ޕާޓީގެ 20 ވަނަ އަހަރީ ދުވަހުގެ ހަދިޔާއަކަށް ވާން ވާނީ މިފަހަރުގެ ލޯކަލް ކައުންސިލް އިންތިޚާބު ކާމިޔާބު ކުރުން: ޝާހިދު
20 ވަނަ އަހަރީ ދުވަހާއި ގުޅިގެން އެމްޑީޕީއަށް ދޭ ހަދީޔާއަކަށް ވާންވާނީ މިފަހަރުގެ ލޯކަލް ކައުންސިލް އިންތިޚާބު ބޮޑުތަނުން ކާމިޔާބުކުރުން
އެމްޑީޕީ ގައުމީ މަޖިލީހުގެ ޖަލްސާގައި އަބްދުﷲ ޝާހިދު ވާހަކަދައްކަވަނީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ 20 ވަނަ އަހަރީ ދުވަހުގައި، ޕާޓީއަށް ދޭ ހަދީޔާއަކަށް ވާން ވާނީ މިފަހަރުގެ ލޯކަލް ކައުންސިލް އިންތާބު ބޮޑުތަނުން ކާމިޔާބު ކުރުން ކަމަށް ކުރީގެ ފޮރިން މިނިސްޓަރ އަދި އެމްޑީޕީ ގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވެފައި ވަނީ ބުދަ ދުވަހުގެ ރޭ އެމްޑީޕީން ކުރިއަށް ގެންދިއަ އެ ޕާޓީގެ ގައުމީ މަޖިލީހުގެ ޖަލްސާގައި ވާހަކަދައްކަވަމުންނެވެ.
ޝާހިދު ވިދާޅުވީ ރައީސް މުއިއްޒުގެ މި ސަރުކާރަކީ ފަހަރެއްގައި ވެސް ލާމަރުކަޒީ ނިޒާމް ގަބޫލުކުރާ ސަރުކާރެއް ނޫން ކަމަށެވެ. އަދި އެކަން ގަބޫލުނުކުރާ ތާނގައި އެޓޯލްސް މިނިސްޓްރީ އުފައްދައިގެން އެ މިނިސްޓްރީގެ ދަށުން ރާއްޖޭގެ ރަށްތައް ހިންގުމުގެ ކަންތައް ހިންގަމުން ގެންދާ ބައެއް ކަމަށެވެ.
އަދި މިހާރު ވާހަކަތައް ދެކެވެމުން ދާގޮތަށް ބަލާއިރުގައި ރަށްރަށުގެ ކައުންސިލްތަކުގެ މެމްބަރުންގެ އަދަދު މަދުކުރުމުގެ ބޭނުމަކަށް ވެސް މިވަނީ އެ މަދުކުރާ އަދަދަށް ސްޓޭޓް މިނިސްޓަރުންނާއި ނައިބުންގެ ގޮތުގައި އެޓޯލްސް މިނިސްތްރީއަށް މީހުން ލުންކަމުގައި ގަބޫލުކުރައްވާ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ މިހާތަނަށް ރަށްރަށުގެ މައުލޫމާތުތައް ލިބޭ ގޮތުގައި މާލެއާއި އަދި ރާއްޖޭގެ އެކި ސިޓީތަކުގެ ރައްޔިތުންގެ ޝުއޫރުތައް އަދި އިހުސާސްތައް އެނގިފައިވާ މިންވަރުން މި ލޯކަލް ކައުންސިލް ވެގެންދާނީ މި ސަރުކާރު ބޮޑުތަނުން ބަލިވާ އިންތިޚާބަކަށް ކަމުގައެވެ.
މިހާތަނަށް ރަށްރަށުގެ މައުލޫމާތުތައް ލިބޭ ގޮތުގައި މާލެއާއި އަދި ރާއްޖޭގެ އެކި ސިޓީތަކުގެ ރައްޔިތުންގެ ޝުއޫރުތައް އަދި އިހުސާސްތައް އެނގިފައިވާ މިންވަރުން ބުނެލަން އޮތީ މި ލޯކަލް ކައުންސިލް ވެގެންދާނީ މި ސަރުކާރު ބޮޑުތަނުން ބަލިވާ އިންތިޚާބަކަށް. ބޮޑުތަނުން ބަލިވާނެ އިންތިޚާބަކަށްކުރީގެ ފޮރިން މިނިސްޓަރ އަދި އެމްޑީޕީ ގެ ރައީސް އަބްދުﷲ ޝާހިދު
ކަންމިހެން ހުރުމާއި އެކު އެމްޑީޕީން މިފަހަރުގެ ލޯކަލް ކައުންސިލް އިންތިޚާބަށް ތައްޔާރުވާން ޖެހޭނީ ފިސާރި ކެރިން ދުރާލައި ތައްޔާރުވެގެން އެންމެން އެކަތިގަނޑަކަށް ވެގެން ކަމުގައި ޝާހިދު ވިދާޅުވިއެވެ.
ޝާހިދު ވިދާޅުވީ އެމްޑީޕީގެ 20 ވަނަ އަހަރީ ދުވަހުގައި ޕާޓީއަށް ދޭ ހަދީޔާއަކަށް ވާން ވާނީ މިފަހަރުގެ ލޯކަލް ކައުންސިލް އިންތާބު ކާމިޔާބު ކުރުން ކަމަށެވެ. އެއީ އެމްޑީޕީން ކޮންމެހެންވެސް ކުރަން ޖެހޭކަމެއް ކަމުގައި ވެސް އޭނާ ވިދާޅުވިއެވެ.
