ރިޔާސީ އިންތިހާބު 2023ގެ ދެވަނަ ބުރުގައި، ވޯޓުލާ މީހުންގެ ވައަތުގެ ކަށި އިނގިލީގައި ފާހަގަ ޖަހާގޮތަށް އިލެކްޝަން ކޮމިޝަން (އީސީ)ން ނިންމައިފިއެވެ.

ބުރާސްފަތި ދުވަހު އީސީން އެންމެ ފުރަތަމަ ނިންމާފައިވަނީ ވައަތުގެ މެދު އިނގިލީގައި ފާހަގަ ޖެހުމަށެވެ. ނަމަވެސް އެ ނިންމުމާއެކު ގިނަ ބައެއްގެ ފާޑުކިޔުން އަމާޒުވިއެވެ. ބަދަލުކުރި ސީދާ ސަބަބު އާއްމު ނުކުރި ނަމަވެސް, އީސީން ބުނެފައިވަނީ ރިޔާސީ އިންތިޚާބު 2023ގެ ދެވަނަ ބުރުގައި، ވޯޓުލާ މީހުންގެ ވައަތުގެ ކަށި އިނގިލީގައި ފާހަގަ ޖަހާގޮތަށް ކޮމިޝަނުން ނިންމާފައި ވާކަމަށެވެ.

ސެޕްޓެންބަރު މަހުގެ 09 ވަނަ ދުވަހު ބޭއްވި ރިޔާސީ އިންތިޚާބުގެ ފުރަތަމަ ބުރުގައި ފާހަގަ ޖަހާފައިވަނީ ވައަތުގެ ޝަހާދަތް އިނގިލީގައެވެ.

އިނގިލީގައި ފާހަގަ ޖަހަނީ އެކަމަށް ޚާއްސަކޮށްފައިވާ މާކަރަކުންނެވެ. އަދި އިނގިލީގެ ނިޔަފައްޗާއި ނިޔަރޮދި ހިމެނޭހެން ޖަހާ މި ފާހަގައަކީ އުނދަގުލުން ފިލުވޭ ފާހަގައެކެވެ. އާންމުގޮތެއްގައި ކައިރިކައިރީގައި އިންތިޚާބު ބާއްވާނަމަ ފާހަގަޖަހާ އިނގިލި ބަދަލުކުރެއެވެ.

ރިޔާސީ އިންތިޚާބުގެ ދެވަނަ ބުރުގެ ވޯޓުލުން އޮންނާނީ 30 ވަނަ ދުވަހުގެ ހެނދުނު 8:00ން ހަވީރު 5:00ށެވެ.

ދެވަނަ ބުރުގައި ވޯޓުލުމުގެ ހައްގު 282،804 މީހުންނަށް ލިބޭނެއެވެ. މީގެ ތެރޭގައި ހިމެނެނީ 144،410 ފިރިހެނުންނާއި 138،394 އަންހެނުންނެވެ.