ބަރަހަނާ ފޮޓޯ ވީޑިއޯ ޝެއަރކޮށް އެ ހޯދަން އުޅުނު މީހުންނަށް ވެސް ފިޔަވަޅު އަޅާނަން - ފުލުހުން
ފައިސާ ދައްކައިގެން ޗެނަލްތަކަށް ސަބްސްކްރައިބް ކުރި ފަރާތްތަކާއި މެދު ފިޔަވަޅު އަޅަން ފަހަތަށް ނުޖެހޭނެ
ނޫސްވެރިންގެ ބައްދަލުވުމުގައި އިނިސްޕެކްޓަރ އޮފް ޕޮލިސް އަޒީފް އައްބާސް މައުލޫމާތު ދެއްވަނީ
ބަރަހަނާ ފޮޓޯ ވީޑިއޯ ހުރި ޗެނަލްތަކަށް ސަބްސްކްރައިބްކޮށް، ބަރަހަނާ ފޮޓޯ ވީޑިއޯ ޝެއަރކޮށް އެ ހޯދަން އުޅުނު މީހުންނަށް ވެސް ފިޔަވަޅު އަޅާނެ ކަމަށް ފުލުހުން ބުނެފިއެވެ.
ޓެލެގްރާމުގައި ގިނައަދަދެއްގެ ޗެނަލް ކްރިއޭޓްކޮށް ރާއްޖެއާއި ރާއްޖެއިން ބޭރުގެ އެކި މީހުންގެ ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ، އެ ޗެނަލްތައް މެދުވެރިކޮށް ޕޯސްޓުކޮށް ވިޔަފާރީގެ އުސޫލުން މާލީ މަންފާ ހޯދަމުންގެންދާ މައްސަލައާ ގުޅިގެން ފުލުހުންގެ ސައިބަރ ކްރައިމް ސެންޓަރުން ހިންގި އޮޕަރޭޝަނުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި އިނިސްޕެކްޓަރ އޮފް ޕޮލިސް އަޒީފް އައްބާސް ވިދާޅުވީ ޗެނަލްތަކުގައި ހުރީ ކޮންކަހަލަ ބާވަތެއްގެ ފޮޓޯ ވީޑިއޯއެއްކަން އެންމެންނަށްވެސް އެނގޭނެ ކަމަށާއި، ޗެނަލްތަކުގެ މައްސަލައަށް ބަލާއިރުވެސް އެ ޗެނަލްތަކުގައި 18 އަހަރުން ދަށުގެ ކުދިންގެ ފޮޓޯ ވީޑިއޯ ހުރިކަމަށެވެ. އަދި ފައިސާ ދައްކައިގެން ޗެނަލްތަކަށް ސަބްސްކްރައިބް ކުރި ފަރާތްތަކާއި މެދު ފިޔަވަޅު އަޅަން ފަހަތަށް ނުޖެހޭނެ ކަމަށެވެ.
އަޒީފް ވިދާޅުވީ ޗެނަލްތަކަށް ސަބްސްކްރައިބް ކޮށްފައި ތިބި ފަރާތްތަކުގެ އިތުރުން ޗެނަލްގައި ހުރި ފޮޓޯ ޝެއަރކޮށް، އެ ފޮޓޯތައް ހޯދަން މަސައްކަތްކުރި ފަރާތްތަކާއި މެދުވެސް ގާނޫނީ އިމުގެ ތެރެއިން ފިޔަވަޅު އަޅާނެ ކަމަށެވެ.
އަޒީފް ވިދާޅުވީ ބަރަހަނާ ފޮޓޯ ވީޑިއޯ ހޯދާގޮތް ޒުބައިރު އަލީގެ ފޯނުން ތަހުގީގުތަކަށް ވަރަށް ސާފުކޮށް ފެންނަން އެބަހުރި ކަމަށެވެ. އަޒީފް ވިދާޅުވީ ޗެނަލް ހިންގަކަން ފެބްރުއަރީ މަހުގައި ފާހަގަކުރެވިފައިވާ ކަމަށާއި، މައްސަލަ ހުށަހެޅިފައިވަނީ އެޕްރީލް މަހުގައި ކަމަށެވެ. އަދި މައުލޫމާތު ލިބިގެން ހެކި ގަރީނާ ހޯދަން ގިނަ ވަގުތު ނެގި ކަމަށާއި، ގިނަ މަސައްކަތްތަކެއް ކުރެވުނު ކަމަށެވެ.
އަދި ކުރިއަށް އޮތްތަނުގައިވެސް މިފަދަ ޗެނަލްތައް ދެނެގަނެ އަޅަންޖެހޭ ފިޔަވަޅުތައް އަޅަމުންދާނެ ކަމަށް އަޒީފް ވިދާޅުވިއެވެ.
މި މައްސަލައިގައި 3 މީހަކު ހައްޔަރުކޮށް ތިން މީހުން ހައްޔަރުކޮށް މައްސަލައާ ގުޅުން ހުރި ޑިޖިޓަލް އިލެކްޓްރޯނިކް 14 އާލާތް ބަލައި ފާސްކޮށްފައިވާ ކަމަށެވެ. އަދި މި ތިންމީހުންގެ ނަމުގައި ހަދާފައިވާ ޓެލެގްރާމް 9 އެކައުންޓު ފުލުހުންގެ ބާރުގެދަށަށް ގެނެސް ސީޒް ކޮށްފައިވެއެވެ.
އޭގެ އިތުރުން، ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ ހިމެނޭ 571 ޗެނަލް ފުލުހުންގެ ބާރުގެ ދަށަށް ގެނެސް ސީޒް ކޮށްފައިވެއެވެ. ފުލުހުން މައުލޫމާތު ދޭ ގޮތުގައި މި ޗެނަލްތަކުގައި ރާއްޖޭގެ އަންހެނުންގެ ބަރަހަނާ މަންޒަރު ދައްކުވައިދޭ 241651 ފޮޓޯއާއި 86618 ވީޑިއޯ (18 އަހަރުން ދަށުގެ ކުޑަކުދިންގެ ފޮޓޯ އާއި ވީޑިއޯ ހިމެނޭހެން) ޕޯސްޓުކޮށްފައިވާކަން ފުލުހުންގެ ތަހުގީގަށް ފާހަގަކުރެވިފައިވެއެވެ.
އަދި ކުޑަކުދިންގެ އޮރިޔާން މަންޒަރު ދައްކުވައިދޭ ފޮޓޯއާއި ވީޑިއޯ ޕޯސްޓުކުރުމަށް 43 ޗެނަލް ހިންގާފައިވާކަން ވެސް ތަހުގީގަށް އެނގިފައިވެއެވެ. މި ޗެނަލްތަކަށްވަދެ ފައިސާ ދައްކައިގެން 34680 މީހުން ޗެނަލްތަކަށް ސަބްސްކްރައިބްކޮށްފައިވާކަމާ އަދި މި މައްސަލާގައި ތުހުމަތުކުރެވޭ ފަރާތްތަކުން ސަބްސްކްރިޕްޝަން ފީގެގޮތުގައި 2 މިލިޔަނެއްހާ ރުފިޔާ އާމްދަނީއެއް ނަހަމަގޮތުގައި ހޯދާފައިވާކަން ވެސް ތަހުގީގަށް އެނގިފައިވެއެވެ.
