ޑރ. މުއިއްޒު ރައްޔިތުންނަށް ދައްކަވާ ނަނާ ހުވަފެނުގައި ނުޖެހުމަށް މެންބަރު ސަނީފު ގޮވާލައްވައިފި
2018 ވަނަ އަހަރުގެ ވެރިކަން ބަދަލުކުރީ އަނިޔާވެރިކަން ބޭނުންނުވާތީ
ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފް
ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ރައްޔިތުންނަށް ދައްކަވާ ނަނާ ހުވަފެނުގައި ނުޖެހުމަށް ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފް ގޮވާލައްވައިފިއެވެ.
ބުދަ ދުވަހުގެ ރޭ ތިނަދޫ ސިޓީގައި ބޭއްވި އުފާވެރި އަމާން ރާއްޖެ ޖަލްސާގައި މެންބަރު ސަނީފް ވިދާޅުވީ، 2018 ވަނަ އަހަރުގެ ވެރިކަން ބަދަލުކުރީ އަނިޔާވެރިކަން ބޭނުންނުވާތީ ކަމަށެވެ. މިއަދުގެ ސަރުކާރުން ރައްޔިތުން ބޭނުންވާ ހުރިހާ ކަމެއް ކޮށްދެމުން އަންނައިރު، އިދިކޮޅު ކެންޑިޑޭޓަށް ވޯޓުދޭންޖެހޭ ސަބަބެއް ނެތްކަމަށް މެންބަރު ވިދާޅުވިއެވެ.
މެންބަރު ވިދާޅުވީ ރައީސް އިބްރާހީމް މުހައްމަދު ސާލިހަށް އިތުރު ދައުރެއް ދޭންޖެހޭ ކަމަށާއި، ރާއްޖޭގެ އިތުރުން ތިނަދޫއަށް ތަރައްގީ ގެނައުމަށް އެމަނިކުފާނު ހޮވަންޖެހޭ ކަމަށެވެ. އަދި ވިދާޅުވީ ތިނަދޫއަށް އެކަނިވެސް ގިނަ ވަޒީފާތަކެއް އުފައްދަވައިދެއްވާފައި ވާކަމަށެވެ.
ތިނަދޫއަށް ޑރ. މުއިއްޒު ވެވަޑައިގެންނެވި ވައުދުފުޅުތަކަށް އިޝާރާތް ކުރައްވައި މެންބަރު ވިދާޅުވީ، ފުރަތަމަ ދަތުރުފުޅުގައި އެއްވެސް ވައުދެއް ވެވަޑައިނުގަންނަވާ ކަމަށާއި، ރައްޔިތުން ޝަކުވާ ދެންނެވުމުން، ދެވަނަ ފަހަރަށް ރަށަށް ވަޑައިގެން ވައުދުފުޅުތަކެއް ވެވަޑައިގެންނެވީ ރައްޔިތުން ހިތްހަމަޖެއްސުމުގެ ގޮތުން ކަމަށެވެ. އެއީ ތަސައްވުރެއް އޮވެގެން ވެވަޑައިގެންނެވި ވައުދުފުޅުތަކެއް ނޫން ކަމަށް މެންބަރު ވިދާޅުވިއެވެ.
އެހެންކަމުން ޑރ. މުއިއްޒު ދައްކަވާ ނަނާ ހުވެފެނުގައި ނުޖެހުމަށް މެންބަރު ގޮވާލެއްވިއެވެ.
މެންބަރު ވިދާޅުވީ މިސަރުކާރަކީ ރައްޔިތުންނަށް ހެޔޮ އެދޭ ސަރުކާރެއް ކަމަށާއި، މުސާރަ ކުޑަވެގެން ރައްޔިތުން ކުރި ޝަކުވާތަކަށް ނިމުން ގެނެސްދިން ސަރުކާރެއް ކަމަށެވެ. މިއަދު ގިނަ ދާއިރާތަކުން މުސާރަ ބޮޑުކޮށްދީފައިވާކަން މެންބަރު ފާހަގަކުރެއްވިއެވެ.
މެންބަރު ވިދާޅުވީ އިދިކޮޅު ކެންޑިޑޭޓު އިންތިޚާބުވެއްޖެނަމަ ރާއްޖެ ކޮންޓްރޯލް ކުރާނީ އަނިޔާވެރިކަމާއެކު، ނިރުބަވެރި ޖަމާއަތްތަކުން ކަމަށެވެ. ނަމަވެސް ރައީސް ސާލިހު އިންތިޚާބުވެއްޖެނަމަ އުފާވެރި އަމާން ރާއްޖެއަށް ރައްޔިތުންނަށް ލިބޭނެ ކަމަށް މެންބަރު ވިދާޅުވިއެވެ.
