ވޯލްޑް ކަޕެއް ބޭއްވުމަކީ އަހަރަމެންނަށް ހުރިހާ ކަމެއް ހާސިލްވުން: ސައުދީ އެފްއޭ ރައީސް

ފީފާ ވޯލްޑް ކަޕެއް އެ ޤައުމުގައި ބޭއްވުމީ ހުރިހާ ކަމެއް ހާސިލްވުން ކަމަށް ސައުދީ އަރަބިޔާ ފުޓުބޯޅަ ފެޑެރޭޝަންގެ ރައީސް ޔާސިރު އަލް މިޝާލް ވިދާޅުވެއްޖެ އެވެ.

އޭނާ މިހެން ވިދާޅުވީ، 2034 ވަނަ އަހަރުގެ ފީފާ ވޯލްޑް ކަޕް ބޭއްވުމަށް ސައުދީން ބިޑު ކުރާނެކަން އިއުލާން ކުރުމާ ގުޅިގެންނެވެ. އޭނާ ވިދާޅުވީ، ސައުދީ އަކީ ކުޅިވަރު، ޚާއްސަކޮށް ފުޓުބޯޅަ އަށް ވަރަށް ބޮޑަށް ލޯބި ކުރާ ޤައުމެއް ކަމަށެވެ. އެހެންކަމުން އެ ޤައުމުގައި ފީފާ ވޯލްޑް ކަޕެއް ބޭއްވުމީ ހުރިހާ ކަމެއް ޙާސިލްވުން ކަމަށް ވެސް އޭނާ ވިދާޅުވި އެވެ. މީގެ އިތުރުން އެ ޤައުމުގައި ވޯލްޑް ކަޕެއް ބޭއްވުމަކީ އޭނާގެ އިތުރުން އެ ޤައުމުގެ ކުދިބޮޑު އެންމެހާ ރައްޔިތުންގެ ވަރަށް ބޮޑު އުންމީދެއް ކަމަށް ވެސް ވަނީ ވިދާޅުވެފަ އެވެ.

އިތުރަށް އޭނާ ވިދާޅުވީ، މީގެ ކުރިން ވެސް ހަ ވޯލްޑް ކަޕެއްގައި ސައުދީ އަރަބިޔާ ބައިވެރިވެފައި ވާނެ ކަމަށެވެ. އެހެންކަމުން 2034 ވަނަ އަހަރުގެ މުބާރާތް ސައުދީގެ ފަސް ގަނޑުގައި، އެ ޤައުމުގެ ސަޕޯޓަރުންގެ ކުރިމަތީގައި ބޭއްވުމުގެ ފުރުސަތު ލިބުމަކީ ވަރަށް ގާތް ކަމެއް ކަމަށް ޔާސިރު އަލް މިޝާލް ވިދާޅުވި އެވެ. އޭނާ ވިދާޅުވީ ބާއްވަން ބޭނުންވަނީ އެންމެ ފުރިހަމަ މުބާރާތް ކަމަށެވެ. އެއީ ދަނޑު މަތިން ވެސް އަދި ދަނޑު ބޭރުން ވެސް ފުރިހަމަ މުބާރާތަކަށް ވާނެ ކަމަށް ވެސް އޭނާ ވަނީ ވިދާޅުވެފަ އެވެ. އޭނާ ފާހަގަ ކުރެއްވި ގޮތުގައި މިހާރު ވެސް ސައުދީން އަންނަނީ ފުޓުބޯޅަ އަށް ވަރަށް ބޮޑު ހޭދައެއް ކުރަމުންނެެވެ. އެހެންކަމުން ކާމިޔާބު މުބާރާތެއް ބޭއްވޭނެ ކަމުގެ ފުރިހަމަ ޔަގީންކަން އޭނާ އަށް އޮވެ އެވެ.

ސައުދީން އަންނަނީ އެ ޤައުމުގެ ލީގު ވަރުގަދަ ކުރުމުގެ މަސައްކަތް ކުރަމުންނެވެ. މިއަހަރުގެ ފީފާ ކުލަބު ވޯލްޑް ކަޕް ބާއްވަނީ އެ ޤައުމުގަ އެވެ. އަނެއްކޮޅުން 2027 ވަނަ އަހަރު އޭއެފްސީ އޭޝިއަން ކަޕް ވެސް ބާއްވަނީ އެ ޤައުމުގަ އެވެ. މީގެ ކުރިން ބައެއް ފަރާތްތަކުން ބުނެފައިވާ ގޮތުގައި އެ މުބާރާތަތްތައް ސައުދީގައި ބާއްވަން އެ ޤައުމުން ބޭނުންވަނީ ވޯލްޑް ކަޕްގެ ބިޑު ކާމިޔާބު ކުރުމަށް ބާރު އެޅުމުގެ ގޮތުން ކަމަށެވެ.