަމުންދާކަން ފާހަގަކުރައްވައި ކޮމިޝަނަރ ޝުޖާއު ވިދާޅުވީ މުޖުތަމައުގައި ދިރިއުޅޭ ފަރުދުން ސައިބަރ ކްރައިމްގެ ޝިކާރައަކަށްވެ، ފޫނުބެއްދޭ ވަރުގެ އަގު ބޮޑެތި ގެއްލުން ލިބި ޑާޓާތައް ގެއްލިގެންދާ ކަމަށެވެ. މިކަމުގެ ސަބަބުން ދިރިއުޅުމުގައި ތަކުލީފުތައް އުފަލަންޖެހޭ ފަހަރު ވެސް އަންނަ ކަމަށާއި، މި މައްސަލަ ހައްލު ކުރުމަށް މަސައްކަތް ކުރަންޖެހޭ ކަމަށް ކޮމިޝަނަރ ޝުޖާއު ވިދާޅުވިއެވެ.
މީގެ އިތުރުން މައުލޫމާތު ހިއްސާކުރުމަށް ނިޒާމުތައް ކަނޑައެޅުމާއި، ސައިބަރ ކްރައިމްގެ ނުރައްކާތަކާއި، ޑިޖިޓަލް ސެކިއުރިޓީގެ ވަލްނަރަބިލިޓީސްތައް ދެނެގަތުމާއި، މިކަންކަން ހައްލުކުރުމަށް ރައްޔިތުންނާ ގުޅިގެން މަސައްކަތްކުރުމަށް ކޮމިޝަނަރ ޝުޖާއު އެދިލެއްވިއެވެ.
އެގޮތުން ރައްކާތެރި ސައިބަރ ވެއްޓެއް ގާއިމުކުރުމަށް ޕަބްލިކް އަދި ޕްރައިވެޓް ސެކްޓާގައި މަސައްކަތްކުރާ ފަރާތްތައް އެކުގައި މަސައްކަތްކޮށް، ބެސްޓް ޕްރެކްޓިކްސްތަކާ ޕޮލިސީސްތައް ތައްޔާރުކޮށް ރައްކާތެރި ޑިޖިޓަލް މާހައުލެއް ގާއިމުކުރުމަށް ލަނޑުދަނޑި ކަނޑައެޅުން ވަރަށް މުހިންމުކަމަށް ވެސް ކޮމިޝަނަރ ޝުޖާއު ވިދާޅުވިއެވެ. އަދި ދިވެހި ރައްޔިތުންގެ އަމާޒަކަށްވާންވީ، ސައިބަރ ސެކިއުރިޓީގެ ފަންނުވެރިން މަދުއިރު، މިދާއިރާއަށް އައު ފަންނުވެރިން ތައާރަފުކޮށް ހިތްޖެއްސުން ކަމަށާއި ސައިބަރ ސެކިއުރިޓިއަށާއި، ސައިބަރ ކްރައިމްގެ އެންމެހައި ކަންތައްތަކަށް މީހުން އަހުލުވެރިކުރުން ކަމަށްވެސް ކޮމިޝަނަރ ޝުޖާއު ވިދާޅުވިއެވެ.
