މަސައްކަތް ކުރަނީ ޤައުމާއި މަގުމަތީގެ ހަމަޖެހުން ގެނެސްދިނުމަށް - ރައީސް
8 ޑިސެމްބަރު 2024 | އާދީއްތަ 08:05ކުށްވެރިން ދޫކޮށްލަނީ ސިޔާސީ ވިސްނުން ނުގެންގުޅޭ ކަމަށާއި އެކަން ކުރަނީ ޤައުމީ ވިސްނުމުގައި ކަމަށް ރައީސް ވިދާޅުވި
ރައީސް މުއިއްޒު، ކުރީގެ ރައީސް ޔާމީން މިނިވަންކުރުމަށް ގޮވާލާ ބޭއްވި މުޒާހަރާއެއްގައި ބައިވެރިވެވަޑައިގަންނަވަނީ
މަސައްކަތްކުރައްވަނީ ޤައުމާއި މަގުމަތީގެ ހަމަޖެހުން ގެނެސްދިނުމަށް ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އއ.ތޮއްޑޫގައި ރައްޔިތުންނާއި ވާހަކަދައްކަވަމުން ރައީސް ވަނީ އެމަނިކުފާނު މަސައްކަތްކުރައްވަނީ ޤައުމުގައި ހުރި ބޮޑެތި މައްސަލަތައް ހައްލުކުރުމަށް ކަމަށް ވިދާޅުވެފައެވެ. އެކަންކަން ކުރުމުގައި ސިޔާސީ ވިސްނުން ނުގެންގުޅޭ ކަމަށާއި އެކަން ކުރަނީ ޤައުމީ ވިސްނުމުގައި ކަމަށް ރައީސް ވިދާޅުވިއެވެ. ކުރީގެ ސަރުކާރުން ޖަލުގައި ތިބޭ ކުށްވެރިން ރިހިބިލިޓޭޝަނަކާއި ނުލާ ސިޔާސީ ބޭނުމަށް ދޫކޮށްލާފައިވާ ކަމަށާއި ރައީސަށް ލިބިދޭ ބާރު ބޭނުންކޮށްގެން އެތައް ކުށްވެރިންނެއް ދޫކޮށްލާފައިވާ ކަމަށް އެ މަނިކުފާނު ވިދާޅުވިއެވެ. މި އަހަރު ތެރޭގައި ރައީސްގެ ލުއިގެ ތެރެއިން ޖުމްލަކޮށް އަދަބު ލުއިކޮށްދިނީ 86 މީހުންނަށް ކަމަށް އެ މަނިކުފާނު ވިދާޅުވިއެވެ. ނަމަވެސް 2023ގެ ރިޔާސީ އިންތިޚާބާއި ދިމާކޮށް 400 އަށް ވުރެ ގިނަ މީހުން، 2022 ވަނަ އަހަރު 256 މީހުން، 2021 ވަނަ އަަހަރު 456 މީހުން ދޫކޮށްލާފައިވާ ކަމަށާއި 2019 ވަނަ އަހަރު 506 މީހުން ދޫކޮށްލާފައިވާ ކަމަށް ރައީސް ވިދާޅުވިއެވެ. އެކަން ކުރަނީ އިންތިޚާބުތަކާއި ދިމާކޮށް ނުރަނގަޅު މަންފާއެއް ހޯދުމަށް ކަމަށް ރައީސް ވަނީ ސިފަކުރައްވާފައެވެ.
ސިޔާސީ ބޭނުމަށް ކުށްވެރިން ދޫކޮށްލާ ކަމަށާއި، މަގުމަތީގެ ރައްކާތެރިކަން އޭގެ ސަބަބުން ގެއްލޭކަމަށް ދޭހަކޮށް ރައީސް ވާހަކަދައްކަވާފައި މި ވަނީ ޤާނޫނު އަސާސީގެ ދިފާއުގައި ޑިސެމްބަރު 10ގައި އެއްވުމެއް ބާއްވަން މަސައްކަތް ކުރަމުން ދަނީ ހަމަނުޖެހުން އުފެއްދުމަށް ކަމަށް ސަރުކާރުން ބުނަމުންދާ ދަނޑިވަޅެއްގައެވެ. ސަރުކާރުގެ އެކްޓިވިސްޓުންނާއި ސިޔާސީ އިސް މަޤާމުތަކުގައި ތިބި މީހުން ދަނީ އެ އެއްވުމަކީ މަސްލަހަތު ނަގާލާ މަގުމަތީގެ ރައްކާތިކަން ގެއްލޭ ގޮތަށް އަމަލުކުރުމަށް ކަމަށް ބުނެ މީސްމީޑިއާގައި މެސެޖުތައް ހިއްސާކުރަމުންނެވެ. އާދިއްތަ ދުވަހު ރައީސް ދެއްކެވި ވާހަކައަކީ ވެސް ނުސީދާގޮތެއްގައި ކުރީ ސަރުކާރުގައި ތިބި މީހުން މަގުމަތީގެ ހަމަނުޖެހުން ނަގާލަފާނެކަމަށް ދޭހަކުރުމަށް ދެއްކިވާހަކަތަކެއް ކަމަށް ބައެއް އާއްމުން ފާހަގަކުރެއެވެ. ސަރުކާރުން މިފަދަ ވާހަކަތައް ދައްކަނީ ޤައުމިއްޔަތާއި ހަމަޖެހުމުގެ ނަމުގައި ވަކި ސިޔާސީ ފިކުރަކާއި މެދު ނަފްރަތު އުފެއްދުމަށް ކަމަށް ވެސް ފާޑުކިޔާ ބައެއް ފަރާތްތަކުން ދަނީ ބުނަމުންނެވެ.
