ރައީސް ސާލިޙު ވޯޓުލައްވައިފި، އެންމެންވެސް ނުކުމެ ވޯޓު ލުމުގެ ޙައްޤު ބޭނުން ކުރެއްވުމަށް އެދިވަޑައިގެންނެވި
30 ސެޕްޓެމްބަރު 2023 | ހޮނިހިރު 05:57އެމަނިކުފާނު ވޯޓު ލައްވާފައިވަނީ ޖަމާލުއްދީން ސްކޫލުގައި ބަހައްޓާފައިވާ ވޯޓު ފޮއްޓަށް
އެމަނިކުފާނު ވޯޓު ލައްވާފައިވަނީ ޅ. ހިންނަވަރު ރައްޔިތުން ވޯޓު ލުމަށް ޖަމާލުއްދީން ސްކޫލުގައި ބަހައްޓާފައިވާ ވޯޓު ފޮއްޓަށް
މިހާރު ހިނގަމުންދާ ރިޔާސީ އިންތިޚާބުގެ ދެވަނަ ބުރުގައި މޯލްޑިވިއަން ޑިމޮކްރަޓިކް ޕާޓީގެ ކެނޑިޑޭޓު، ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވޯޓު ލައްވައިފިއެވެ.
އެމަނިކުފާނު ވޯޓު ލައްވާފައިވަނީ ޅ. ހިންނަވަރު ރައްޔިތުން ވޯޓު ލުމަށް ޖަމާލުއްދީން ސްކޫލުގައި ބަހައްޓާފައިވާ ވޯޓު ފޮއްޓަށެވެ. އެގޮތުން ހޮނިހިރު ދުވަހުގެ ހެނދުނު އެމަނިކުފާނު ވަނީ ވޯޓު ލައްވާފައެވެ.
ވޯޓު ލެއްވުމަށްފަހު ނޫސްވެރިންނާ ވާހަކަފުޅުދައްކަވަމުން ރައީސް ވިދާޅުވީ، އިންތިޚާބުގެ ދެވަނަ ބުރުގައި ކާމިޔާބުވާނެކަމަށް އެމަނިކުފާނު ވަރަށް ބޮޑަށް އުއްމީދު ކުރައްވާކަމަށެވެ.
ރައީސް ވަނީ ވީހާވެސް ގިނަ މީހުން ނުކުމެ ވޯޓު ލުމުގެ ޙައްޤު ބޭނުން ކުރެއްވުމަށް އެދިވަޑައިގެންފައެވެ.
ރައީސް ވިދާޅުވީ، އެންމެ ފަހު ވަގުތާއި ޖެހެންދެންވެސް ސިޔާސީ އެކި ބޭފުޅުންގެ ވިސްނުން ބަދަލުވަމުންދާތަން ފެންނަމުން ގޮސްފައިވާ ކަމަށާއި، ވުމާއެކު، ކާމިޔާބު ކުރެވޭނެ ސީދާ ވަކި ޕަސެންޓޭޖެއް ދަންނަވަން ދަތިފުޅުކަމަށެވެ. ނަމަވެސް އިންތިޚާބުން ކާމިޔާބުވާނެކަން އެމަނިކުފާނަށް ޤަބޫލު ކުރެވޭކަމަށް ވިދާޅުވިއެވެ.
ފުރަތަމަ ގަޑިއިރުތެރޭގައިވެސް ވޯޓު ލީ މީހުންގެ ނިސްބަތް ރަނގަޅުކަން ފާހަގަ ކުރައްވައި ރައީސް ވިދާޅުވީ، ގާތްގަނޑަކަށް 86 އިންސައްތަ މީހުން ވޯޓުލާނެކަމަށް ބެލެވޭ ކަމަށާއި، އިންތިޚާބު ރަނގަޅަށް ކުރިއަށްދާކަމަށް ދެކިވަޑައިގަންނަވާކަމަށެވެ.
ރައީސް ވަނީ ހުރިހާ ރައްޔިތުންވެސް ވޯޓު ލުމުގެ ހައްގު ބޭނުންކުރުމަށް އިލްތިމާސް ކުރައްވާފައެވެ.
