މަގާމުތައް ލިބުނީމާ ފިނި ކޮޓަރިއަށް ވަދެ ކަންކަން ހަނދާން ނެތޭ ބޭފުޅުން ވަރަށް ގިނަ - ޔާމީން
ބޮޑެތި ގޮނޑިތަކުގައި ތިބި ބޭފުޅުންނަށް އެ ފަސޭހަތަކެއް ލިބިގެންދިޔައީ ރައީސް ޔާމީނާއި ޓީމް ކުރި މަސައްކަތުން
އިންތިޚާބީ ރައީސް ޑރ. މުހައްމަދު މުއިއްޒު އާއި ކުރީގެ ރައީސް އަބްދުﷲ ޔާމީން
މަގާމުތައް ލިބުނީމާ ފިނި ކޮޓަރި އަށް ވަދެ ކަންކަން ހަނދާން ނެތޭ ބޭފުޅުން ވަރަށް ގިނަ ކަމަށް ވިދާޅުވެ، އިންތިޚާބީ ރައީސް ޑރ. މުހައްމަދު މުއިއްޒުއަށް ކުރީގެ ރައީސް އަބްދުﷲ ޔާމީން ނުސީދާކޮށް ފާޑު ވިދާޅުވެއްޖެއެވެ.
ޖަލު ހުކުމެއްގައި ހުންނަވަނިކޮށް ގެއަށް ބަދަލުކޮށްފައިވަނިކޮށް، ބުދަ ދުވަހުގެ ރޭ އެމަނިކުފާނަށް ފަރިވަޅުއެރުވުމަށް ދިޔަ ސަޕޯޓަރުންނާއި ކުޑަދޮރުކައިރީގައި ހުންނަވައިގެން ވާހަކަފުޅުފައްކަވަމުން ޔާމީން ވިދާޅުވީ މިހާރުވެސް ފެނިގެން މިދަނީ އެތައް މަސައްކަތެއް ކުރުމަށްފަހުގައި، ގޭގައި ހުންނަންޖެހުނީމަ ނޫނިއްޔާ ޖަލަށްލީމަ އާދައިގެ އާންމު ރައްޔިތުންތަކެއް، އެމަނިކުފާނު ދެކެ ލޯބިވާ ރައްޔިތުންތަކެއް ނުކުންނަތަން ކަމަށެވެ.
ނަމަވެސް ބޮޑެތި ގޮނޑިތަކުގައި ތިއްބެވި ބޭފުޅުންނަށް އެ ފަސޭހަތަކެއް ލިބިގެންދިޔައީ ރައީސް ޔާމީނާއި ޓީމް ކުރެއްވި މަސައްކަތުން ކަމަށެވެ.
ޔާމީން މިފަދައިން ވިދާޅުވެފައިވަނީ އިންތިޚާބީ ރައީސް ޑރ. މުހައްމަދު މުއިއްޒު، ޔާމީން ރީތި ގޮތުގައި މިނިވަން ކުރުމުގެ ފުރުސަތު އެ މަނިކުފާނަށް ދެއްވައި، މަގުމަތީ ހަރަކާތްތަކާއި އެއްވުންތައް ނުބޭއްވުމަށް ސަޕޯޓަރުންނަށް އިލްތިމާސް ކުރައްވައިފައިވަނިކޮށެވެ. ނަމަވެސް އެރޭވެސް މަގުތަކަށް ނުކުމެ ރައީސް ޔާމީން މިނިވަންކުރުމަށް އިދިކޮޅު ސަޕޯޓަރުން ދިޔައީ ގޮވަމުންނެވެ.
ނަމަވެސް ޔާމީން ވަނީ މުއިއްޒުގެ މި ވާހަކަފުޅަށް ނުސީދާގޮތަކަށް ފާޑުވިދާޅުވެ، އެމަނިކުފާނާއި ސަޕޯޓަރުންގެ މަސައްކަތުން ފިނިކޮޓަރީގައި އިންނަން ފުރުސަތު ލިބުމުން ކަންކަން މަތިން ހަނދާންނެތޭކަމަށް ވިދާޅުވެފައެވެ.
