އިންތިޚާބީ ރައީސް ޑރ.މުހައްމަދު މުއިއްޒުގެ ސަރުކާރުގައި ދަ ޑިމޮކްރެޓްސް ބައިވެރިވާނެ ކަމަށް އެ ޕާޓީގެ ވަގުތީ ޗެއާޕާސަން ހަސަން ލަތީފް ވިދާޅުވެއްޖެއެވެ.

އާދިއްތަ ދުވަހު ހަސަން ލަތީފް ކުރެއްވި ޓްވީޓެއްގައި ވިދާޅުވީ އިންތިޚާބީ ރައީސް މުއިއްޒު އުފައްދަވާ ސަރުކާރުގައި ދަ ޑިމޮކްރެޓްްސް ބައިވެރިވާނެ ކަމަށެވެ. ނަމަވެސް އެކަމުގެ ތަފްސީލެއް ނުދެއްވައެވެ.

ރިޔާސީ އިންތިޚާބުގެ ދެވަނަ ބުރުގައި ޑިމޮކްރެޓްސްއިން ނިންމީ ވަކިކޮޅަކަށް ތާއީދު ނުކުރުމަށެވެ. ނަމަވެސް އެޕާޓީގެ ބައެއް މެމްބަރުން އަމިއްލަ ގޮތުން އިންތިޚާބީ ރައީސް މުއިއްޒަށް ވަރަށް ފާޅުގައި ތާއީދުކޮށްފައިވެއެވެ. އަދި އަނެއް ބައި މެންބަރު ވަނީ ރައީސް އިބްރާހިމް މުހައްމަދު ސާލިހަށް ތާއީދު ކޮށްފައެވެ.

ޑިމޮކްރެޓްސް ޕާޓީ އަކީ އެމްޑީޕީގެ ތެރެއިން، އެ ޕާޓީގެ ނިންމުންތަކާ ދެކޮޅަށް ޕާޓީގެ ކުރީގެ ރައީސް ނަޝީދު އިސްވެ ހުންނަވައިގެން އުފެއްދެވި ފިކުރެއްގެ ދިރުމުގެ ބައިވެރިން އުފެއްދި ޕާޓީއެކެވެ. މި ޕާޓީއަށް އެމްޑީޕީގެ ބައެއް މަޖިލިސް މެންބަރުންނާއި އާންމު މެންބަރުން ވަނީ ގުޅިފައެވެ. 14 ޖުލައި 2023 ވީ ހުކުރު ދުވަހުގެ ރޭ ނަޝީދު ޑިމޮކްރެޓްސްއަށް ސޮއިކުރެއްވުމަށް އާޓިފިޝަލް ބީޗުގައި ބޭއްވި ޖަލްސާގައި ނަޝީދު ތަކުރަރުކޮށް ވިދާޅުވީ އެމްޑީޕީ އެމަނިކުފާނު ރޫޅާ ލައްވާނެ ކަމަށެވެ.

އިންތިޚާބީ ރައީސް މުއިއްޒުގެ ސަރުކާރުގައި ދަ ޑިމޮކްރެޓްސް ބައިވެރިވާނެ ކަމަށް ހަސަން ލަތީފު ވިދާޅުވެފައިވާއިރު، އެމްޑީޕީ ގައުމީ މަޖިލީހުގެ 50 އިންސައްތަ ތާއީދު އޮތްނަމަ، އެމްޑީޕީއާ ގުޅިވަޑައިގަތުމަށް ތައްޔާރަށް ހުންނެވި ކަމަށް ވެސް އާދިއްތަ ދުވަހު ނަޝީދު ވަނީ ވިދާޅުވެފައެވެ.