ރައީސް ސާލިހަކީ ރާއްޖޭގެ ހުރިހާ ރައްޔިތުންގެ ކެންޑިޑޭޓު: ޝައިޚް އިލްޔާސް
27 ސެޕްޓެމްބަރު 2023 | ބުދަ 13:23އުދަނގޫ ހާލަތުގައިވެސް ކެތްތެރިކަމާއި މަޑުމައިތިރިކަން އިޚްތިޔާރު ކުރެއްވި
ރާއްޖޭގެ މަޝްހޫރު ދީނީ އިލްމުވެރިޔާ އައްޝައިޚް އިލްޔާސް ހުސައިން
ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަކީ ރާއްޖޭގެ ހުރިހާ ރައްޔިތުންގެ ކެންޑިޑޭޓު ކަމަށް، ރާއްޖޭގެ މަޝްހޫރު ދީނީ އިލްމުވެރިޔާ އައްޝައިޚް އިލްޔާސް ހުސައިން ވިދާޅުވެއްޖެއެވެ.
ބުދަ ދުވަހު އައްޑޫސިޓީ ހިތަދޫގައި ބޭއްވި ކެމްޕޭން ޖަލްސާގައި ޝައިޚް އިލްޔާސް ވިދާޅުވީ، ރައީސް ސާލިހަކީ ރައްޔިތުންގެ ކެންޑިޑޭޓު ކަމަށާއި، އެކަން ފާއިތުވި އަހަރުތަކުގައި ސާބިތުކޮށްދީފައި ވާކަމަށެވެ.
މުޅި ދުނިޔެއަށް ކުރިމަތިވި ވަބާއެއް ކަމަށްވާ ކޮވިޑް-19އަށް އިޝާރަތް ކުރައްވައި އިލްޔާސް ވިދާޅުވީ، އެ ދުވަސްތަކުގައި ރައީސް ސާލިހު އިސްކުރެއްވީ ރައްޔިތުން ކަމަށާއިި، އުދަނގޫ ދަތި ހާލުގައިވެސް ކެތްތެރިކަމާއި މަޑުމައިތިރިކަން އިޚްތިޔާރު ކުރެއްވި ކަމަށެވެ. އަދި އެމަނިކުފާނުގެ ވެރިކަމުގައި ދެއަހަރު ކޮވިޑް-19އާ ގުޅިގެން ގެއްލިގެންދިޔަކަން އިލްޔާސް ފާހަގަކުރެއްވިއެވެ.
އިލްޔާސް ވިދާޅުވީ ރައީސް ސާލިހު ރާއްޖޭގައި ހަމަޖެހުން ގާއިމްކޮށްދެއްވި ކަމަށާއި، ކުޑަ ރަށެއް ބޮޑު ރަށެއް ތަފާތު ކުރެއްވުމެއްނެތި ތަރައްގީ ގެނެސްދެއްވި ކަމަށާއި، ޚިޔާލާއި ފިކުރު ތަފާތުވި ނަމަވެސް ހައްގުތައް ރައްޔިތުންނަށް ކަށަވަރުކޮށްދެއްވި ކަމަށެވެ.
މި ސަރުކާރުން ރާއްޖެއަށް ބޮޑު ބަދަލެއް ގެނެސްދީފައިވާކަން ފާހަގަކުރައްވައި އިލްޔާސް ވިދާޅުވީ، ދެވަނަ ދައުރެއް ރައީސް ސާލިހަށް ހޯއްދަވައިދެއްވަންޖެހޭ ކަމަށެވެ. ކުރިއަށް އޮތްތަނުގައި ވެސް ރައްޔިތުންނަށް ލުއިފަސޭހަކަން ގެނެސްދެއްވާނެ ވެރިއަކީ ރައީސް ސާލިހު ކަމަށެވެ.
އިލްޔާސް ވިދާޅުވީ ނާމާން ދުވަސްތަކަށް ދާން ބޭނުންނުވާނަމަ މިމަހުގެ 30 ވަނަ ދުވަހު އޮންނަ ރިޔާސީ އިންތިޚާބުގައި ހުރިހާ ރައްޔިތުން ނުކުމެ ރައީސް ސާލިހަށް ވޯޓުދޭން ޖެހޭ ކަމަށެވެ. އަދި މާޒީގައި ކަންކަން ހިނގާފައިވާ ގޮތަށް ބެލުމަށްފަހު ވޯޓު ދިނުމަށް އިލްޔާސް ގޮވާލެއްވިއެވެ.