ރައީސް ޔާމީން ވިދާޅުވީ މަޖިލީހަށް ނުކުމެވަޑައިގެން، ކެމްޕޭނަށް ވަޑައިގަންނަވާނީ ސަޕޯޓަރުން ކައިރިއަށް ކަމަށެވެ. ޓަކި ޖަހާނީ ސަޕޯޓަރުންގެ ގޭގޭގައި ކަމަށް، ގެކޮޅު ކައިރިއަށް ފަރިވަޅު ހިފައިގެން އައިސް ތިބި ސަޕޯޓަރުންނަށް އިޝާރާތްކުރައްވާ ވިދާޅުވިއެވެ.
ނަމަވެސް ސަޕޯޓަރުން މިއަދު މަގުމައްޗަށް ނުކުމެ ތިބީ އެމަނިކުފާނުގެ ހައްގުގައި ކަމަށާއި، މާލޭގެ ގޮނޑިތަކާއި ރަށްރަށުގެ ގޮނޑިތަކަށް ކުރިމަތިލައްވާ ބޭފުޅުންނާއި "އަޅުގަނޑުމެންގެ" ބޭފުޅުން ސަޕޯޓަރުން ކައިރިއަށް ވަޑައިގަންނަވާނެ ވޯޓު ހޯދަން ދާނެ ކަމަށެވެ. ޔާމީން ވިދާޅުވީ ނުކުމެ ތިބީ ގިނައިން ކަނބަލުން ކަމަށާއި، ތާއިދު ހޯދަން އަންނަ ފަރާތްތަކާއި ސަލާމްކުރައްވާ، ރައީސް ޔާމީންގެ ހައްގުގައި ތިމަންނަމެން ނުކުތީ މައިންބަފައިންނާއި ދަރިން އަދި ފިރިން ގޭގައި ދޫކޮށްލުމަށް ފަހު ކަމަށާއި މަގާމުތަކަށް ވަޑައިގަންނަވާ ބޭފުޅުން ތިއްބެވީ އެކިއެކި ފިނިކޮޓަރީގައި ކަމަށް ވިދާޅުވުމަށް ރައީސް ޔާމީން ވިދާޅުވިއެވެ.
އެމަނިކުފާނު ގެކޮޅަށް ބަދަލުކޮށްފައިވަނީ އާދިއްތަ ދުވަހުގެ ހަވީރުގެ ވަގުތެއްގައެވެ.
ޔާމީން ގެއަށް ބަދަލުކުރުމާއި ގުޅޭގޮތުން އިންތިޚާބީ ރައީސް ޑރ.މުއިއްޒު ވިދާޅުވީ މިއީ އަމިއްލަ މަސްލަހަތަށް ވުރެ ގައުމުގެ މަސްލަހަތު އިސްކުރަންވީ ވަގުތު ކަމަށާއި، މިވަގުތަކީ އެންމެން އެކަތިގަނޑަކަށް ވާންވީ ވަގުތު ކަމަށެވެ. އަދި ޔާމީން ގެއަށް ބަދަލުކުރެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ނިންމެވީ ގައުމުގެ މަސްލަހަތަށް ބައްލަވާފައި ކަމަށް އިންތިޚާބީ ރައީސް ޑރ. މުއިއްޒު ވިދާޅުވިއެވެ.
ކަރެކްޝަނަލް ސާވިސްއިން ބުނީ ޔާމީން ގެކޮޅަށް ބަދަލު ކުރަނީ ވަގުތީ ގޮތުން ކަމަށެވެ. އަދި އެ މަނިކުފާނު ހުންނެވީ ޖަލު ހުކުމެއްގައި ކަމަށްވާތީ އަމަލު ކުރަމުން ގެންދާނީ ގައިދީންނާމެދު އަމަލު ކުރާ އުސޫލުގެ މަތިން ކަމަށެވެ.
