މުންދު ދެއްވި ޔަގީންކަމަކީ ބައިނަލްއަގްވާމީ މުޖުތަމައުގައި އިންޑިޔާގެ އެންމެ ވަރުގަދަ އެއް ބައިވެރިއަކަށް ވާނީ އަދިވެސް ރާއްޖެކަމަށް
އިންތިޚާބީ ރައީސް ޑރ މުޙައްމަދު މުއިއްޒު
ދެން އުފެދޭ ޕީޕީއެމް/ޕީއެންސީ ސަރުކާރެއްގައިވެސް އިންޑިޔާ ވާނީ ރާއްޖެއާ އެންމެ ގާތް އެކުވެރި ގައުމަށް ކަމަށާއި ހުވާކުރެއްވުމަށްފަހު ރައީސުން އެންމެ ފުރަތަމަ ވަޑައިގަންނަވާ ގައުމަކަށް އިންޑިޔާ އޮންނައޮތުން އެގޮތުގައި އޮންނާނެކަމަށް ޕީއެންސީގެ ނައިބު ރައީސް މުހައްމަދު ޝަރީފް(މުންދު) ވިދާޅުވެއްޖެއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ސްރީލަންކާ އާއި ޖަޕާނަށް ކަނޑައަޅުއްވާފައި ހުންނެވި ސަފީރު މުހައްމަދު ޝަރީފް އިންޑިޔާގެ "ދަ ވަޔަރ" އަށް ދެއްވި އިންޓަރވިއުއެއްގައި ވިދާޅުވީ ދެން އުފެދޭ ޕީޕީއެމް/ޕީއެންސީ ސަރުކާރާމެދު އިންޑިޔާ އިން އެއްގޮތަކަށްވެސް ކަންބޮޑުވާން ނުޖެހޭނެކަމަށެވެ. އިންޑިޔާ އަށްވުރެ ޗައިނާއަށް އިންތިޚާބީ ރައީސް ޑރ މުހައްމަދު މުއިއްޒުގެ ސަރުކާރުގައި އިސްކަން ދޭނެކަމަށް ބުނެ ދައްކާ ވާހަކަތަކަކީ ހަގީގަތެއް ނެތް ވާހަކަތަކެއްކަމަށާއި އެކަމާއި އިންޑިޔާއިން ކަންބޮޑުވާން ނުޖެހޭނެ ކަމަށް މުންދު ވިދާޅުވިއެވެ.
ފޯނުން ދެއްވި އިންޓަރވިއުގައި މުންދު ދެއްވި ޔަގީންކަމަކީ ބައިނަލްއަގްވާމީ މުޖުތަމައުގައި އިންޑިޔާގެ އެންމެ ވަރުގަދަ އެއް ބައިވެރިއަކަށް ވާނީ އަދިވެސް ރާއްޖެކަމެވެ.
ތާރީޚަށް ބަލާއިރު ރާއްޖޭގެ ރައީސަކު ހުވާކުރެއްވުމަށްފަހު އެންމެ ފުރަތަމަ ވަޑައިގަންނަވާގައުމަކީ އިންޑިޔާއެވެ.އެހެން ކަމުން އަދިވެސް އެ ޘަގާފަތް ދެމި އޮންނާނެ ކަމަށް ގަބޫލު ކުރައްވާކަމަށް މުންދު ވިދާޅުވި އެވެ.
އެހެންނަމަވެސް އެކަމާމެދު އަދި އިތުރަށް މަޝްވަރާކުރާނެކަމަށް މުންދު ވިދާޅުވިއެވެ. މީގެއިތުރުން ޑރ މުއިއްޒުގެ ކެމްޕެއިންގެ ތެރޭގައި ވައުދުވެވަޑައިގެންނަވާފައިވާ ގޮތަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ފަސް އަހަރުގެ ވެރިކަމުގެ ތެރޭގައި އިންޑިޔާއިން ފަށާފައިވާ ތަރައްގީގެ އެކިއެކި މަޝްރޫޢުތަކުގެ މަސައްކަތްތައް ބައްލަވާނެކަމަށް މުންދު ވިދާޅުވިއެވެ.
މުންދު ވިދާޅުވީ ދެ ގައުމުގެ ދެމެދުގައި އޮތް ގުޅުމަށް ބުރޫއަރާނެ ފަދަ ކަމަކަށްވާނީ ރައީސް ޔާމީންގެ ސަރުކާރުގައި އިންޑިޔާއިން ހަދިޔާކުރި ހެލިކޮޕްޓަރުތަކުގެ މައްސަލަކަމަށެވެ.
އެއެއްބަސްވުމުގައި ދިމާވި އެންމެ ބޮޑު މައްސަލައަކީ ޕައިލޮޓުން ތަމްރީންވުމަށްފަހުވެސް ހެލިކޮޕްޓަރުތައް ރާއްޖޭގެ އަސްކަރިއްޔާ އާ ހަވާލުނުކޮށް އިންޑިޔާގެ ޕައިލޮޓުން އެ ހެލިކޮޕްޓަރުތައް އޮޕަރޭޓްކުރުންކަމަށް މުންދު ވިދާޅުވިއެވެ.
މުންދު ވިދާޅުވީ ޔާމީން ސަރުކާރުގައި ޗައިނާ އާއެކު ހަދާފައިވާ އެއްބަސްވުންތަކަކީ ހަމައެކަނި ވިޔަފާރީގެ ގޮތުން ހަދާފައިވާ އެއްބަސްވުންތަކެއްކަމަށާއި އެއީ އަސްކަރީގޮތުން ގުޅުން ބަދަހިކުރުމާއި ގުޅޭ އެއްބަސްވުންތަކެއް ނޫންކަމަށެވެ.
މުންދު ވަނީ ރާއްޖޭގައި ތިބޭ އިންޑިޔާގެ ޑިޕްލޮމެޓުންނާއި ޕީޕީއެމް/ޕީއެންސީ އާ ގުޅުން ކުޑަކަމަށް އެއްބަސް ވެވަޑައިގަންނަވާފައެވެ.
