ނިމިގެންދިޔަ ރިޔާސީ އިންތިޚާބުގައި ބާތިލު ވޯޓު ގިނަވި ސަބަބު ދެނެގަތުމަށް އިލެކްޝަންސް ކޮމިޝަނު(އީސީ)ން ދިރާސާއެއްކުރާނެކަމަށް އެކޮމިޝަނުގެ ނައިބު ރައީސް އިސްމާއީލު ހަބީބު ވިދާޅުވެއްޖެއެވެ.

ރިޔާސީ އިންތިޚާބުގެ ދެވަނަ ބުރުގެ ރަސްމީ ނަތީޖާ އިއުލާންކުރުމަށް ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހަބީބު ވިދާޅުވީ ދެވަނަ ބުރުގައި ފުރަތަމަ ބުރަށްވުރެ ބާތިލު ވޯޓު ގިނަކަމަށެވެ.

ސެޕްޓެމްބަރ މަހުގެ 9 ވަނަ ދުވަހު ބޭއްވި ރިޔާސީ އިންތިޚާބުގެ ފުރަތަމަ ބުރުގެ ރަސްމީ ނަތީޖާއަށް ބަލާއިރު ބާތިލު ވޯޓުގެ އަދަދަކީ 4835 އެވެ. ސެޕްޓެމްބަރ މަހުގެ 30 ވަނަ ދުވަހު ބޭއްވި ދެވަނަ ބުރުގެ ރަސްމީ ނަތީޖާއަށް ބަލާއިރު ބާތިލު ވޯޓުގެ އަދަދު ވަނީ 7888ށް މައްޗަށް ޖެހިފައެވެ.

އެކަމުގެ ކަންބޮޑުވުން ފާޅުކުރައްވަމުން ހަބީބު ވިދާޅުވީ މިހާތަނަށް އައިއިރު އަދި ބާތިލު ހުރިހާ ވޯޓެއް ފެނިވަޑައިގަންފައިނުވާކަމަށެވެ. ނަމަވެސް ބައެއް މީހުން ފޮނުވާފައިހުރި ފޮޓޯތަކަށް ބަލާއިރު ބައެއް ވޯޓު ބާތިލުވެފައިވަނީ ވޯޓު ކަރުދާހުގައި ކުރަހައިގެން ނުވަތަ ލިޔެގެންކަމަށެވެ. ނަމަވެސް ބައެއް ވޯޓު ކަރުދާސް ބާތިލުވެފައިވާ ގޮތަށް ބަލާއިރު ވަރަށް ހިތާމަކުރައްވާ ކަންކަން އެބަހުރިކަމަށް ހަބީބު ވިދާޅުވިއެވެ.

ހަބީބު ވިދާޅުވީ މީގެކުރީގެ އިންތިޚާބުތަކުގައި ވޯޓު ބާތިލުވެފައި ހުރި ގޮތްތަކާއި މިފަހަރު ބާތިލުވެފައި ހުރި ގޮތްތަކަށް ބަލާއިރު އައު ކަންކަން ފާހަގަކުރެވިފައިވާކަމަށެވެ. އެހެންކަމުން އެކަންކަމަކީ ދިރާސާ ކުރަންޖެހޭކަންކަންކަމަށާއި އެކަންކަން އީސީން ދިރާސާކުރާނެކަމަށް ހަބީބު ވިދާޅުވިއެވެ.

އެގޮތުން ވޯޓު ކަރުދާސް ނައްތާލުމުގެ ކުރިން ބާތިލު ވޯޓުތަކުގެ ކޮންމެސް މިންވަރެއް އީސީން ބަލާނެކަމަށް ހަބީބު ވިދާޅުވިއެވެ.

ހަބީބު ވިދާޅުވީ އީސީގެ ދިރާސާއަށްފަހު މިކަމަށް އާންމުން ހޭލުންތެރިކުރުމުގެ މަސައްކަތް ފަށާނެކަމަށެވެ. މީގެއިތުރުން އިންތިޚާބުތަކާއި ބެހޭ ގާނޫނުތަކަކީ މީގެ 15 ވަރަކަށް އަހަރު ކުރިން ހެދިފައިވާ ގާނޫނުތަކަކަށްވާއިރު މިޒަމާނަށް ފެތޭ ގޮތަށް ގަނޫނަށް ބަދަލުތަކެއްވެސް އަންނަންޖެހޭކަމަށް ހަބީބު ވިދާޅުވިއެވެ.

މިމަސައްކަތްކުރަންޖެހޭނީ އިންތިޚާބެއް ބޯމަތިވެފައި ނެތް ދުވަސްވަރެއްގައި ކަމަށާއި އެކަމާއި ގުޅޭގޮތުން ކަމާގުޅުންހުރި މުއައްސަސާތަކާއި ސިޔާސީ ޕާޓީތަކާއި އީސީން މަޝްވަރާތައް ކުރާނެކަމަށް ހަބީބު ވިދާޅުވިއެވެ.